Faataitaiga Lototetele
O Le Miti a Atonio
Sa te’i Atonio ina ua ala ae i luga. O le taimi lona tolu lea ua ia faia ai le miti lava lea e tasi! I lana miti, sa faaali atu ai e se tamaloa umi ia te ia se fale matagofie. Faamata o le a lava lona uiga?
I le avea ai ma se faiaoga, sa asiasi atu Atonio i le tele o nofoaga i fafo atu o lona nuu i Nigeria. O le fale mai lana miti e le foliga lava i se mea sa ia vaai muamua i ai. Atonu e lē i ai moni lava lea mea. Ae sa i ai lava se mea faapitoa e uiga i ai.
A o mavae atu tausaga, sa mafaufau pea lava Atonio i lana miti, ae sa popole i isi mea. Sa amataina se taua i Nigeria. Sa le saogalemu mo Atonio ma lona toalua ma le fanau ona tuua lo latou fale. Ae sa faigata ona i ai i totonu i le aso atoa. Na misia e Atonio le vaai atu i ana uo ma tamaiti aoga.
I se tasi aso na maua ai e Atonio se mekasini tuai i lona fale. Ina ua ia tatalaina, sa ia vaaia se mea na foliga e masani ai. O le fale matagofie lea mai lana miti! E matuā moni lava.
O le fale e āna e Le Ekalesia a Iesu Keriso o le Au Paia o Aso e Gata Ai. Ou te lei faalogo muamua lava i lena Ekalesia, sa mafaufau ai Atonio. Sa manao o ia e aoao atili e uiga i ai, ae ona o le taua, sa le mafai ai lava ona ia tuua lona fale. E tatau ona ia faatali.
Ina ua iu ina uma le taua, sa auina atu e Atonio se tusi i le laumua o le Ekalesia i le aai o Sate Leki. Sa ia fesili atu pe latou te auina mai ni faifeautalai e aoao o ia ma lona aiga. “E mafai ona outou fausia la outou Ekalesia i lo’u taulaga?” Na tusi atu ai Atonio. “Faamolemole auina mai ia te au tusitusiga paia ina ia mafai ona ou aoao atu i isi tagata nuu.”
Sa faanoanoa Atonio ina ua ia maua se tusi mai le laumua o le Ekalesia: “I le taimi lenei e leai ni a matou faifeautalai i lo outou atunuu.” I aso na, o le toatele o tagata uli e le i mafai ona umia le perisitua. Ma e le i faatulagaina le Ekalesia i totonu o le tele o Aferika.
Ae sa lelei tele Atonio i le faatalitali i le taimi a le Alii. E ui lava e le i mafai ona ia papatiso i le taimi lena, ae sa ia faamalosia lona faatuatua.
Na auina atu e le Ekalesia ia Atonio ma lona aiga le Tusi a Mamona ma isi tusi a le Ekalesia. Sa suesue e Atonio ia tusi ma aoao atu mea na ia aoaoina i isi tagata nuu.
E matuā toatele tagata sa fiafia i le talalelei lea na manao ai Atonio i se nofoaga mo tagata uma e feiloai ai.
I luga o se auala sa laina i se togafa’i, sa fausia ai e Atonio se tamai falesa ma se faitotoa ma faamalama lanumoana. O le pito i luma o le fale sa faitauina, “Au Paia o Aso e Gata Ai i Nigeria.”
Na mavae atu tausaga. Ona oo lea i se tasi aso sa faalogo ai Atonio i se tala matagofie. Sa ta’u atu e le Atua i le perofeta e mafai e alii agavaa uma ona maua le perisitua. Sa auina atu e le Ekalesia ni faifeautalai i le nuu o Atonio!
Sa ofo faifeautalai i le maua ai o se fale lotu ma le toatele o tagata na saunia e papatiso. Sa maofa i laua i le faatuatua a Atonio ma isi tagata o le nuu.
“O se faatalitaliga umi, faigata,” sa ta’u atu ai e Atonio i faifeautalai, “ae e le afaina i le taimi lenei. Ua i’u lava ina outou o mai. ”
O Atonio o le tagata muamua na papatiso i le Vaitafe o Ekeonumiri i Nigeria. Ina ua faavaeina le paranesi fou, sa valaauina o ia e avea ma peresitene o le paranesi. O lona faletua, o Fidelia, sa Peresitene o le Aualofa. Sa faamauina faatasi i laua i le malumalu i tausaga e tele mulimuli ane.
Sa faaauau pea ona faasoa atu e Atonio lona faatuatua i isi. Sa masani ona ia ta’u atu i tagata e faapea o le fatu o le talalelei na totoina i Nigeria o le a tupu ae i se laau tele. O le a faateia le lalolagi i lona tuputupu ae.
Na sa’o lava Atonio. I le taimi nei ua silia ma le 170,000 tagata o le Ekalesia i Nigeria—ma se malumalu matagofie! O le fatu o le talalelei sa fesoasoani Atonio e totoina o loo faaauau pea ona tupu faataamilo i le lalolagi i le aso lenei. ●
Sa faaauau pea ona ou moemiti i se fale matagofie!
O le fale lenei na ou vaai i ai i a’u miti!
Sa ou fauina lenei falelotu laitiiti ina ia mafai ai ona maua se nofoaga e feiloai ai!
Ua i’u lava ina papatisoina!
Ata na tusia e Dilleen Marsh