Laufanua o Vaovao ma Faamanuiaga Faaleperisitua

Elder Jack H. Gerard

O Le Au Fitugafulu

Mai se faatalanoaga ma Eliza Broadbent.

“O le Faamafanafana … o le Agaga Paia lea” (Ioane 14:26).

A o ou tamaitiiti, sa i ai se faatoaga laitiiti a lo’u aiga e i ai povi ma laufanua. O le ola ae i se faatoaga o se galuega faigata.

I se tasi aso vevela o le taumafanafana, sa ma galulue ai ma lo’u uso i le faatoaga. Sa agi malosi le matagi, ma sa tele le pefu i le ea. Sa matuā ou ilitata gofie lava, ma o le pefu mai le vaovao sa ou ma’i ai i nisi taimi. Sa amata ona tagi o’u mata. Sa faigata ona mānava. Na amata ona tafe toto mai lo’u isu aua sa ou matuā miliina lava.

Ina ua sau lo’u tina i le fanua ma iloa mai a’u, sa fai mai ia te a’u ou te sau i totonu o le fale. Sa faataoto a’u i luga o le nofoa ma tuu se ie susū i luga o o’u foliga. I ni nai minute mulimuli ane, na toe foi mai o ia ma ni faifaatoaga se toalua. Sa laua laeiina ni ovalola sa ufitia i le pefu vao.

O faifaatoaga o ni tagata o le matou uarota. Sa tuu o la lima i luga o lo’u ulu ma amata ona tuuina mai ia te au se faamanuiaga. O lo’u tamā e le o se tagata o le Ekalesia i le taimi lena, o lea na te lei umia ai le perisitua. Ae o le a le galo lava ia te au le lagona sa ou maua a o faamanuiaina ai a’u e na tagata lelei. Sa mafanafana, toafilemu, ma toafimalie. Ma ou te lei toe lagonaina lava se ma’i tele.

Mulimuli ane i le olaga, sa ou iloaina ai o lena lagona o le Agaga Paia. O nisi taimi ua ta’ua foi le Agaga Paia o Lē Faamafanafana. Ou te fiafia i lena suafa ona o le Agaga Paia lea na aumaia ia te au le mafanafana. Sa maua ai e a’u se lagona lelei sili atu i fafo ma totonu.

O Le Agaga Paia o se faamanuiaga maoae. Vaavaai mo le mafanafana e aumai e le Agaga Paia ma taumafai ia faatasi ma oe i aso uma. ●

Faamafanafanaga mai le Agaga Paia

E tele auala e mafai ona e lagonaina ai le mafanafana mai le Agaga Paia. O lenei paso ua faaalia mai na o ni nai mea. E mafai ona e maua se auala i totonu o le paso?

AMATA

MAEA

Ata na tusia e Greg Newbold