O TALI mai Taitai o le Ekalesia
Pe Faapefea ona e Maua Faamanuiaga o le Malumalu
Saunia e Elder Ronald A. Rasband
O Le Korama a Aposetolo e Toasefululua
Mai se saunoaga na tuuina atu i le faigalotu a le Iunivesite o Polika Iaga i le aso 10 o Fepuari, 2009. Mo le tusiga atoa i le gagana Peretania, asiasi i le speeches.byu.edu.
O Malumalu o maota o le Alii, lea ua toe faamaonia mai ai aoaoga a lo tatou Faaola e ala i sauniga paia e pei o papatisoga mo e ua maliliu ma faaipoipoga, lea e tuufaatasia ai aiga mo le faavavau atoa.
O le a ou fautuaina atu ia te outou o le tapuai i le malumalu o se mamanu taua mo outou taitoatasi e faatulagaina—taitoatasi ma aiga—a o outou mafaufau i a outou lava eria o le taulai atu ma le gauai atu, a o e fatulagaina ni faavae malolosi i lou olaga. Ou te iloa o le toatele o outou ua uma ona faia lenei mea, ma mo lena mea ua silisili lo matou faafetai ia te outou.
Ua tuuina mai e le Au Peresitene Sili se valaaulia i tagata uma o le Ekalesia, lea e mautinoa lava e faatatau ia te oe ma au: “Pe a faatagaina e le taimi ma tulaga, ua uunaia tagata e suia nisi o gaoioiga faafiafia i le auaunaga i le malumalu.”
Tau ina ia tatou mafaufau foi i faamanuiaga folafolaina e ala mai i perofeta, tagatavaai ma talifaaaliga a o tatou auai ma le faamaoni i le malumalu. Mai ia Peresitene Thomas S. Monson e oo mai ai lenei folafolaga: “O Mai i le malumalu ma tuu a outou avega i luma o le Alii ma o le a outou faatumulia ai i se agaga fou ma le talitonu i le lumanai. Faalagolago i le Alii, ma afai e te faia Na te lagolagoina oe ma tausia oe ma taitai oe mai lea laasaga i lea laasaga i lena ala e tau atu i le malo selesitila o le Atua.”1
O se isi faamanuiaga faamafanafana loto o le tapuai i le malumalu o le faamautinoaga o le puipuiga ma le filemu mai afa faigata o le olaga ia i tatou i o tatou aso. O nisi o nofoaga e sili ona saogalemu ia ua faatuina e le Tama Faalelagi mo le faapotopotoina o Ona tagata o totonu o malumalu o le Alii.
O le fuaitau o loo i fafo i luma o malumalu uma lava e faitauina: “E Paia i le Alii / Le Maota o le Alii.” Ou te molimau atu o malumalu uma o le Alii o Ana malutaga iinei i luga o le fogaeleele. Ou te valaaulia outou uma ina ia sili atu le auai soo, pe a faatagaina e o outou tulaga, ma maua o outou faamanuiaga ma puipuiga ua folafolaina atu ia te oe e ala mai i perofeta a le Atua.