Manatuaina o le Faaola

Saunia e Eric B. Murdock

Mekasini a le Ekalesia

E oo mai faamanuiaga silisili a o tatou manatuaina Iesu Keriso e ala i le aai ma feinu i le faamanatuga.

Ata

sacrament cup

Ata na tusia e Kevin Keele

I vaiaso taitasi, e faamanuiaina i tatou i le avanoa e aai ma feinu i le faamanatuga a o tatou auai i le lotu. O le mea moni, o se tasi lena o mafuaaga autu tatou te o ai i le lotu i le aso Sa. Ae pe e te iloa pe aisea e taua tele ai le faamanatuga? O loo i ai se tasi o mea tatou te folafola atu e faia ina ia avea ai ma se tasi o sauniga e sili ona taua ma paia i le Ekalesia: ia manatua Iesu Keriso.

Mafaufau i ai: o le manatuaina o le Faaola o se vaega tutotonu o tatalo o le faamanatuga. Tatou te folafola atu ai o le a tatou “manatua pea o ia” (MF&F 20:77, 79), e le faapea na o le aso Sa ae o taimi uma lava. A o tatou manatua pea le Faaola, o o tatou olaga o le a atagia ai o tatou tulaga faatonuina ma aoaoga, ma o le a tatou maua ai foi se uunaiga mamana ma le malosi i o tatou olaga.

Pe Na Faapefea ona Fesoasoani le Manatuaina i se Tasi o Alii Talavou

Ata

Alma the Younger and an angel

Mo se faataitaiga, ina ua valaauina e se agelu a le Atua Alema le Itiiti ia salamo, na pau Alema i le eleele ma le mafai ona tautala atu pe minoi mo ni nai aso. I le taimi lena, sa puapuagatia o ia i le manatuaina o ana agasala, ona ia “manatuaina … faalogo i [lona] tama o vavalo … e uiga i le afio mai o se tasi o Iesu, o se Atalii o le Atua, e togiola mo agasala a le lalolagi.” Ona ia faapea mai lea, “O lenei, ina ua tau ane lou mafaufau i lenei manatu, sa ou tagi ifo i totonu o lou loto: E, Iesu e, oe le Alo o le Atua, ia e alofa mutimutivale mai ia te au, o se ua i ai i le au oona, ma ua siomia faataamilo e filifili tumau-faavavau o le oti. Ma o lenei, faauta, ina ua ou mafaufauina lenei mea, sa ou le toe manatuaina ou tiga” (Alema 36:17–19).

Ua na o le mafaufau ia Keriso na taitai atu ai Alema e tatalo mo le alofa tunoa, lea na aveeseina lona lagona tausalaina, faamamaina lona tiga, ma fesoasoani ia te ia e salamo. E faapei o Alema, e mafai ona tatou liliu atu o tatou olaga ia Keriso ma maua le olioli lea e oo mai i le ola ai i le talalelei. E amata uma lava i la tatou filifiliga e manatua Iesu Keriso ma le mana o Lana Togiola.

O isi faamanuiaga nei e lima e oo mai mai i le tausia o la tatou folafolaga ia manatua pea le Faaola.

O le a I Ai Pea Lona Agaga e Faatasi ma i Tatou

Pe a outou fetagofi atu i le faamanatuga i le aso Sa, e faamanatu atu ia te outou le folafolaga e faapea, pe a outou manatuaina Keriso, tausi Ana poloaiga, ma tauave Lona suafa i o outou luga, e mafai ona outou maua pea Lona Agaga e faatasi ma outou. I se lalolagi e tumu i luitau, e faigofie ona taitai seseina. Ae afai e ia te outou le Agaga Paia e faatasi ma outou “o le mana o le Agaga Paia e mafai ona outou iloa ai le moni o mea uma lava” (Moronae 10:5). E mafai ona avea mo o outou taiala le Agaga o le Alii ma faamanuiaina outou i le taitaiga, faatonuga, ma le puipuiga.
E Mafai Ona Ia Tuuina Mai Ia i Tatou le Malosi e Tetee Ai Faaosoosoga

O la tatou puipuiga sili ma le mautinoa mai faaosoosoga o lo tatou faatuatua ia Iesu Keriso (tagai i le Alema 37:33). A o tatou taulai atu o tatou mafaufau ia Keriso, e mafai ona tatou iloa pepelo a Satani ma iloa ana taumafaiga e faasese i tatou. Ona o Iesu na feagai ma faaosoosoga ae lei vaivai ai, e mafai ona tatou faalagolago ia te Ia pe a tatou feagai ma faaosoosoga. Na aoao mai Nifae o i latou e “pipiimau i [le afioga a le Atua] e lē fano lava i latou; pe mafai foi e faaosoosoga ma u fanafana mu a le fili ona faatoilaloina i latou” (1 Nifae 15:24). A o tatou manatuaina le Faaola ma Ana aoaoga, e mafai ona Ia siitia i tatou ma faamalolosia i tatou e tetee atu i faaosoosoga.
O Lana Faataitaiga o le a Taialaina i Tatou

E le na o le tau mai e Iesu ia i tatou po o fea e o i ai mo le ola e faavavau; Na te taitaia le ala. Sa Ia fetalai mai, “O a’u nei le ala, ma le upu moni, ma le ola” (Ioane 14:6). O Keriso o lo tatou faataitaiga sili. I le taimi o Lana galuega faaletino, na aoao mai Iesu ma faataitaia le alofa, agamalu, lotomaualalo, ma le agaalofa. Sa ia faaaluina Lona taimi e aoao atu, auauna atu, ma agalelei atu i isi.

O mea uma sa Ia faia, sa Ia usitaia ai le finagalo o Lona Tama (tagai i le Ioane 5:30). I mea uma, ua faatulagaina e le Faaola le mamanu mo le auala e tatau ona tatou ola ai, ma ua Ia valaaulia i tatou uma e mulimuli i Lana faataitaiga.

Afai tou te iloaina i soo se taimi, ua outou le iloa po o fea e o i ai po o le a se mea e fai, ia manatua le Faaola. Na Ia fetalai, “O A’u nei o le malamalama o le lalolagi; o le mulimuli mai ia te au, e le savali o ia i le pouliuli, a e ia te ia le malamalama o le ola” (Ioane 8:12).
E Mafai Ona Ia Fesoasoani Ia i Tatou e Auauna Atu i Isi

Ata
Jesus Christ

E faamuamua pea lava pea e Iesu manaoga o isi nai lo Ona lava manaoga. “Sa femaliuai ma agalelei” o Ia (Galuega 10:38). Sa ia faamaloloina e mamai ma fesoasoani ia i latou na siomia ai o Ia. Pe a tatou manatua Iesu, tatou te manatua ai faatinoga o le auaunaga lē manatu faapito lena na faamatalaina ai Lona soifua. Tatou te manatuaina foi na Ia poloaiina i tatou e auauna atu ia te Ia e ala i le auauna atu i isi. “Pe a i ai outou i le galuega a o outou uso ua na ona i ai outou i le galuega a le Atua” (Mosaea 2:17).

O le a fesoasoani le Alii ia outou vaai ia i latou o loo siomia ai outou e ono manaomia lau fesoasoani. O le a taialaina foi outou i le auala sili e auauna atu ai ia te i latou. O le a sili atu le fiafia ma sili atu le faagaeetia o lou olaga a o e tuuina atu ni faatinoga laiti ma faatauvaa o le auauna atu ma le agalelei. O le auauna atu i isi o le a aumaia ai se lagona o le filemu ma le olioli i lou olaga.
E Mafai ona Tatou Salamo

Tatou te le atoatoa uma lava i le tausiga o poloaiga, e tusa lava pe tatou te taumafai ma le faamaoni, ae ona o le soifuaga ma le misiona a Iesu Keriso, o loo i ai se ala o le toe foi.

O le manatuaina o Iesu Keriso e faamanatu mai ia i tatou le meaalofa o le salamo o loo ofoina mai e ala i Lana Togiola. Ua valaaulia e Iesu i tatou uma ina ia salamo, ma tatou te lagonaina le olioli a o tatou liliu ese mai le agasala ma liliu atu ia te Ia. Pe a tatou maua se naunautaiga faamaoni ina ia suia ma tausi i poloaiga, ua folafola mai e le Alii, “o Ia o le ua salamo i ana agasala, o ia lava lea ua faamagaloina, ma o au, o le Alii, e le toe manatuaina lava i latou” (MF&F 58:42).

A o e ai ma inu i le faamanatuga, ua e faia se tautinoga e manatua pea le Faaola. O le tele ona e tuuina Keriso i lou manatu, o le tele foi lea ona avea o Ia ma totonugalemu o lou olaga, ma o le tele foi lea ona Ia taialaina ma taitaia oe e oo atu i lou malosiaga atoatoa. O le manatuaina pea o le Faaola o le a faamanuiaina ai pea lava lou olaga.