O Le Ala Ou te Iloa Ai o le Perofeta Ua Valaauina ma Taitaia e le Atua

Saunia e Anne Vadly Louis

O la’u molimau e uiga i perofeta soifua na suia i le aso na asiasi mai ai se Aposetolo i Haiti.

E alala le tusitala i Haiti.

I le ola a’e ai i le Ekalesia, sa ou punouai ai lava i se taua o le iloaina o upumoni ma le tausia ia malosi o la’u molimau. Ou te manatua le tasi taeao o se aso Tofi i le seminare, sa aoao ai i matou e lo’u faiaoga e uiga i perofeta ma aposetolo. Sa ia ta’u mai se fasifuaitau e matua le mafai ona galo i lo’u mafaufau: “O Peresitene Thomas Spencer Monson [o le perofeta i le taimi lea] o se perofeta a le Atua. Ma o soo se tasi e i ai le manao ia iloa pe moni lenei mea e mafai ona tatalo faamaoni ia maua le tali.” Sa matuai ootia a’u i ana upu.

Ina ua ou taunuu i le fale i lena aso, sa ou tootuli ma ole atu ia Tamā Faalelagi e ta’u mai ia te au pe ua valaauina e Ia ia Peresitene Monson e avea ma perofeta. I lena taimi, sa ou lagonaina se olioli tele ma le matagofie na faatumulia ai a’u—o se mea e lēmafaamatalaina. Mai lava i lena aso, sa ou iloaina ai o le mafanafana na ou lagonaina i lena taimi na sau mai le Atua, ma na faamautuina ai lo’u faatuatua i le perofeta. Sa tuputupu ae lo’u alofa e oo i le tulaga na ou iloa ai ou te manaomia le taitaiga a le perofeta i lo’u olaga. E le mafai na ou ola e aunoa ma lana taitaiga. Sa ou manao i taimi uma ou te faalogo ma usitai i ana upu uma mai le konafesi aoao. Ina ua ou iloa e uiga i le maliu o Peresitene Monson i ni nai tausaga mulimuli ane, sa matuai ou faanoanoa lava, ona sa matua malosi lo’u alofa ia te ia.

Ina ua lagolagoina Peresitene Russell M. Nelson e avea ma perofeta fou, sa ou mafaufau pe o le a faapefea ea ona ou lagona se alofa tele mo ia e pei ona ou lagonaina mo Peresitene Monson! Ae na silafia e le Tamā Faalelagi le manao o lo’u loto, o le atiina ae lea o le alofa tele mo tamalii taitoatasi na te valaauina e taitai Lana Ekalesia. Ma ou te talitonu sa Ia finagalo ia ou faaauau pea ona maua ni aafiaga o le a mafai ai ona ou faia lena mea.

E lei leva ona valaauina Peresitene Nelson, ae ia auina atu ia Elder Dale G. Renlund o le Korama a Aposetolo e Toasefululua e feiloai ma le autalavou a Haiti. Sa ou fiafia lava i le manatu o le alu e vaai ia te ia. Sa ou fia iloa moni pe na valaauina moni o ia e le Atua.

Mauaina o le Upu Moni

Ina ua mavae se malaga umi, sa ou taunuu i le laumua o lo’u atunuu ma nofo ai i le maota na feiloai ai Elder Renlund ia i matou. Ina ua ia ulufale mai i le potu, sa ou lagonaina se filemu mafanafana na faatumulia ai lo’u fatafata. Sa amata lana saunoaga e ala i le faapea mai o Peresitene Russell M. Nelson lea na auina mai o ia e asi i matou. O le taimi lena na ou iloa ai na silafia e le Atua e tatau ona matou lagonaina le alofa ma le lagolago a le perofeta fou, ma sa Ia faatagaina i matou ia maua lena avanoa.

Ina ua talosagaina e Elder Renlund se volenitia e faitau le faatomuaga o le Tusi a Mamona i le vaega, sa matuai ou lagonaina le malosi o le Agaga—sa ou tu atu e aunoa ma lo’u iloaina o le mea sa ou faia. Sa ou savali atu i le tulaga ma tu latalata atu i le Aposetolo e faitau. Sa vave ona tatavale lo’u fatu, ma e le mafai ona ou faamatalaina i upu le malosi o le Agaga na ou lagonaina. Sa pei lava sa afio ai le Atua i totonu o le potu, ma o se lagona maoae e oo i ai. I lena taimi, na mou ese atu ai a’u fesili uma ma masalosaloga. Sa ou iloa o Elder Renlund o se Aposetolo moni lava na valaauina e le Atua. Sa ou lagonaina le alofa tele mo ia—ma mo le perofeta na auina mai o ia e saunoa mai ia i matou.

E tele naua le alofa o le Tamā Faalelagi ia i tatou e Na te faaali mai ai o Ia lava ma Lana taitaiga e ala i Ana taitai lelei. Ou te molimau atu o le perofeta ma aposetolo ua valaauina e le Atua, o loo mulimuli Peresitene Nelson i fautuaga ma faaaliga a le Atua, ma o le a ia taitaiina i tatou i taimi uma i le ala sao. Talu mai Iosefa Samita, na amata ai le galuega o le toefuataiina mai o le talalelei, ma o lena galuega o loo faaauauina pea i le asō. Ma a o tatou faia le mea sili tatou te mafaia e mulimuli ai i le fautuaga a o tatou perofeta ma faasoa atu le upumoni i isi, e mafai foi ona tatou auai i le Toefuataiga faaauau pea.