O Loo Saunoa Mai Perofeta ma Aposetolo i le Asō
Lagolago le Saolotoga o Tapuaiga
Asiasi i le news.lds.org mo se faaopoopoga o tala fou ma mea e tutupu i le Ekalesia.
E tatau ona galulue faatasi tagata i atunuu uma ina ia faalauiloa atu le saolotoga o tapuaiga, o taitai o le Ekalesia ua saunoa mai pea lava pea.
“O tagata o le Ekalesia e saili ia fatuina ni manatu alofa i tagata o talitonuga faalelotu uma, talitonuga faaupufai, ma ituaiga tagata uma,” na saunoa ai Peresitene Dieter F. Uchtdorf, Fesoasoani Lua i le Au peresitene Sili, i le John A. Widtsoe Religious Symposium i le University of Southern California i Los Angeles, Kalefonia, ISA, ia Aperila 2015.
“O le taumafaiga e tia’i ese tu ma aga masani o le le talitonuina ma le agaleaga ae vaai moni atu i le tasi i le isi ma se vaaiga fou—vaai i le tasi ma le isi e le o ni tagata ese po o ni fili, ae o ni tagata malaga, uso e ma tuafafine, ma fanau a le Atua—o se tasi o mea e sili ona faigata ae i le taimi lava e tasi e sili le tauia ma o ni aafiaga faamamaluina o lo tatou olaga faaletagata,” na saunoa mai ai Peresitene Uchtdorf. O lana saunoaga o se tasi o nai talosaga mo le faaaloalo ma le malamalama na faia talu ai nei e perofeta ma aposetolo.
“E tatau ona leai se uiga saua i le va o mataupu faalelotu ma malo,” le saunoaga a Elder Dallin H. Oaks o le Korama a Aposetolo e Toasefululua i le Court/Clergy Conference i le Congregation B’nai Israel i Sacramento, Kalefonia, ISA, ia Oketopa 2015. “Tatou te faiaina uma lava pe a manumalo se siosiomaga o le ita po o le tetee po o le finauga,” o lana saunoaga lea.
“O malo ma a latou tulafono e mafai ona tuuina atu le puipuiga taua mo tagata talitonu ma faalapotopotoga faalelotu ma a latou gaoioiga,” na ia saunoa ai, ma matauina o mataupu faavae faalelotu, aoaoga, ma faalapotopotoga “e mafai ona fesoasoani e fausia tulaga ia e mafai ona faamanuiaina ai tulafono faalauaitele ma sosaiete a le malo ma o latou tagatanuu,” ina ia mafai e tagata uma ona “soifua faatasi i le fiafia, lotogatasi, ma le filemu.”
Na saunoa atu foi Elder Oaks e uiga i le saolotoga o tapuaiga faalelotu i se faapotopotoga i Atenitina (tagai i le “Tala Fou o le Ekalesia,” Liahona, 2016 Ian., 16).
Na lauga atu Elder Jeffrey R. Holland o le Korama a Aposetolo e Toasefululua i le All-Party Parliamentary Group on Foreign Affairs in the House of Lords i Lonetona, Egelani, ia Iuni 2015. “E ala i le talosagaina o tulaga faatauaina o se tasi,” na ia saunoa ai, “o tapuaiga ma faalapotopotoga faalelotu ua i ai se tulaga ese o le gafatia e uunaia ai tagata ma, i le taimi lava lea, atiina ae uiga faaalia o le faamagaloga, malamalama, ma se naunautaiga e tauivi mo le tulaga sili i o latou olaga patino ma le lalolagi.”
“O le saolotoga o tapuaiga o le maatulimanu o le filemu i se lalolagi o i ai le tele o filosofia faatautava,” na tau atu e Elder D. Todd Christofferson o le Korama a Aposetolo e Toasefululua i se vaega o lotu eseese i Mosque Pasila i São Paulo, Pasila, ia Aperila 2015. Sa ia saunoa i le faaPotukale i se faatasiga na aofia ai le Musalemi, Katoliko, Aso Fitu, tagata Iutaia, o le Aufaievagelia, le Au Paia o Aso e Gata Ai, tagata faaleagaga o le atunuu, tagata e leai ni lotu faapitoa, ma isi, i le taimi o le faamanatuina o le lagolago malosi a le malo i le saolotoga faalelotu. “Tau ina ia tatou saili atu i le filemu,” na ia saunoa ai, “e ala i le galulue faatasi e faasao ma puipui le saolotoga o tagata uma e faia ma faaalia se mataupu faalelotu po o se talitonuga o la latou filifiliga, pe taitoatasi pe faalenuu ma isi, i le fale po o fafo atu, i nofoaga faitele pe le faalauaiteleina, i le tapuaiga, tausia, faataitaia, ma le aoao atu.”
“E tatau i tagata o le faatuatua ona taulamua i le puipuia o le saolotoga o tapuaiga faalelotu—se saolotoga lea e afua ai isi saolotoga taua tele,” na saunoa mai ai Elder Quentin L. Cook o le Korama a Aposetolo e Toasefululua ao ia tuuina atu le Annual Religious Liberty Lecture i le Iunivesite o Notre Dame Australia i Sini, Ausetalia, ia Me 2015. “E le gata e tatau ona tatou puipuia lo tatou gafatia e tautino atu la tatou lava aoaoga faalelotu ae ia puipuia ai foi le aia tatau o tapuaiga taitasi e faatautaia ai ana lava aoaoga faavae ma tulafono,” o lana saunoaga lea.
Sa auauna atu Elder Ronald A. Rasband o le Korama a Aposetolo e Toasefululua o se Peresitene Sinia o le au Fitugafulu ina ua ia saunoa atu i tamaiti aoga i le Iunivesite o Polika Iaga i Provo, Iuta, ISA, ia Setema 2015.
“O nisi i la outou tupulaga e tuufesili pe aisea e aafia ai fua lava vaega faalelotu i tulaga faaupufai, ma e masani lava ona latou fesiligia le faamoemoega o tagata lolotu pe a latou faia lena mea,” o lana tala lea. O leo tuufaatasi o vaega ua manatu o mataupu faalelotu e le tatau ona i ai se latou matafaioi i mea tau faaupufai ua faatupulaia le leotele i tausaga talu ai nei, ma faaleoina le “tulaga matautia o le faia o se isi vasega e faamanualiaina: o tagata o le faatuatua, e pei o oe ma a’u.”
Sa ta’u atu e Elder Rasband i tamaiti aoga e manaomia e le lalolagi le auai malosi mai a latou tupulaga i lenei autu. “Matou te manaomia le malamalama moni o la outou tupulaga o le alofa, faaaloalo, ma le lē faaitu’au. Matou te manaomia lo outou manatu lelei ma lo outou naunautai e faatautaia ai nei mau manatu lautele.” Sa ia saunoa mai, o le tali, e amata i le poloaiga a le Faaola ia “fealofani, faapei ona ou alofa atu ia te outou” (Ioane 13:34).