E Mafai Ona Faia e le Uarota a Ubon!
E alala le tusitala i Isan, Thailand.
O tagata o la matou uarota e seasea ona faatasi uma—e oo lava i le lotu. O le a se mea e mafai ona tatou faia e aumaia faatasi ai tagata uma?
O le tau, mamao, ma aʻoga e taofia ai le toatele o tagata Thai mai le auai i le lotu, o le mea lea na filifili ai le Uarota a Ubon e seti se aso ma uunaia le toatele o tagata e mafai ona auai.
O le tele o tagata iinei i Thailand e faigata ona o mai i le lotu ona o fonotaga a le aʻoga, leaga le tau (o le toatele o matou tagata e malaga i le pasika), ma le mamao. O tagata o laʻu uarota, o le Uarota a Ubon, o loo feagai ma nei luitau ma sili atu, lea e faigata ai ona auai i le lotu.
I se tasi Aso Sa, sa ou tau mafaufau pe faapefea ona mafai ona matou fesoasoani i tagata o le Au Paia ia iloa faamanuiaga o le faatinoina o le faatuatua ia tapuai faatasi e le aunoa. Na oo mai le manatu ia te au, “ae faapefea pe a ma filifilia se aso sa e taulai atu i le mauaina o tagata uma i le lotu i lena aso?” Afai e mafai ona matou aumaia tagata uma i le aso e tasi, o le a mafai ai e le au paia ona vaai moni ma lagona le malosi o le uarota.
O isi taitai ma tagata o le uarota na fiafia i le manatu ma sa auai i le fuafuaina mo lena mea. Na matou filifili i se aso, 17 o Iuni, 2018—o le Aso Sa sili ona latalata i le aso na faavaeina ai le Siteki o Ubon—ma amata ona auina atu ni savali e ala i faasalalauga faaagafesootai. Na matou faaigoaina le fuafuaga “Tatou o Mai i le Lotu i le Aso Sa lea e Tasi! E 200 le Auai i le Sauniga Faamanatuga—E Mafai e le Uarota a Ubon ona Fai.”
Na aofia ai le uarota atoa i le fefaamalosiaʻi o le tasi ma le isi e sau. O tagata uma na latou faʻaauau pea le auina atu o feʻau faatauanau i isi e auai i le fuafuaga. Na valaaulia foi e le au paia ia tagata ua toe foi mai ma uo e le auai i le ekalesia. Ma sa toatele tagata na fai mai ioe!
Na matou iloaina o lenei mea e sili atu nai lo na o se mea malie e iloa ai pe toafia tagata e mafai ona o mai. Sa ma mananao ina ia avea o se aafiaga faapitoa faaleagaga e fesoasoani i le uunaia o tagata ina ia avea le auai i le sauniga faamanatuga o se mea e faamuamua. O lea i masina e agai atu i le aso faapitoa, na uunaia ai e le au epikopo tagata ina ia aloese mai soo se gaoioiga atonu e faaitiitia ai le taua o le faamanatuga po o le tapuai atu i le Alii.
Na matou faia foi ni pepa e faailoga ai tusi [bookmarks] e fesoasoani ai i tagata ia manatua le fuafuaga ma le Agaga na matou iloa o le a i ai iina ona o taumafaiga a tagata uma e auai. O le faailoga tusi na i ai le igoa o le fuafuaga ma se mau: “O A’u na ou faapea ane, o atua Outou; o fanau foi outou uma a le Silisili ese.” (Salamo 82:6), Na matou filifilia lenei mau aua na matou mananao i tagata uma ia latou iloa o i latou o fanau a le Atua ma ua ia i latou le gafatia e avea ai faapei o Ia.
Na fuafua tagata mo se taimi umi mo tagata uma e mafai ona auai i le aso faatulagaina. Mulimuli ane, na oo mai le aso. Ma na oo mai ai foi ma faalavelave. Na malosi timuga i le afiafi ao lei oo i le aso ma faaauau pea le timuga i le po atoa. O le isi faʻalavelave mo nisi o le au paia, o se fonotaga taua a le aʻoga na fuafua i le taimi lava lea e tasi o le lotu.
Na matou talosaga atu i tagata uma ia tatalo mo nei faʻalavelave ina ia aveesea pe foia. Pe a ma le 7:00 i le taeao o le Aso Sa, na uma ai le timu. Ma ina ua matou taunuu i le lotu, sa matou mauaina na aiga o e na manaomia ona o i le fonotaga a le aoga. Ina ua matou fesiligia i latou e uiga i la latou fonotaga, sa latou fai mai, “E tatau ona matou o mai muamua i le sauniga faamanatuga.” O se molimau sili ia te au le taua o le faamanatuga a le Alii.
Na aumai e le au paia le tele o uo ma tuaoi i le sauniga. Na aumai e se tasi tamaitai i le uarota ni uo se toavalu e le i o mai muamua i le lotu! Aʻo faʻaauau pea ona taunuu mai tagata, na manaomia ona matou tatalaina le potu faaopoopo. O le faitauga o le auai i le sauniga faamanatuga e 215 tagata! I le taimi atoa o le sauniga, na mafai ai ona ou lagonaina o loo faatasi le Agaga Paia ma i matou ma na fesoasoani le Atua ia matou manuia i lenei taumafaiga.
Ina ua mavae lenei Aso Sa ofoofogia, o le numera o tagata e masani ona auai i sauniga faamanatuga na faateleina. E aofia ai alii e umia le Peresitua Mekisateko e toatolu na amata ona auai i le lotu e le aunoa ma o latou aiga. E tasi le aiga e toʻalua a latou fanau na papatisoina ma faʻamauina i le masina na sosoo ai.
Sa vaai o matou taitai o le siteki i se aafiaga lelei lenei mo la matou uarota ma filifili ai e faia se mea talitutusa faapena. Mo le fuafuaga a le siteki, na faia e tagata o le siteki se tautinoga e o atu ia latou lava uarota i le Aso Sa lava e tasi. O le fuafuaga na maoae foi le manuia i le matou siteki atoa—ou te iloa e tasi le uarota i la matou siteki e 208 tagata na auai! Ou te matuai faafetai lava mo faamanuiaga na matou mauaina ma laʻu uarota ma laʻu siteki ona o nei mea na tutupu ma mo le Agaga na matou lagonaina i le sauniuni ma le auai i ai.