O Faamanuiaga o le Auai i le Ekalesia

O tausaga lenei ua tatou faamanatuina ai le 200 tausaga o le asiasiga a le Tamā ma le Alo ia Iosefa Samita. O le sefulu o tausaga talu ona maea le Uluai Faaaliga, sa faatulagaina ai Le Ekalesia a Iesu Keriso o le Au Paia o Aso e Gata Ai, ma tuuina atu ai sauniga, aoaoga o le talalelei, ma le pule o le perisitua e manaomia mo lo tatou faaolataga.

Peitai, a o faasolo ina faateleina le faalelalolagi o le lalolagi, e toatele tagata e tuufesili pe aisea e manaomia ai lotu ua faatulagaina. Latou te lagona e mafai ona latou latalata i le Atua i faatulagaga i fafo atu o se ekalesia. E ui lava e moni e mafai ona tatou lagonaina le Agaga o le Alii i le tele o nofoaga, ae o lenei lomiga o le Liahona ua suesueina ni nai mafuaaga na faatulagaina ai e le Alii Lana Ekalesia ma le auala ua taulai atu ai e Lana Ekalesia toefuataiina lo tatou aoaoina ma faateleina a tatou tali taitoatasi i Lona Agaga mo le lelei i o tatou aso.

E pei ona ou tusia i la’u tusiga i le itulau 24, o tagata o le Ekalesia ua mulimuli i le aoaoga a le Perofeta o Iosefa Samita e “fafaga i e fia aai, e faaofu i e ua le lavalava, … e faamafanafana i e mafatia, pe i lenei ekalesia, po o se isi lava.” I la’u galuega faatasi ai ma le Auaunaga Alofa a le Au Paia o Aso e Gata Ai, ua ou molimauina ai le tulaga maoae o foai ua faia e le Ekalesia i le silia ma le 100 o atunuu i tausaga taitasi. Faafetai i foai laiti mai tagata o le Ekalesia, o o tatou uso ma tuagane i le lalolagi atoa ua faamanuiaina i mea e manaomia o le olaga ma le tele o isi mea.

I le itulau e 12, o loo faamalamalama mai ai e Peresitene Dallin H. Oaks le mafuaaga e taitai ai e le Alii Lana Ekalesia e ala i perofeta ma aposetolo, ma i le itulau 18, o loo faasoa atu ai e Sister Jean B. Bingham, o sē ma te galulue faatasi i le au Peresitene Aoao o le Aualofa, se savali e uiga i le uunaiga a tamaitai ma le auala tatou te fesoasoania’i ai le tasi i le isi ia ausia o tatou gafatia faalelagi e ala i le galulue faatasi i le Ekalesia.

Ia faamanuia le Atua ia i tatou o ni tagata taitoatasi ma o se nuu e faaauau pea ona auauna atu i se auala e maualuga atu ma paia atu seia toe afio mai le Faaola.

Sister Sharon Eubank

Fesoasoani Muamua i le Au Peresitene Aoao o le Aualofa