Tatou te Mananao Uma Lava ia Taliaina/Aofia ai
E tusa lava pe faatasi ma aiga, uo, paaga, po o tagata i le lotu, tatou te mananao uma lava ia taliaina/aofia ai.
Ou te le lelei i le pasiketipolo. Ia ta’u o le kenera, ta’u o le tomai faanatura, ta’u o le a lava—e foliga mai i taimi uma o isi tagata uma lava e i ai ia i latou i luga o le malae taalo, ae e leai la ia a’u. O lenei mea e masani ona ou lagona ai le faaesea.
Ae o lenei mea moni sa le i taofia ai a’u uo mai le valaauliaina o a’u e taalo pasiketipolo. Sa na o lo’u tamoe i luga ma lalo o le malae taalo, ma faafoliga na ou iloa le mea sa ou faia. Ae ou te le manatu na ou faavaleaina se isi. Ae, o le lelei o a’u uo, sa latou faia le mea sili e faaaofia ai a’u.
I se tasi o taaloga, sa ou togi ai ma sa lele atu le polo agai i le mama. Sa tau i le laupapa i tua, i le mama, ona pau loa lea i le ato. Sa le mafai ona ou talitonu i ai. O le laki sa’o a, sa alu ai i totonu la’u togi!
O le malamalama ai i le tulaga ese o lenei taimi, na faamalo mai ai a’u uo ia te a’u. E lei tele tele so’u sao i lena taaloga, ae sa ou lagona e pei ua ou aofia ai, ma e matua tele le taua o lena mea.
O le taliaina/aofia ai o se manaoga faaletagata. E tusa lava pe faatasi ma aiga, uo, paaga, po o tagata i le lotu. I le avea ai ma tagata o Le Ekalesia a Iesu Keriso o le Au Paia o Aso e Gata Ai, e le gata ina tatou mananao e taliaina/aofia ai, ae e tatau foi ona tatou mananao i isi ia latou manatu e taliaina/aofia ai foi i latou. E tatau ona tatou mulimuli i le faataitaiga ma le alofa a lo tatou Faaola ma aapa atu i tagata uma o e mananao “e o mai i le lafu a le Atua, ma taua o ona tagata” (Mosaea 18:8).
E Manaomia i Tatou Uma
O le mea e faanoanoa ai, e le o tagata uma e lagona e taliaina/aofia ai i latou—e oo lava i le lotu. O nisi tagata e ono lagonaina le lē amanaiaina pe oo lava i le faaesea. Ae a tatou mafaufau loloto i le mea moni, e manaomia uma lava tatou. Na saunoa le Aposetolo o Paulo, e uiga i le Ekalesia: “Auā foi o le tino [o Keriso] e le se itu tino e tasi lea, a e peitai o itu tino e lasi” (1 Korinito 12:14).
Na saunoa mai Elder Jeffrey R. Holland o le Korama a Aposetolo e Toasefululua, “o se mea faamalieina tele lea o le manaomia lea i le tino o Keriso. Pe ou te galue e pei o se mata po o se lima e le talafeauga; o le mea moni lava ua manaomia a’u … ma e le atoatoa le tino e aunoa ma a’u.”1
Pe a avea i tatou ma se vaega o le tino o Keriso—o le Ekalesia—tatou te aufaatasi ma isi i le faatuatua. Ma o se vaega o le tino o Keriso, e manaomia tagata uma taitoatasi o le Ekalesia.
E Mafai Ona Tatou Fesoasoani i Isi e Lagona e Pei e Taliaina/Aofia ai i Latou
Faatasi ai ma le aai ma feinu i le faamanatuga, tatou te o i le lotu ina ia “potopoto faatasi … e anapogi ma tatalo, ma talatalanoa o le tasi i le isi e uiga i le manuia o [o tatou] agaga” (Moronae 6:5).
O i latou e fou pe toe foi mai i le lotu, atonu e lagona le lē toafimalie teisi. Atonu latou te lagonaina le faaesea, ma faamoemoe o le a aapa atu se isi ma faauo atu. E mafai ona avea i tatou ma e ataata, faatalofa, ma faauo ia i latou.
Na saunoa Peresitene M. Russell Ballard, o le sui peresitene o le Korama a Aposetolo e Toasefululua, “Afai o i tatou moni lava o ni soo o le Alii o Iesu Keriso, o le a tatou aapa atu ma le alofa ma le malamalama i taimi uma i o tatou tuaoi uma.”2
“E Leai Se Tasi o Outou e Tatau Ona Alu Ese”
Ina ua faaali atu le Faaola i sa Nifae, na Ia valaaulia tagata uma e tagotago i faailoga i ona lima, vae, ma le itu. Sa o atu i luma taitoatasi tagata ia te Ia (tagai i le 3 Nifae 11:15). Ona ia faamaloloina lea o e mamai, e ua tiga, ma puapuagatia (tagai i le 3 Nifae 17:7, 9). Ona Ia faamanuiaina lea o tamaiti uma ma tatalo mo i latou (tagai i le 3 Nifae 17:21). I se taimi puupuu mulimuli ane, sa Ia faapea mai ai ma le alofa, “ua ou poloaiina ia leai se tasi o outou e alu ese atu” (3 Nifae 18:25).
E tusa lava po o a ou tauiviga, o lou talaaga, lou tulaga o le tausiga, po o soo se mea e te lagona e le taliaina/aofia ai, ia e manatua e le finagalo le Faaola e te alu ese. Afai na e lagonaina le tuuatoatasi po o le faaesea, Na te silafiaina na lagona. Sa inosia ma tuulafoaiina o Ia (tagai i le Isaia 53:3). Na Ia tauaveina i Ona luga a tatou agasala ma faanoanoaga ma aafia i ituaiga uma o tiga ma le tuuatoatasi (tagai i le Alema 7:11). Na finagalo malie lava Iesu Keriso e oo i nei aafiaga uma ina ia mafai ai ona Ia silafia le auala e fesoasoani mai ai ia i tatou. A o tatou mulimuli ia te Ia, o le a tatou iloa ai e taliaina/aofia ai i tatou.
O Loo I Ai se Avanoa mo Oe
Ua i ai le Ekalesia e fesoasoani ia i tatou ia iloa pe mafai faapefea ona avea i tatou e faapei o le Tamā Faalelagi. O loo tuuina mai ai foi le auivi ma le pule e tatau ai e osia ai feagaiga paia ma tuu ai i tatou i luga o le ala i le faaeaga.
Po o fea lava o e i ai i lenei malaga, ia manatua, e pei ona saunoa mai Elder Dieter F. Uchtdorf o le Korama a Aposetolo e Toasefululua, “o loo i ai se avanoa mo oe i lenei Ekalesia. Sau, auai faatasi ma i matou!”3
A o tatou taumafai e mulimuli i le faataitaiga atoatoa a le Faaola e ala i le alofa, fesoasoani, ma le aapa atu o le tasi i le isi, e mafai ona tatou avea le Ekalesia ma se nofoaga o le taliaina/aofia ai ma le lotogatasi. E oo lava foi i tagata e le mafai ona taaalo pasiketipolo!