O o Tatou Aiga, O o Tatou Auaiga

Musumusuga i le Uafu

Saunia e Afatia Silaga

Sa tiga lo’u aiga, ma e fa itula o ou faatali mo le vaa i lo’u aiga. Ua oo i le taimi e tatalo ai.

Ata na tusia e Charles Lehman

Ua toe lava o le tietie i le vaa ou oo i lo’u aiga ina ua ou maua le tala sa i ai se finauga tele i lo’u aiga i le amataga o lena aso. O se finauga matuā telē lava .

Sa ita lo’u toalua. Sa feita la’u fanau. Sa tiga tagata uma. Ma sa ou le iloa po o le a le mea a fai.

E lei leva ona ou alu i la’u taavale o le galuega i lena taeao mai lo’u fale i le motu o Upolu, Samoa, ma sa ou i luga o le vaa agai i Savaii, Samoa. O lenei malaga e alu ai ni nai itula i le alu ma le sau.

Ina ua uma ona ou talanoa i lo’u toalua i le telefoni ma faalogoina le ita i lona leo, ou te tautino atu sa faigata ia te au ona mafaufau e uiga i lo’u toe foi mai i le fale i lenei tulaga. Sa ou le mautinoa pe o le a faapefea ona ou fesoasoani e faafoia le tele o lagona tiga i totonu o lo’u aiga.

Sa ou oo atu i le uafu ma amata ona tatalo. Mo le isi fa itula, sa ou nofo ai i la’u loli, ma tatalo e uiga i lo’u aiga a o faatalitali mo le vaa agai i le fale.

Ina ua mavae se taimi umi i le tatalo, sa ou mauaina se uunaiga manino faaleagaga. “Tau lava ina faaali atu lou alofa i lau fanau. Faaali le alofa. Ta’u atu ia i latou, ‘Ou te alofa ia te oe, ma e alofa le Atua ia te oe.’”

E masani lava ona matou faifaimea faatasi ma la’u fanau. Ua latou iloa ou te alofa ia i latou, ma latou te iloa lo latou taua tele ia te au. Ae sa ou malamalama manino lelei, e ala i faaaliga, o le faaalia o le alofa sili atu ua na o le pau lea o le mea e toe aumaia vavalalata ai lo’u aiga.

Ina ua ou taunuu i le fale i le leva o lena po, sa le fiafia lava lou toalua. “O le a lau mea o le a fai?” sa ia fesili mai ai ia te au.

Sa ou ta’u atu ia te ia e uiga i le faaaliga na ou mauaina. Sa ou fai atu ia te ia ou te lagona e tatau ona ma faaali atu lo maua alolofa ia manino atili atu i le ma fanau. “Ou te talitonu o le ki lena e faamalolo ai le tiga ua lagona e tagata uma,” sa ou fai atu ai. Sa ma filifili e faataitai ona taumafai e fai.

Ia, o le po masani lenei mo la matou fonotaga faaleaiga i vaiaso taitasi. Peitai, ona o le finauga, o le toatele o lo’u aiga sa mananao e faaleaogaina i lena vaiaso. Sa tonu ia i maua ma lo’u toalua o le a matou faia pea lava le fonotaga faaleaiga.

I le taimi muamua, e leai se tasi na faia se upu. Sa ou iloa sa tele le loimata maligi ma le tiga faalelagona i lo’u aiga i lena aso.

Ona amata lea ona tautala lo’u toalua. “Ou te manao ia outou iloa lo’u alofa tele ia te outou uma,” o lana tala lea. Sa ou maitauina le suiga i le gagana a o latou tino. Sa latou nonofo uma i le faatausiusiuga o o latou nofoa. Ae i le taimi lava na amata ai ona faamatala mai e lo’u toalua lona alofa tele ia i latou, sa faalagolago atu ai i tua o nofoa ma le toamalie le ma fanau. E lei umi ae latou toe talanoa mai. Sa ou ta’u atu foi i ai lo’u alofa tele ia i latou ma lo’u fiafia tele o i matou o se aiga.

O Lena na foia ai le faafitauli atoa. Sa matuā ofoofogia tele. Sa toesea uma le ita mai lo matou aiga, ma sa mafai ona matou faaleleia mea sa nutimomoia.

Ia, e le atoatoa lo’u aiga. Ae matou te matuā alolofa tele le tasi i le isi. Ma e matou te faaavanoaina le taimi o le tasi mo le isi. Pe o le ala po i luga e faitau faatasi ia tusitusiga paia, ō faatasi i le lotu, taaalo faatasi i le pasiketipolo, fefaasoaai o taumafataga, po o le tau lava o le faalogologo faatasi i musika, matou te galulue malosi ia tumau le vavalalata.

E ala i nei mea uma, ma te iloa atili ai ma lo’u toalua le taua tele o le faaali atu o lo ma alolofa mo le ma fanau.

Lesona mai Le Tamā Lenei

• Sa iloa e Uso Silaga e le mafai ona ia foia na o ia lenei faafitauli. Sa tatalo o ia mo le tele o itula e saili faaaliga i le auala e fesoasoani ai i lona aiga.

• O le aiga o Silaga e faatotonugalemu Iesu Keriso i lo latou fale. E ui lava i le pisi o taimi faatulagaina, ae e ala vave i latou mo suesuega faaletusitusiga paia faaleaiga. Latou te faia fonotaga faalevaiaso o le aufono faaleaiga. Latou te auai i le lotu. Latou te faia mea uma latou te mafaia e aumai ai faamanuiaga o le talalelei i lo latou aiga ma le auaiga.

• Sa fefautuaai faatasi Uso Silaga ma lona faletua ae la te lei talanoa atu i tamaiti e uiga i le finauga.

• E ta’u soo e Uso ma Tuafafine Silaga i la la’ua fanau lo laua alolofa ia i latou.

• E galulue faatasi le au Silaga, ae faapena foi ona latou taaalo faatasi. Ua fai latou ma faataitaiga o le fautuaga lenei na tuuina mai e Elder Dieter F. Uchtdorf o le Korama a Aposetolo e Toasefululua: “I sootaga faaleaiga o le sipelaga moni o le alofa o le t-a-i-m-i, taimi. O le faaavanoa o le taimi mo le tasi ma le isi o le ki lea i le nofo lelei o le aiga” (“E Uiga I Mea e Sili Ona Taua,” Liahona, Nov. 2010, 22).”