Konafesi Aoao ia Oketopa 2019

O numera uma o itulau e maua mai le Liahonao Novema 2019.

Fautuaga mai ia Peresitene Nelson

I le taimi o le konafesi aoao, sa tuuina mai ai e Peresitene Russell M. Nelson ni fautuaga taua i Au Paia o Aso e Gata Ai.

Sa ia uunaia le autalavou e:

“Ia agavaa mo pepa faataga o le malumalu e tapulaa le faaaogaina” (“MalelegaFaaiu,” 121).
Manatua lana valaaulia “ia auai i le autau talavou a le Alii” e faapotopoto Isaraelu (“O Molimau, Korama a le Perisitua Arona, ma Vasega a Tamaitai Talavou,” 39).

Na ia fautuaina tamaitai e:

“E saili atu ia malamalama i mea e finagalo le Alii e te iloa ma faia,” ma “suesue ma le agaga tatalo i le vaega 25 o le Mataupu Faavae ma Feagaiga ma iloa po o a mea o le a aoaoina ai e le Agaga Paia oe.”
“Aveese lou taulaiga mai mea faalavefau o le lalolagi,” ma “malaga ai ma faaauau lenei faagasologa o le olaga atoa o le faapaiaina o lou olaga i le Alii.”
Aoao atu le aoaoga faavae a Iesu Keriso, ma tuuina atu “manatu i totonu o aufono a aiga, uarota ma siteki.”
Auauna atu, tatalo, anapogi, suesue i tusitusiga paia, auauna atu i le malumalu, ma faia galuega o talafaasolopito o aiga, o ia mea uma “o le a matala ai le lagi ia te outou.”
“Suesue ma le agaga tatalo upumoni uma e te maua e uiga i le mana o le perisitua,” e amata i le Mataupu Faavae ma Feagaiga vaega e 84 ma le 107. (Tagai i le “O Oa Faaleagaga,” 77, 79.)

Sa ia fautuaina tagata uma o le Ekalesia ina ia saunia mo le konafesi aoao ia Aperila 2020 i le:

Toe faitauina o le tala Iosefa Samita o le Uluai Faaaliga.
O le mafaufau loloto pe na faapefea e le Tusi a Mamona ma taualumaga ia na sosoo mai ma le Uluai Faaaliga ona faia se eseesega mo i tatou ma e pele ia i tatou.
Faia o vitio fou o le Tusi a Mamona o se vaega o a tatou suesuega faaletagata lava ia ma faaleaiga.
Filifilia o a tatou lava fesili, ma mamanuina a tatou lava fuafuaga, ma le faatofuina o i tatou lava “i le malamalama mamalu o le Toefuataiga.” (Tagai i le “MalelegaFaaiu,” 122.)

Auala e …

Faasoa atu ai le Talalelei

Ina ua oo mai i le faasoaina atu o le talalelei, sa fai atu e Sister Cristina B. Franco fesili nei ma fai atu i tagata o le Ekalesia, “O le tali i nei fesili uma o le ioe! E mafai ona tatou faia!

“E mafai ona tatou valaauliaina se uo e le auai i la tatou tapuaiga e o mai faatasi ma i tatou i le lotu i le Aso Sa?”
“Pe atonu e mafai ona tatou faasoa atu se kopi o le Tusi a Mamona i se tagata o le aiga po o se uo?
“E mafai ona tatou fesoasoani i isi ia maua o latou tuaa i le FamilySearch pe faasoa atu i isi mea na tatou aoaoina i le aluga o le vaiaso a o tatou suesueina le Sau, Mulimuli Mai ia te A’u?”
“E mafai ona tatou faapei atili o lo tatou Faaola, o Iesu Keriso, ma faasoa atu i isi mea o loo aumaia le olioli i o tatou olaga?

Sister Cristina B. Franco, Fesoasoani Lua i le Au Peresitene Aoao o le Peraimeri, “Mauaina o le Olioli i le Faasoaina Atu o le Talalelei,” 85.

Tofu Loloto

Savavali i le Ala o le Feagaiga

Ina ia tausia ia poloaiga sili e lua, na saunoa mai Peresitene Dallin H. Oaks, “tatou te savavali faapaleni ai i le va o le tulafono ma le alofa—tausia o poloaiga ma savavali i le ala o feagaiga, a o alolofa atu i o tatou tuaoi i luga o le ala. O lenei savaliga e manaomia ai lo tatou sailia o musumusuga faalelagi” (“O Poloaiga Sili e Lua,” 75). Matamata pe faitau lana saunoaga ma lauga a failauga nei mo le malosi i le ala o feagaiga:

O Elder Terence M. Vinson, o le na saunoa mai, “O le mea lea tatou te manaomia iinei o le faaitiitia o le Wi-Fi ae faatele Nifae!” (“O Soo Moni o le Faaola,” 9).
O Brother Stephen W. Owen, o le na uunaia i tatou e saili i le “fafagaina faaleagaga” e ala i le motusia mai le lalolagi ae fesootai atu i le lagi (“Ia Faatuatua, Ae Le o Le Lē Faatuatua,” 12).
O Sister Michelle Craig, o le na saunoa mai e uiga i “auala e fa e faateleina ai lou gafatia faaleagaga e maua ai faaaliga” (“Gafatia Faaleagaga,” 19).
O Elder Gary E. Stevenson, o le na saunoa mai, “E tatau ona faaauau pea ona tatou faamaoni ma mataala, aua ua na o le pau lea o le ala e iloatino ai le upumoni ma faalogo ai i le siufofoga o le Alii e ala mai i Ana auauna” (“Aua E Te Taufaasese Mai ia Te A’u,” 96).
O Peresitene M. Russell Ballard, o le na saunoa mai, “O se tasi o mea sili ona taua e mafai ona tatou aoaoina i lenei olaga o le ala e faamamafa atu ai lo tatou natura faaleagaga e faavavau ma pulea ai o tatou manaoga leaga” (“Tuu Atu i o Tatou Agaga e Pulea o Tatou Tino,” 109).
O Elder Peter M. Johnson, o le na aoaoina i tatou i le auala e mafai ai ona tatou manumalo i meafaigaluega e tolu a le fili: [o le] faasese, faalavefau, ma le faalotovaivai (“Mana e Faatoilalo ai le Fili,” 110– 2).