Savali a Faiaoga Asiasi
O Lo Tatou Gafatia mo le Tulaga Faalematua
Ia suesue ma le agaga tatalo lenei savali ma saili ia iloa mea e faasoa atu. O le a faapefea e le malamalama i le “O Le Aiga: O se Folafolaga i le Lalolagi” ona faateleina lou faatuatua i le Atua ma faamanuiaina ai i latou e te tausia i le faiaoga asiasi? Mo nisi faamatalaga, alu i le reliefsociety.lds.org.
Faatuatua, Aiga, Toomaga
“Sa taua ona fananau mai o fanau agaga a le Atua i la le tino ma latou maua le avanoa e alualu ai i luma agai atu i le ola e faavavau,” na aoao mai Elder Dallin H. Oaks o le Korama a Aposetolo e Toasefululua. “E tusa ai ma le faamoemoega autu o le fuafuaga tele o le fiafia, ou te talitonu o oa moni lava o le lalolagi ma le lagi o a tatou fanau ma fanau a a tatou fanau.”1
Na saunoa mai Elder Neil L. Andersen o le Korama a Aposetolo e Toasefululua:
“Tatou te talitonu i aiga ma e tatou te talitonu foi i fanau. …
“‘… Ua fetalai atu le Atua ia [Atamu ma Eva], Ia fanafanau ia, ma ia uluola, ma ia tumu ai le lalolagi’ [Kenese 1:28]. …
“E le o faagaloina pe ua tuu esea lenei poloaiga e Le Ekalesia a Iesu Keriso o le Au Paia o Aso e Gata Ai.”2
E ui lava e le o tatou uma e avea ma matua i lenei olaga, e mafai ona tatou faafaileleina ni fanau o vaitausaga uma. Tatou te olioli i faamanuiaga o le avea ma se vaega o le aiga o le Tama Faalelagi, ma tatou te oo i olioli ma luitau o le avea ma se vaega o se aiga faalelalolagi. Ma mo le toatele, o le tulaga faamatua ua faatalitali mai mo i latou i le faavavau o i luma atu.
Mau Faaopoopo
Tala Mai E o Soifua
“O le tele o leo i le lalolagi i le taimi nei o loo tuuitiitia ai le taua o le fanauina o se fanau pe o fautua mai ina ia tolopo pe faaitiitia ia fanau i totonu o se aiga. Talu ai nei na faasino ai au e la’u fanau teine i se uepisaite na tusia e se tina Kerisiano (e le auai i le tatou faatuatuaga) e toalima le fanau. Sa ia faaalia ai ni ona manatu: ‘[O le tuputupu ae] i lenei aganuu, ua matua faigata ai ona maua se vaaiga faaletusipaia e uiga i le tulaga faatina. … O fanau e lei oo ina faatauaina kolisi. E lei taitai faitaulia i femalagaaiga i le lalolagi. E lei oo i le taimi e tatau ai ona o e tafafao i po. E faamanaia ai lou tino i le faletaalo. E lei oo foi i soo se galuega e te mauaina pe faamoemoe e maua.’ Ona ia toe faaopoopo mai lea: ‘O le tulaga faaletina e le o se mea e te faia ma mea e te fiafia i ai, o se valaauga. E te le faaputuputuina tamaiti ona e te manatu e aulelei nai lo faailoga tusi. E le o se mea e te faia pe a fetaui ma mea ua e faatulagaina. O le i ai o se fanau, o le mea lea na tuu atu ai e le Atua ia te oe le taimi.’“3