E Pei o le Fafine Sarefata ua Oti Lana Tane: O Le Vavega o Taulaga Anapogi
E alala tusitala i Iuta, ISA.
A o tatou mafaufau e tuu atu se taulaga anapogi e sili atu le limafoai, na matou manatua e le mafai e se tagata ona tuuina atu se pau falaoa i le Alii e aunoa ma le toe mauaina o se papa falaoa.
Ata na tusia e Rose Datoc Dall
E tele aiga i le lalolagi atoa e tauivi i tulaga tautupe, ae maise lava i taimi o le pau o le tamaoaiga.1 O le aafiaga o sea pau faapena na lagona i la matou uarota i le lotoifale i ni nai tausaga ua mavae, a o ma vaai i ni nai aiga o manaomia le fesoasoani. I le amataga o lena tausaga, o lo matou epikopo na faasoa mai ia te i matou se valaaulia mai lo matou peresitene o le siteki e tuuina atu se taulaga anapogi limafoai e fesoasoani ia i latou e manaomia le fesoasoani.
E ui lava o o matou taitai na fesili mai ia i matou e vaai o matou tulaga patino ma mafaufau pe mafai ona sili atu lo matou limafoai i a matou taulaga anapogi, latou te lei tau maia le tele e tatau ona matou tuuina atu. Ae ui i lea, o le Agaga na faamanatu mai ia i matou le fautuaga na tuuina mai i tausaga ua mavae e Peresitene Marion G. Romney (1897–1988), le Fesoasoani Muamua i le Au peresitene Sili. Sa ia saunoa mai: “O au o se tagata talitonu faamaoni e le mafai ona e tuuina atu i le Ekalesia ma i le fausiaina o le malo o le Atua ae faateleina ai ona mativa i le tulaga tautupe. … O se tagata e le mafai ona tuuina atu se pau falaoa i le Alii e aunoa ma le toe mauaina mai o se papa falaoa. O lou aafiaga lena. Afai o le a faaluaina e tagata o le Ekalesia a latou foai mo taulaga anapogi, o le a faaluaina le tulaga faaleagaga i le Ekalesia. E tatau ona tatou manatua lena mea ma ia limafoai i a tatou saofaga.”2
Na matou iloa o le a avea ma se osigataulaga mo lo matou aiga le faateleina o a matou taulaga anapogi, ae na matou mafaufau ma le faaeteete i le aoaoga ma le folafolaga a Peresitene Romney. I le avea ai o se aiga, sa matuai faamanuiaina lava i matou ma na matou lagona se naunautaiga malosi e faateleina a matou taulaga anapogi.
E le gata i lea, sa matou mananao i lo matou aiga e faatoilalo le faasolo ina manatu faapito. Aua o loo tatou ola i se sosaiete e soona taulai atu i le mauaina o mea ma faataunuuina o tatou lava manao, sa ma popole i la ma fanau nei matutua ae ma le manatu faapito. Ae na matou faamoemoe i upu a Peresitene Spencer W. Kimball (1895–1985): “O le ola ai i le tulafono o le anapogi, e maua ai e le tagata lava ia, se mana e totogo ae, e faatoilalo ai lona manatu i se lelei mo na o ia lava, ma le manatu faapito.”3
I totonu o le tolu masina muamua o le tuuina atu o se taulaga anapogi e sili atu le limafoai, na amata ona matou vaaia le tele o faamanuiaga. Sa itiiti atu tupe sa mafai ona matou faaaluina i meaai, ma o le tane o le matou kesi sa foliga mai na umi atu le taimi o tumu pea. Na faaitiitia mea e fesili mai ai le ma fanau, ma na toetoe lava a mou ese atu le manatu faapito i lo matou aiga.
Mo se faataitaiga, pe a matou foai atu i suega meaai i le lotoifale, na amata ona uunaia i maua e le ma fanau e tuuina atu faatele. Ina ua matou faia la matou iloiloga faaletausaga o a matou sapalai o meaai, na matou iloaina ai sa i ai moni lava ni a matou meaai mo le lua tausaga. E le gata i lea, i le taimi ua tuanai e tasi le masina matou te faaaogaina ai se taga e 50-pauna (22.7 kk) o le araisa. O le taimi lenei o le taga araisa lava lea e tasi ua matou faaaogaina mo le lua masina. Na foliga e pei ua faateleina la matou teuga meaai.
Sa faamanatu mai ia i matou le tala e uiga i le fafine Sarefata ua oti lana tane. I se taimi o le oge, na asiasi atu ai le perofeta o Elia i se fafine ua oti lana tane, lea sa leai se meaai e fafagaina ai o ia, e tuuina atu ia te ia se vai ma se falaoa. O lana tali o le, “O loo soifua Ieova lou Atua, e leai se potoi areto ia te au, ua na o le luutaga o falaoa i le kate, ma sina suāuu itiiti i le fagu: faauta, ua ou fai nei ni fafie se lua ina ia ou alu, ma tunu ai mā maua ma si a’u tama tane, ma te aai ai, ona ma oti lea” (1 Tupu 17:12).
Na folafola atu e le perofeta ia te ia e “le uma le kate falaoa, e le faaitiitia le suauu i le fagu. …
“Ona alu lea o ia, ua ia faia e tusa ma le upu a Elia; ua latou aai ai, o ia, ma Elia, ma lona aiga, ua tele aso” (1 Tupu 17:14–15). O lana kate, lea sa lava mo le meaai mulimuli se tasi mo lona aiga, na faateleina ma faatagaina ai lona aiga ma isi e aai ai i le tele o aso. O le ituaiga lava lea e tasi o vavega—e faavae i a tatou lava osigataulaga—sa tupu i lo matou aiga.
I le taimi faigata o mea tautupe, le tuuina atu o se taulaga anapogi limafoai ma le fesoasoani e tausia e le tagolima e mafai ona faigata, ae maise lava pe a tatou i ai—e pei o le fafine Sarefata ua oti lana tane—i ē le tagolima. O le tuuina atu o se taulaga anapogi limafoai, e tusa lava po o le a le aofaiga, e manaomia ai le faatuatua i le Alii ma Lana folafolaga e tausia i tatou. Ae o le Alii e faataunuuina Ana folafolaga, ma o le aafiaga a lo matou aiga na aoaoina i matou faapea o le tele o lo tatou naunau e faasoa atu, o le tele foi lea ona faamanuiaina i matou.
E pei ona saunoa ai Peresitene Romney: “aua e te tuuina atu mo le faamanuiaina o e matitiva, ae foai atu mo lou lava lelei. Ia lava lau foai ina ia mafai ona e tuuina atu oe lava i le malo o le Atua e ui mai i le tuuina atu o au mea atoa ma lou taimi.”4 O le tuuina atu o se taulaga anapogi limafoai na fesoasoani i lo matou aiga e maua le olioli i le tausiga o e matitiva ma le malosi i lo matou lava uelefea faaleagaga.
Falaoa ma I’a, saunia e Rose Datoc Dall
O lo matou naunau e tuuina atu se pau falaoa na aumaia ia i matou ni falaoa se tele o se taui. O lo matou naunau e tuuina atu se taulaga anapogi limafoai na sili atu ai i le faaluaina la matou teuga meaai. E moni lava, o le mana o le Alii e faateleina falaoa e lima ma i’a e lua e fafaga ai le 5,000 alii, e ese mai fafine ma tamaiti, na lava ai ni fasi meaai e faatumu ai ato e 12 (tagai i le Mataio 14:16–21), o le mana lava lea e tasi lea sa faatumulia ai le kate mo le fafine Sarefata ua oti lana tane ma faateleina meaai o le teuga meaai a lo matou aiga. Ae, o lo matou manuia silisili e lei oo mai i le tulaga o le faateleina o meaai, ae i le faaitiitia o le manatu faapito ma le faateleina o le faaleagaga i lo matou aiga.
O la matou molimau ao matou foai atu ma le limafoai i tupe o taulaga anapogi a le Ekalesia, e aofia ai pe afai o a matou tupe ua faatapulaaina, o le Alii o le a faalauteleina a tatou taumafaiga ma faamanuia i tatou i tua atu o lo tatou malamalama.