Konafesi Aoao
Ia Avea le Faia o Mea Lelei ma a Tatou Mea Masani
Konafesi aoao ia Oketopa 2022
9:28

Ia Avea le Faia o Mea Lelei ma aTatou Mea Masani

Saunia e Elder Rafael E. Pino

O Le Fitugafulu

Afai tatou te tutumau ma le le masii ese i le faia o mea lelei, o le a fesoasoani a tatou agaifanua ia i tatou e tumau ai i luga o le ala o feagaiga.

O le a ou faafetai pea mo o’u tofiga i le Ekalesia ua ave ai a’u e nofo i atunuu eseese. Ua matou maua i nei atunuu taitasi se eseesega tele ma ni tagata tulaga ese e eseese agaifanua ma tu ma aga masani.

E tofu uma i tatou ma agaifanua ma tu ma aga masani e patino, mai o tatou aiga, pe mai nuu o loo tatou nonofo ai, ma e tatou te faamoemoe e tausia i latou uma e ogatusa ma mataupu faavae o le talalelei. O agaifanua ma tu ma aga masani faagaeetia e taua i a tatou taumafaiga e tumau ai i le ala o feagaiga, a o tu ma aga o loo avea ma faalavefau, e tatau ona tatou teena.

O se agaifanua o le faiga masani po o le auala faifai soo ma masani ai o le mafaufau mo se tagata, aganuu, po o se tu masani. E masani lava, o mea tatou te mafaufau i ai ma faia i se auala masani tatou te iloa ai o ni mea masani.

Faataga mai a’u e faapupula atu lenei mea: O Patricia, lo’u toalua pele, e fiafia e inu le sua o le niu ona ‘ai lea o le aano. I le taimi o le ma asiasiga muamua i Puebla, Mekisiko, sa ma o ai i se nofoaga sa ma faatauina ai se niu. Ina ua uma ona inu le sua, sa fai atu lo’u toalua ia i laua e ta’e le niu ma aumai le aano ia te ia e ‘ai. Ina ua aumai, ua mumū. Sa latou lulu i ai se polofeū. Niu suamalie ma le polofeū! Sa foliga ese tele ia i ma’ua. Ae mulimuli ane, sa ma iloa ai o tagata ese o i ma’ua ma lo’u toalua, o e sa le’i ‘aia se aano niu ma se polofeū. Peitai, i Mekisiko, e le o se mea e seasea tupu; o se mea ua masani tele ai.

I se isi taimi sa matou aai ai i Pasila ma ni uo, ma sa latou laulauina mai ia i ma’ua ni avoka. A o ma sauni e saasaa i ai le masima, ae sa fai mai a ma uo, “O le a le lua mea na e fai? Ua uma ona tuu i ai le suka i luga o avoka!” Avoka ma le suka! Sa matuai foliga ese lava ia i ma’ua. Ae na ma iloaina foi o i ma’ua ma lo’u toalua e ese aua ma te le ‘aia se avoka ua faasuka. I Pasila, o le avoka e lulu i ai le suka o se mea masani.

O le mea e masani ai nisi atonu e ese i ni isi, e faalagolago i a latou agaifanua ma tu masani.

O a agaifanua ma tu ua masani ai i o tatou olaga?

Na saunoa mai Peresitene Russell M. Nelson: “O le asō e masani ona tatou faalogo ai e uiga i ‘se mea fou masani.’ Afai e te manao moni lava e opogi se taeao fou, ou te valaaulia oe ia faateleina le liliu atu o lou loto, mafaufau, ma le agaga i lo tatou Tama Faalelagi ma Lona Alo, o Iesu Keriso. Ia avea lena ma ou tulaga masani fou” (“O Se Mea Fou e Masani Ai,” Liahona, Nov. 2020, 118).

O lenei valaaulia e mo tagata uma. E le afaina pe tatou te matitiva pe mauoa, aoaoina pe lei aoaoina, matutua pe laiti, mama’i pe maloloina. Ua Ia valaaulia i tatou e tuu mea masani i o tatou olaga lea e fesoasoani e faatumauina ai i tatou i luga o le ala o feagaiga.

E leai se atunuu o i ai le aofaiga atoa o mea lelei pe faamemelo i ai. O lea mea lea, e pei ona aoao mai e Paulo ma le Perofeta o Iosefa Samita:

“Afai o i ai nisi mea e mama, matagofie, pe logoleleia pe tauleleia, matou te saili atu i nei mea” (Mataupu Faavae o le Faatuatua 1:13).

“Afai e i ai se viiga, mafaufau i nei mea” (Filipi 4:8).

Ia matau o se apoapoai lenei, ae le na o se manatu faamatala.

Ou te manao ia i tatou uma ia faaalu sina taimi e mafaufau loloto ai i a tatou agaifanua ma le auala o loo tosina ai o tatou aiga.

Faatasi ai ma mausa ofoofogia e tatau ona avea ma mea masani mo tagata o le Ekalesia, o mausa nei e fa:

  1. Suesuega faaletagata lava ia ma faaleaiga o tusitusiga paia. Ina ia liua i le Alii o Iesu Keriso, e nafa tagata taitoatasi ma le aoaoina o le talalelei. O matua e nafa ma le aoao atu o le talalelei i a latou fanau (tagai i le Mataupu Faavae ma Feagaiga 68:25; 93:40).

  2. Tatalo faaletagata lava ia ma faaleaiga. Ua poloaiina i tatou e le Faaola ia tatalo e le aunoa (tagai i le Mataupu Faavae ma Feagaiga 19:38). O le tatalo e mafai ai ona tatou fesootai patino atu i lo tatou Tama Faalelagi i le suafa o Lona Alo, o Iesu Keriso.

  3. Auai i sauniga faamanatuga faalevaiaso (tagai i le 3 Nifae 18:1–12; Moronae 6:5–6). Tatou te faia ina ia manatua ai Iesu Keriso a o tatou tagofia le faamanatuga. I lenei sauniga, e faafou ai e tagata o le Ekalesia a latou feagaiga o le tauaveina i o latou luga o le suafa o le Faaola, o le manatua pea o Ia, ma le tausia o Ana poloaiga (tagai i le Mataupu Faavae ma Feagaiga 20:77, 79).

  4. Auai i galuega o le malumalu ma talafaasolopito o aiga O lenei galuega o le auala lea o le tuufaatasia ma le faamauina o aiga mo le faavavau (tagai i le Mataupu Faavae ma Feagaiga 128:15).

O a ni o tatou lagona pe a tatou faalogo i nei mea e fa? Po o avea ea na mea ma vaega o o tatou olaga masani?

E tele isi tu masani e mafai ona avea ma se vaega o mea masani ua tatou vaetamaina, o lea ia faamuamua ai le Atua i o tatou olaga.

E mafai faapefea ona tatou fuafuaina po o a mea masani i o tatou olaga ma i o tatou aiga? I tusitusiga paia, tatou te maua ai se faataitaiga sili; i le Mosaea 5:15 o loo faapea mai: “Ou te manao ia outou tutumau ma lē masiiese, ma faatumulia i galuega lelei i taimi uma.”

Ou te fiafia i nei upu aua ua tatou iloa o mea e avea ma mea e masani ai i o tatou olaga o upu na tatou te toe faia pea lava pea. Afai tatou te tutumau ma le le masii ese i le faia o mea lelei, o le a ogatusa a tatou agaifanua ma mataupu faavae o le talalelei, ma o le a fesoasoani ia i tatou e tumau ai i luga o le ala o feagaiga.

Na fautua mai foi Peresitene Nelson: “Ia opogi au mea masani fou e ala i le salamo i aso taitasi. Saili ia faateleina le mamā i mafaufauga, upu, ma amioga. Auauna atu i isi. Ia tausisia se vaaiga e faavavau. Faalautele ou valaauga. Ma po o a lava ou luitau, o’u uso e ma tuafafine pele, ola i aso taitasi ina ia e saunia atili e feiloai ma lou Foafoa” (“A New Normal,” 118).

O lenei la e le o se mea e ese ai le ma ‘aai ai ma lo’u toalua, o Patricia o le aano ma le polofeū ma le avoka ma le suka—o le mea moni, ma te fiafia i ai. Peitai, o le faaeaga o se mea e sili atu ona maoae nai lo o se tulaga o le tofo; o se autu e faatatau i le faavavau.

Ou te tatalo ina ia mafai e lo tatou tulaga masani ona faatagaina i tatou e iloa lena tulaga o le “fiafia e le gata” lea ua folafola mai ia i latou o e tausia poloaiga a le Atua (Mosaea 2:41) ma a o faia lena mea, atonu o le a mafai ona tatou faapea atu, “Ma sa oo ina matou ola e tusa ma le ala o le fiafia” (2 Nifae 5:27).

O’u uso e ma tuafafine, ou te molimau atu i tamalii e toa 15 o e ua tatou lagolagoina o ni perofeta, tagatavaai, ma talifaaaliga, e aofia ai ma la tatou perofeta pele, o Peresitene Russell M. Nelson. Ou te molimau atu e moni le Ekalesia a Iesu Keriso o le Au Paia o Aso e Gata Ai. Ou te molimau faapitoa atu o Iesu Keriso, o lo tatou Faaola ma le Togiola, i le suafa o Iesu Keriso, amene.