FAASAIENISI ma la Tatou Sailiga mo le Upumoni
E alala le tusitala i Iuta, ISA.
E leai se mea e popole ai pe afai e foliga mai e i ai se feteenaiga i le va o lou malamalama o le talalelei ma mea ua e aoaoina i le saienisi.
E mafai ona e vaai faalemafaufau i le alu i le fomai o le pau ma se tulaga leaga o fuafua ae ta’u atu o le togafitiga o le mitiina mai o se vaega o lou toto? E mafai ona foliga mai e faavalevalea ia te oe, ae e semanu e le faigata tele le talitonu i ai i le lua seneturi ua mavae. I lena taimi, o le aveese mai o se aofaiga tele o le toto sa o se togafitiga laugatasia mo soo se tulaga faafomai, e aofia ai le manava mamau, le lelei le mafaufau, ma e oo lava foi i fuafua. E leai se tasi na fesiligia lena mea. Aisea o le a latou faia ai? Ma le isi, o le aveesea mai o sina toto sa faaaoga mo le faitau afe o tausaga e le tele o aganuu eseese.
Faatoa amata ona fesiligia le galuega faafomai ina ua amata e fomai ona vaai i vailaau mai se vaaiga faasaienisi. Ina ua iu lava ina suesueina lelei le aveesea o le toto mai le tino, na taofia loa e fomai le toe faaaogaina mo tagata uma sei vagana ai ni tulaga faafomai faapitoa.1
Mai lenei faataitaiga o le talafaasolopito, ua tatou iloa ai ona o se talitonuga ua taliaina lautele po o ua leva ona i ai e le faapea ai e moni. Ma ua tatou vaai ai e mafai ona avea le saienisi ma se meafaigaluega maoae e faailoa ai le mea moni.
Mo le Au Paia o Aso e Gata Ai, o se mea tele lava. E le gata o le iloaina o le meamoni e tuuina mai ai ia i tatou se faavae sili atu ona lelei mo le faia o filifiliga moni (“Leai, ou te le tuuina atu lou toto e aveese i le aso, faafetai!”), ae e faaopoopo foi i lo tatou malamalama o le talalelei. E pei ona aoao mai Peresitene Polika Iaga (1801–77), “E leai se upumoni e le a le Ekalesia ia. … Afai e te maua le upumoni i le lagi [po o] le lalolagi … o loo maua i a tatou mataupu faavae.”2
O Le Aisea e Faasaga i le Pe Faapefea
O le mea moni, pe a tatou talanoa e uiga i le auala e saofaga ai le saienisi i le upumoni ua tatou iloa, e tatau ona tatou mautinoa ua tatou malamalama i le ituaiga o upumoi e faailoa mai e le saienisi—ma le ituaiga na te le mafaia. O se tasi o auala e vaai i ai o le fesili atu lea po o a ituaiga o fesili e mafai e le saienisi ona tali ae o a fesili e le mafai ona taliina.
Ua faamatalaina e Sister Ellen Mangrum, na suesue i le faaenisinia tauvailaau i le Inisitituti o Rensselaer Polytechnic i Niu Ioka, ISA, i le auala lenei: “O le Saienisi e faamalamalama mai le faapefea. Ae e le mafai ona faamalamalamaina le faamoemoega e tutupu ai mea.” Sa ia faaopoopo mai o mataupu faalelotu na e faamatalaina le aisea, e pei o le mafuaaga na foafoaina ai le lalolagi ma pe aisea ua tuu ai i tatou iinei.
Na talitonu foi le Siamani lauiloa faapitoa i le fesootaiga o mea faaletino o Albert Einstein faapea o mataupu faalelotu ma le saienisi e i ai ni faamoemoega e eseese, ae galulue felagolagomai.
“O le saienisi e na ona mafai ona iloa po o le a se mea, ae le iloa le mea e tatau ona i ai,” na ia tusia ai. “I le mea e le o i ai le [saienisi], o faamasinoga taua o mea uma e tumau le talafeagai.”3
O le a le uiga o lena mea i Au Paia o Aso e Gata Ai? Muamua, ua tatou iloa o le a tumau le fesuisuiai o le malamalama faasaienisi. I mea uma, o le saienisi o lona uiga o le taumafai e saili ni auala e sili atu ona lelei e malamalama ai i “pe faapefea” o le lalolagi o siomia ai i tatou. O le iloaina o lena mea, e le manaomia ona tatou vaai atu i le suesuega aupito lata mai ina ia malamalama ai i “aisea” po o “mea e tatau” o le olaga. E mafai ona tatou faalagolago i le talalelei le masuia a Iesu Keriso e fesoasoani ia i tatou e faia faaiuga i le va o le sa’o ma le sese.
E Fetaui Uma
Na talanoa mai Peresitene Russell M. Nelson, o le Peresitene o le Korama a Aposetolo e Toasefululua ma o se fomai tipitipi lauiloa o le fatu, e uiga i le ala e fetaui lelei ai mataupu faalelotu ma le saienisi.
“E leai se feteenaiga i le va o le saienisi ma mataupu faalelotu,” o lana tala lea. “O le feteenaiga faatoa tulai mai i se malamalama le atoatoa o le saienisi po o mataupu faalelotu, po o vaega uma e lua. … Pe maua mai le upumoni mai se falesuesue faasaienitisi po o faaaliga mai le Alii, e galulue feoeoeai.”4
O lea afai na i ai ni au fesili pe faapefea ona fetaui lelei tausaga o le lalolagi po o tainasoa po o le tupuaga o le lalolagi po soo se isi lava mea na e aoaoina i se vasega o le saienisi i le talalelei, manaia tele! E fetaui lelei uma lava, ae o loo i ai pea le tele o fesili aua o loo i ai lava le tele o mea o loo tatou aoaoina. Na fai mai uso Brian Down, o se saienitisi o vailaau i Quebec, Kanata, o loo ia vaai atu i luma i le taimi o le a faaalia ai mea uma ia i tatou (tagai i le MF&F 101:32–34).
I le taimi nei, “o loo i ai lo tatou tapulaa i lo tatou mafaia ona malamalama i mea lilo uma o le lalolagi o siomia ai i tatou e ala i taumafaiga faasaienitisi,” o lana tala lea. “E faapena foi, o loo i ai lo tatou tapulaa i lo tatou malamalama i mea lilo a le Atua ma Lana fuafuaga sili mo Lana fanau.”
E leai se mea e popole ai la, pe afai e foliga mai e i ai se feteenaiga i le va o lou malamalama o le talalelei ma mea ua e aoaoina e ala i le saienisi. O le mea moni, e leai se mea e faaalia e le saienisi e mafai ona ta’u sese lou faatuatua.
O lea afai e te fiafia i le saienisi, aoao mea uma e te mafaia e uiga i lou eria e fiafia i ai! O lou faatuatua e mafai lava ona tuuina atu ia te oe se mea e sili atu. Ua saunoa mai Brother Richard Gardner, o se polofesa faaolioli o le saienisi o le natura i le Iunivesite o Virginia i Saute, faapea o lona faatuatua i le talalelei a Iesu Keriso na avea ma se fesoasoani tele ia te ia.
“E i ai taimi pe a faigata sailiiliga, ma na leai se mea na foliga mai e sao—o sailiiliga e tele ina faapena—o le i ai o se vaaiga i faamanuiaga o le talalelei na fesoasoani ia te au e ausia ai,” o lana tala lea.
E lagona foi e Brother Down o lona faatuatua na fesoasoani ia te ia i lana galuega i le saienisi.
“Ou te galue lava i taimi uma ma le faatuatua faapea sa i ai manatu poto ma le faatulagaga i mea uma, ma afai ou te tulitulimatagauina se fesili ia lava le umi ma le malosi, o le a iu lava ina tatala mai e le Tama Faalelagi lo’u mafaufau i le tali,” o lana tala lea.
Olioli i le Mauaina o le Faasaienisi
E mafai foi e lo tatou faatuatua ia Keriso ma Lana talalelei ona fesoasoani ia i tatou e tumau i le lotomaualalo ma talia le upumoni o loo matou saili i ai, pe o le poto faasaienisi po o le faaleagaga.
“E tele mea tatou te le iloa i le saienisi, ma ni mea se tele e uiga i le Atua Na Te lei faaalia mai,” o le tala lea a Polofesa Gardner. “O lea e taua ai le faatumauina o se mafaufau e taliaina nisi faamatalaga e oo mai ia i tatou, ma aua le popole i le taimi lea.”
Mo se faataitaiga, o nisi tagata e faigofie lava le talitonu i le Atua aua latou te iloa e leai se isi faamalamalamaga mo mea na latou matauina o le lalolagi. E taua lenei mea o le talitonu i se “Atua mo fesili e leo taliina”, ma e mafai ona maua ai e tagata le lagona popole e uiga i mea e mauaina i le faasaienisi. Ua tuuina mai e Polofesa Gardner se faataitaiga:
“O nisi tagata ua talitonu i le Atua ona o loo i ai ni avanoa i le faamaumauga o le tupuaga (o lona uiga, ia i latou, o le tupuaga o le olaga anamua e le mafai ona faamalamalama maia pe na faapefea ona tatou oo mai iinei). Ae o le a se mea e tupu i lo tatou faatuatua pe a tapunia nei avanoa i le mauaina o ni faamatalaga fou e faamaonia ai ni tali talafeagai? Nai lo lena, e tatau ona tatou maua se faamaoniga lelei o le Atua, e ala i le Agaga Paia, ona mafai ai lea ona tatou olioli i soo se mea fou faasaienitisi e maua nai lo le popole e uiga i ai.”
Pe a tatou faia lenei auala, tatou te manatua o le saienisi ma le mataupu faalelotu e mafai ona fesoasoani ia i tatou i la tatou sailiga mo le upumoni, ma e, iu lava, o na upumoni uma e sau mai le punavai lea e tasi: le Atua.
“E mafai e le Atua ona faaali mai soo se mea e finagalo i ai o Ia, e aofia ai uma mea moni faasaienitisi,” o le tala lea a Polofesa Gardner. “Ma e i ai moni lava ni Ana saienitisi musuia, tagata suesue, ma enisinia—ae Na te le soona tuuina mai ia i latou tali uma. E finagalo o Ia ia i latou, ma i tatou, e faaaoga o tatou mafaufau, o lea Na te faatagaina ai i tatou e galulue i le saienisi, ma o Ana faaaliga i le Ekalesia ua i ai, nai lo lena, e uiga i le auala e faatulaga ai le Ekalesia, aemaise lava le auala tatou te mafai ai ona o mai ia Keriso ma faaolaina.
“O Ana faaaliga patino ia i tatou atonu o soo se mataupu, ae faapitoa lava ia tatou iloa ai o loo soifua o Ia ma e alofa ia i tatou, o Keriso e faataunuuina le ata o le faaolataga, o loo i ai sa tatou perofeta soifua i le taimi nei, e mafai ona tatou mulimuli i le fuafuaga a le Atua, ma e matuai aoga tele lava le faia o lena mea.”