Pe O E Loto Lava I Ai?
O lo tatou loto naunauta’i e mulimuli ia Iesu Keriso e faatatau tonu lava i le tele o le taimi tatou te tautino atu ai ia i ai i nofoaga paia.
I se tasi Aso Sa, a o sauniuni e tagofia le faamanatuga i le mavae ai o ni vaiaso o tofiga i konafesi faalesiteki, sa oo mai ai se manatu mata’ina i lo’u mafaufau.
A o amata ona faia e le ositaulaga le faamanuiaga o le areto, o upu sa faafia ona ou faalogo i ai muamua sa matuā mamafa lava i lo’u mafaufau ma le loto. “Ma molimau atu ia te oe, le Atua e, le Tamā Faavavau, latou te loto ina ave i o latou luga le suafa o lou Alo, ma manatua pea o ia ma tausi i ana poloaiga ua ia tuuina mai ia te i latou; ina ia latou maua pea lona Agaga e faatasi ma i latou.”1 Ua faafia ea ona tatou molimau atu i le Atua o loo tatou loto i ai?
A o ou mafaufau loloto i le taua o na upu paia, o le upu loto i ai ua faagaeetia ai lava a’u i lo se isi lava taimi muamua. E lē masino aafiaga matagofie ma paia na faafuase’i ona faatumulia ai lo’u mafaufau ma le loto, faatasi ma le alofa ma le lotofaafetai mo le taulaga togiola a le Faaola, atoa ai ma Lana matafaioi taua tele i le fuafuaga o le togiola a le Tama mo lo’u aiga ma a’u. Ona ou faalogo lea ma lagona upu ootia o le tatalo o le vai: “Ina ia latou molimau atu ia te oe … latou te manatua pea o ia.”2 Sa ou malamalama ma le manino i lena taimi o le tausiga o a’u feagaiga e tatau ona sili atu i lo na o ni faamoemoega lelei.
O le taumafa i le faamanatuga e le o se faiga masani faalelotu e faatatau i la tatou lava maliega. O se faamanatu mamana o le moni ma le tutotonu o le Togiola lē i’u a Keriso faapea ma le manaomia o le manatua pea o Ia ma tausi i Ana poloaiga. O le loto e taula’i atu i le Faaola e matuā taua tele ma o le savali tutotonu lea o mau e lua e sili ona ta’ua soo i le Ekalesia: o tatalo o le faamanatuga. O le malamalama i le upumoni o mea e matuā finagalo le Tama Faalelagi e ofo mai ia i tatou ta’itoatasi e ala mai i Lona Alo e Toatasi na Fanaua e tatau ona faamatua’ia ai a tatou taumafaiga silisili e loto e fai i taimi uma mea e finagalo ai o Ia.
Pe o fausia mausali ea lo tatou lava faavae faaleagaga ia Iesu Keriso?
Afai e papa’u pe faatagāfai lo tatou faavae faaleagaga, atonu tatou te ono fua lo tatou loto naunauta’i i se iloiloga faaagafesootai pe alofagia pe itagia i tatou e tagata, po o se fua o le a tupu ai se mea lē talafeagai ia i tatou. Ma afai tatou te taliaina ni manatu taatele e faapea e na o aiaiga faavae pasiā po o aiaiga e faatiga ma lē fiafia ai se vaega o tagata, ni tapu lē moni faaletagata lava ia, ma ni tautinoga i taimi e i ai i le Ekalesia, o lona uiga la, o a tatou faai’uga e uiga i le loto naunautai o le a tutusa lelei le faaletonu. E lē tatau ona tatou faamoemoeina le mataupu faavae o le loto naunauta’i e nini faatasi lelei ma tagata faatosina o ala o faasalalauga faaagafesootai po o tagata fai Tik Tok. O manatu o tagata e seāseā ogatusa ma upumoni paia.
O le Ekalesia o se nofoaga e potopoto ai tagata lē atoatoa e alolofa i le Atua ma o ē e loto e mulimuli i le Alii o Iesu Keriso. O lena loto ua maua’a i le mea moni e faapea o Iesu o le Keriso, o le Alo o le Atua soifua. O lenei upumoni paia ua na o le mana o le Agaga Paia e iloa ai. O le mea lea, o lo tatou loto naunauta’i e faatatau tonu lava i le tele o le taimi tatou te tautino atu ai ia i ai i nofoaga paia i le mea o loo i ai le uunaiga a le Agaga Paia.
O le a lelei atu ona tatou faia pe a tele atu se taimi e faaalu i ni talanoaga anoa e talanoaina ai o tatou popolega faatasi ma lo tatou Tama i le Lagi e alofa ia i tatou, ae faaitiiti le taimi e saili ai manatu o isi tagata. E mafai foi ona tatou filifili e sui a tatou talafou i aso taitasi i afioga a Keriso i tusitusiga paia ma i upu faavalo’aga a Ana perofeta soifua.
O le taūa tatou te tuu i luga o lo tatou tausiga o le aso Sapati, totogiina o se sefuluai ma le faamaoni, umiaina o se pepa faataga o le malumalu o loo aoga, auai i le malumalu, ma le faamamaluina o a tatou feagaiga paia o le malumalu, o faailo mamana uma ia o lo tatou loto i ai ma le faamaoniga o lo tatou tautinoga. Pe o tatou loto ea e tuu atu ni mea e sili atu nai lo o se taumafaiga faatagāfai i le faamalosia o lo tatou faatuatua ia Keriso?
E alofa atoatoa le Tama Faalelagi ia i tatou, ae o lena alofa e oo mai faatasi ma ni faamoemoega sili. Ua Ia faamoemoeina i tatou ia tuu le Faaola ma le loto i ai i le totonugalemu o o tatou olaga. O le Faaola o lo tatou faataitaiga atoatoa lea o le loto e usiusitai i le Tama i mea uma. O Ia “o le ala, le upumoni, ma le ola.”3 Sa Ia togiolaina a tatou agasala ma le loto i ai. Na te faamāmāina a tatou avega, faato’afimalie o tatou popolega, foai mai ia i tatou le malosi, ma aumai le filemu ma le malamalama’aga i o tatou loto i taimi o faanoanoaga ma le faavauvau.
Ae o le faatuatua ia Iesu Keriso o se filifiliga. “E tusa pe ua lē mafai ona [tatou] faia o se isi lava mea nai lo le fia talitonu”4 i Ana afioga, ae ua i ai sa tatou amataga e amata ai pe toe faatulaga ai la tatou faigamalaga o le faatuatua. O Ana afioga, pe afai e totoina i totonu o o tatou loto e pei o se fatu ma tausi ma le faaeteete tele, o le a maua’a, ma o le a tupu a’e lo tatou faatuatua i le mautinoa ma avea ma se mataupu faavae o le faatinoga ma le mana. O le Tusi a Mamona o le tatou punaoa sili lea ona mamana mo le faatupuina ma le toefuataiina o lo tatou faatuatua. O le loto [e usitai] o le pogai lea o le faatuatua.
O le olaga faaletino, e ala i le mamanu faalelagi, e lē faigofie, ma e i ai taimi e mafai ona lofituina ai. Peitai, “ua [tatou] i ai ina ia [tatou] maua le olioli”!5 O le taulai atu i le Faaola ma a tatou feagaiga paia e aumai ai le olioli tumau! O le faamoemoega o le olaga faitino o le tofotofoina lea o lo tatou loto naunautai. “O le galuega sili o le olaga [ma le tau o le avea ma soo] o le iloa lea o le finagalo o le Alii ona faia lea.”6 O le avea ma soo moni e taitai atu i se atoatoaga o le olioli. Ua tatou loto ea e totogi le tau o le avea ma soo?
O le ala o feagaiga e le o se lisi faigofie o mea e fai; o se faagasologa o le tuputupu a’e faaleagaga ma le faalolotoina o le tuuto atu ia Iesu Keriso. O le faamoemoega autu lava o poloaiga, mataupu faavae, feagaiga, ma sauniga uma o le fausiaina lea o le faatuatua ma le faalagolago ia Keriso. O le mea lea, o lo tatou naunauta’iga e faatutotonu o tatou olaga ia Keriso, e tatau ona faifai pea—e lē fua i ni tuutuuga, fua i tulaga, pe faatagāfai. E le mafai ona tatou faia ai ni aso malolo po o ni taimi patino e toma ai mai lo tatou loto naunauta’i e “tutu o ni molimau a le Atua i taimi uma ma i mea uma, ma i nofoaga uma.”7 O le avea ma soo e lē taugofie, ona o le mafutaga a le Agaga Paia e taugatā.
E mautinoa lava, sa mafaufau le Alii i o tatou aso e pei ona Ia aoao mai le faataoto i taupou e toasefulu. E uiga i taupou popoto e toalima sa Ia fetalai ai ua latou “ave le Agaga Paia mo o latou taiala, ma sa lei faaseseina,”8 ae o lamepa a ē valelea “ua mamate” aua ua leai se suauu.9 Masalo o upu a Nifae e sili ona faamatalaina ai nei tagata sa avea muamua ma ni tagata faatuatua o le Ekalesia: “Ma o isi o le a faaōleōle e ia, ma faamoemoe malie ese atu i latou i le saogalemu faaletino, o le a latou fai mai: Ua lelei mea uma i Siona.”10
O le saogalemu faaletino e saili atu ma faalagolago i mea faalelalolagi nai lo Keriso—i nisi upu, o le vaai atu lea i tioata faaletino nai lo tioata faaleagaga. E aumai e le Agaga Paia ia i tatou le gafatia e vaai ai i “mea e pei ona i ai moni lava, ma … e pei o le a i ai moni lava.”11 Ua na o “le mana o le Agaga Paia [e mafai ona tatou] iloa ai le moni o mea uma lava”12 ma lē faaseseina ai. Tatou te tuu Keriso i le totonugalemu o o tatou olaga ma tuuto atu o tatou loto e usiusitai i Ana poloaiga, e lē faapea ona ua tatou tauaso ae ona ua mafai ona tatou vaai.13
Ae faapefea taupou valelea? Aisea na latou lē loto ai e tauave se ipu o le suauu faaleagaga? Pe sa latou faatuutuu? Masalo, pe sa latou faasamasamanoa tele ona sa le’i talafeagai pe sa foliga mai sa lē manaomia. Po o le a lava le mafuaaga, sa faaseseina i latou e uiga i le matafaioi taua a Keriso. Sa avea lava lenei mea ma taufaaseseega autu a Satani, ma le mafuaaga na ala ai ona i’u ina mamate a latou lamepa o molimau ona ua leai se suauu faaleagaga. O le faataoto o se talafaatusa lea faaonapo nei mo o tatou aso. E toatele lava ua leva ona tuua le Faaola ma a latou feagaiga ae mulimuli ane latou tuua Lana Ekalesia.
Ua tatou ola i taimi tulagaese ua leva ona valo’ia e perofeta anamua, o se aso e sasao ai Satani “i loto o le fanauga a tagata, ma faaoso i latou ia feita e faasaga i mea lelei.”14 E anoano i tatou o loo ola i se lalolagi faatekinolosi i luga o le initoneti ua matuā faatumulia i faafiafiaga ma talanoaga e fete’ena’i i le faasinomaga paia ma talitonuga ia Keriso.
O le faatosinaga faaleagaga aupito sili ona mamana i le olaga o se tamaitiiti o le faataitaiga amiotonu a ni matua ma matua matutua alolofa o ē tausia ma le faamaoni a latou lava feagaiga paia. O matua mataāla e aoao latou fanau i le faatuatua i le Alii o Iesu Keriso, ina ia latou “iloa … po o le a le puna e mafai ona latou tepa taulai i ai mo se faamagaloga o a latou agasala”15 O le tausiga faasamasamanoa ma le femoumoua’i o feagaiga e taitai atu ai i le faatama’iaga faaleagaga. O le faatama’iaga faaleagaga e tele ina mamafa i luga o a tatou fanau ma fanau a fanau. Matua ma matua matutua, pe o tatou loto pea i ai?
Na aoao mai Peresitene Russell M. Nelson, “I aso a sau, o le a lē mafai ona ola ai faaleagaga e aunoa ma le taiala, taitaiga, faamafanafanaga, ma le faatosinaga faifai pea a le Agaga Paia.”16 O se lapataiga manino ma le lē mafaaseseina lenei ina ia tapena a tatou lamepa ma faateleina a tatou suauu faaleagaga e faaleoleo. Pe o tatou loto pea e mulimuli i perofeta soifua? O le a le maualuga o le suauu faaleagaga o i lau lamepa? O a suiga i lou olaga patino o le a mafai ai ona e maua pea le uunaiga a le Agaga Paia?
O ona po nei, e pei o ona po o Iesu, o le a i ai i latou o le a toe foi i tua, ua lē loto e talia le tau o le avea ma soo. A o faatuputeleina faitioga pa’a’ā ma inosia e faasaga i le Ekalesia a le Faaola ma i latou o ē mulimuli ia te Ia, o le a manaomia se loto naunautai sili atu e faasa’o ma faamalosia ai o tatou tuasivi faaleagaga ma ‘aua le amana’iaina na mea.17
Afai e fausia mausali lo tatou faavae faaleagaga ia Iesu Keriso, o le a tatou lē pa’u’u, ma e lē manaomia ona tatou fefefe.
“Faauta, e manaomia e le Alii le loto ma le mafaufau malie; ma o ē e loto malilie ma usiusitai o le a ʼaia le lelei o le laueleele o Siona i aso nei e gata ai.”18
Tau ina ia tatou loto pea i ai e le aunoa. I le suafa paia o Iesu Keriso, amene.