Tatou te Talanoa ia Keriso
ALOFA ATU i Isi e Ese o Latou Tulaga Faatauaina
Sa ou taumafai e tausia la’u fanau ina ia ola i le maualuga o tulaga faatauaina lelei. Ae ina ua fai e se tasi o a latou faataitaiga sili se filifiliga sese, sa ou mafaufau po o mea uma sa ou taumafai e aoao atu o le a matalatala.
O lo’u uso-faaletulafono o Janey (ua suia le igoa) sa ola ae i le talalelei ma o se tagata e matua faamaoni lava o le Ekalesia. Ina ua faamutaina lana faaipoipoga i le malumalu na foliga mai sa fiafia lava, o tagata i lona nuu laitiiti na amata ona faasalalau atu tala ma faia ni faamasinoga e uiga ia te ia. Na taumamao ese o ia lava mai le tele o ana uo ma mulimuli ane mai le Ekalesia.
Sa amata ona tafafao faamasani ma se alii talavou, o Andy, lea e lei umi ae nonofo faatasi ma ia. Sa ou popole e uiga i mea e ta’u atu i la’u fanau. Sa fiafia lava la’u fanau teine e toatolu i le tuafafine o lo latou tama o Janey. E le gata o o matou aiga e vavalalata tele, ae o ia o lo latou faiaoga o le siva, o lea latou te vaai ai ia te ia mo ni nai taimi i se vaiaso.
Mo le tele o masina, sa latou manatu o Andy sa asiasi atu soo, ae e tatau lava ina iu ina ou ta’u atu ia te i latou e Janey ma Andy sa nonofo faatasi. Sa ou faamatala atu o le filifiliga sa la faia o se agasala matuia. Na foliga mai na malamalama lau fanau teine, ma sa matou faia ai se talanoaga lelei e uiga i le taua o le ola ai i mataupu faavae o le talalelei.
Ona tupu lea o se mea e sili atu le leaga. Na fofogaina mai ma le fiafia e Janey i le aiga o ia ma Andy o le a maua se pepe. Sa ou toe popole pe o le a faapefea e lenei tala fou ona aafia ai la’u fanau. Pe na latou iloa e le o le finagalo lea o le Tama Faalelagi e auala mai ai Lana fanau i le lalolagi? Afai sa latou siomia i lenei tulaga, pe o le a latou manatu o se tulaga e taliaina ma le masani?
Sa ou popole mo ni vaiaso, ma le le manao e ta’u i la’u fanau lenei mea e sili le fou ua tupu ae. I se masina mulimuli ane na filifili Janey ma Andy e faaipoipo. Pe aisea na la le faatali ai e faasilasila le maitaga seia uma ona la faaipoipo?
O le inoino na puna ae i totonu ia te au. E faapefea ona mafai ona ou alofa ia Janey ae le o le mea na ia faia? E faapefea ona ou aoao atu i la’u fanau e faaauau pea ona alolofa i le tuafafine o lo latou tama, ae le o le filifiliga sa ia faia?
I se tasi aso na tau mai e lou uso ia te au e uiga i se tamaitai talavou i lana uarota ua maitaga. O lenei tamaitai talavou sa faaauau pea ona alu i le lotu ma na foliga fiafia mai ma le naunau atu e uiga i le mea o loo loma i lona olaga. Sa le mautonu isi tamaitai talavou i mea na latou vaaia i ona uiga le popole e uiga i le tulaga.
Ae sa iloa e lo’u uso, o se faiaoga asiasi i le tina o le tamaitai talavou, na aoaoina le mafaitaulia i po sa tagi ai o ia lava seia oo ina moe, i le faanoanoa i filifiliga ia na taitai atu ai o ia i lenei tulaga pagatia. Ina ua mavae le tele o vaiaso o le puapuaga tele, sa filifili ai le tamaitai talavou pe o le a ia faaauau pea ona faanoanoa i ana faatinoga, pe o le a ia agai i luma ma ia fiafia. Ona o le taulaga togiola a Keriso, sa mafai ona ia talia taunuuga o ana faaiuga ma toe faamamaina e ala i le salamo.
Sa ou mafaufau po o Janey na ui mai i se mea faapena. Pe sa ia salamo i ana filifiliga ae, e le mafai ona suia ai le taunuuga, na taliaina na taunuuga ma filifili e agai i luma?
Sa ou lagona le maasiasi i la’u faamasinoga saua ma lo’u le mafaia ona alofa i le ala ua faamoemoe Iesu Keriso ia i tatou e alolofa ai. A o ou tomanatu i le soifuaga o le Faaola, sa ou manatuaina o Ia lava i taimi uma na saili ai i tagata agasala, ma aoao atu ia i latou e ala i Ana upu ma faataitaiga, ma alofa ia i latou. O lenei alofa na faamaluluina ai loto ma suia ai tagata.
Sa ou iloaina ua tele taimi sa ou alofa ai i tagata a o latou amio i le auala na ou manatu e tatau ai, ae o le taimi lava latou te faia ai se mea sese, ou te tausalaina i latou i lo’u loto. O au o se tagata pepelo naua! Sa ou iloaina sa tatau ona ou salamo. Sa manaomia ona ou aoao e alofa i le tagata agasala e aunoa ma le lagolagoina o le agasala. Mulimuli ane, sa mafai ona faamatuu ese le ita sa ia te au e faasaga ia Janey ma toe alofa moni lava ia te ia.
Sa toe faia se matou talanoaga lelei lava ma la’u fanau. Sa ou faamamafaina le taua o le faaipoipo a o lei maua o se pepe. Sa mafai ona matou tulimatai atu i le fanau mai o se pepe fou i le aiga. Sa matou mananao uma lava e lagolago Janey ma fiafia faatasi i lenei taimi faapitoa o lona olaga. Na iloa e la’u fanau na faia e le tuafafine o lo latou tama o Janey se mea sese, ae latou te alolofa pea te ia ma Uncle Andy ma faamoemoe o lo la aiga matagofie o le a i ai se aso e filifili e toe foi mai ai i lima o loo faatalitali atu o lo tatou Faaola, o Iesu Keriso.