Mauaina o Tinamatua

Reuben Wadsworth, Iuta, ISA

O le faanoanoaga e tasi ia te au o le le nonofo lea i lalo ma le tina o lou tama e talanoa e uiga i lona olaga ma faamaumau ona manatuaga mo le fanau. Ina ua maliu o ia na tau mai ia te au e lo’u tama ma ona uso sa le talitonu o ia ia te ia lava ma sa oo lava ina ia fesili i nisi taimi, “Aisea o le a manao ai se isi ia iloa e uiga ia te au?”

Ina ua faamalosia e faigata tautupe lo’u aiga e siitia atu i le fale tuai o Tinamatua, sa faatumuina lou mafaufau i manatuaga fiafia, faatasi ai ma le faanoanoa. I se tasi po i ni nai aso ina ua faatoa siitia mai, sa ou matamata i ni nai tusi ata tuai a lo’u tinamatua ma se pusa o mea taua, lea na aofia ai tusi tuai na tusia e le uso o lou tama, pepa faataga tuai o le malumalu, e oo lava i le polokalama o le falelauasiga o tamamatua. Ina ua uma ona matamata i lenei meatotino e manatua ai, sa ou mafaufau pe o i ai nisi.

Sa ou lagonaina e tatau ona vaai i le tamai potu i luga, ma sa vave ona taitaiina atu i se taga o loo i ai se faila lanumoana tuai lea sa faamoemoeina mo le lapisi. I lena faila, sa ou iloaina ai le amataga o se tala o le olaga o lo’u tinamatua sa tusia i le 30 tausaga ua mavae. Sa ou iloa mulimuli ane, i lou ofo tele, e leai se tasi i le aiga na iloaina lona i ai. Na sa’o lava lo’u tama ma ona uso—o Tinamatua sa matuai le talitonu lava ia te ia lea na te lei taua lava i se tasi sa ia amataina ona tusia se tala o le olaga!

O lena po sa ou faitauina upu uma taitasi i na itulau e valu, ma a o ou faia, sa ou aoaoina ni mea se tele e uiga i lo’u tinamatua—pe na faapei le olaga mo ia i le aoga maualuga, pe na faapefea ona ia feiloai atu i lo’u tamamatua, ma le faigata mo ia ona tapunia le faletifaga na la faagaoioia faatasi ma lo’u tamamatua.

Sa ou lagonaina lona faatasi mai a o ou faitau i na itulau, e pei sa ia ta’u mai ia te au e le toe popole e uiga i le faamaeaina o le talafaasolopito tuutaliga sa ou faamoemoe e fai. O le faitau e uiga i le olaga o lo’u tinamatua i lana lava tusitusiga, sa le mafaatauina lava ma faaitiitia ai le faanoanoa na ou lagonaina mo se taimi umi lava. O se faamautinoaga o le alofa mutimutivale o le Alii ma se molimau o le talafaasolopito o aiga e le na ona iloa e uiga i tuaa sa tatou le iloa i lenei olaga. E uiga foi i le iloaina atili e uiga ia i latou tatou te alolofa faapelepele i ai ma e tatou te faaaluina faatasi le taimi taua iinei i le lalolagi.

Pe a ou nofo i lalo faatasi ma isi tagata o le aiga e tusi a latou talaaga ma fesili mai pe aisea o le a manao ai se tasi ia iloa e uiga ia i latou, o le a ou faamautinoa atu ia i latou o a latou tala e aoga le ta’u atu ma o a latou fanau o le a faafetai atu ia te i latou, e pei lava ona ou faafetai i lo’u tinamatua mo le tuua o lana talafaasolopito patino taua tele.