Savali a le Au Peresitene Sili
Faamaoni i le Faatuatua o O Tatou Tama
Saunia e Peresitene Thomas S. Monson
O le Aiga Paionia o Loo Tootutuli i le Kiona, saunia e Michael T. Malm
O John Linford sa 43 ina ua faia e ia ma lona faletua, o Maria, ma o la atalii e toatolu le filifiliga e tuua lo latou aiga i Egelani Gravely, ae malaga i le faitau afe o maila e auai i le Au Paia i le vanu o Sate Leki Tele. Sa la tuua le la tama tama lona fa, o le sa auauna atu i se misiona, ma faatau atu a laua meatotino, ma malaga atu i Liverpool i le vaa o le Thornton.
O le malaga i le sami i le Aai o Niu Ioka, ma mai iina e ala i le laueleele e agai atu i Iowa, na faamaonia le filemu. O faafitauli na amata, e ui i lea, ina ua faatoa tuua e le au Linford ma isi Au Paia o Aso e Gata na folau mai i le Thornton le Aai o Iowa i le aso 15 o Iulai, 1856, o se kamupani o taavale tosolima le faamanuiaina a James G. Willie.
O le leaga o le tau ma le faigata o le malaga na toatele ai tagata i le kamupani, na mamai ma maliliu, e aofia ai John. Na iu lava ina sa matua ma’i tigaina ma vaivai o ia na tatau ai ona tosoina i se taavale tosolima. E oo atu i le taimi na taunuu ai le kamupani i Wyoming, o lona soifua sa faifai malie atu lava. Sa taunuu atu se vaega o le laveai mai le Aai o Sate Leki i le aso 21 o Oketopa, na o ni itula talu ona maliu John. Na maliu o ia i lena taeao po i tafatafa o le auvai o le Vaitafe o Sweetwater.
Pe sa faanoanoa John na ia fesuiai ia le mafanafana ma le faigofie mo le tauiviga, tuulafoaiina, ma le faigata o le tauaveina o lona aiga i Siona?
“Leai, Maria,” na ia ta’u atu i lona toalua a o lei maliu o ia. “Ua ou fiafia na tatou o mai. O le a ou le ola e taunuu atu i Sate Leki, ae o oe ma tama o le a, ma ou te le salamo lava i mea uma na tatou oo i ai pe afai e mafai ona tuputupu ae le ta fanau tama ma tausia o latou aiga i Siona.”1
O Maria ma lana fanau tama na faamae’aina la latou malaga. Ina ua maliu Maria i le toeitiiti atoa le 30 tausaga mulimuli ane, o ia ma John na tuua se talatuu o le faatuatua, o le auauna atu, o le tuuto, ma le ositaulaga.
O le avea ma se Au Paia o Aso e Gata Ai o le avea ma se paionia, aua o le faauigaga o se paionia o le “o se tasi e alu muamua e saunia pe tatala le ala mo isi e mulimuli ai.”2 Ma o le avea ma paionia o le faamasani ma le ositaulaga. E ui lava o tagata o le Ekalesia e le o toe talosagaina e tuua o latou fale ina ia faia le malaga i Siona, e masani lava e tatau ona latou tuua mausa tuai, o tu ma aga ua leva, ma uo faapelepele. O nisi e faia le filifiliga tiga e tuua tagata o le aiga o e tetee i lo latou auai i le Ekalesia. O le Au Paia o Aso e Gata Ai e agai i luma, e ui i lea, e tatalo o le a malamalama o e pele ma taliaina.
E le faigofie le ala o se paionia, ae tatou te mulimuli i tulagaaao o le Paionia tupito—e oo lava i le Faaola—o le na muamua atu, ma faaali mai ia i tatou le ala e mulimuli ai.
“Sau, ma mulimuli mai ia te au,”3 sa Ia valaaulia.
”O au nei le ala, ma le upumoni, ma le ola,”4 na Ia folafola atu.
“Ina sau ia ia te au,”5 na Ia valaau atu.
E mafai ona faigata le ala. O nisi e faigata ona tetee atu i faamatalaga taufaifai ma faalumaluma a tagata valea e faatauemu i le ola mama, faamaoni, ma le usiusitai i poloaiga a le Atua. Ua loa lava ona ta’ufaatauvaaina e le lalolagi o le usitaia o mataupu faavae. Ina ua faatonuina Noa e fau se vaa, o tagata lautele valea na tilotilo atu i le lagi na āuaoa ma ula ma feei—seia oo mai timuga.
I le konetineta o Amerika i le tele o seneturi ua mavae, na masalosalo tagata, teenaina, ma le usita’i seia oo ina faaumatia e le afi Saraemila, na lilofia Moronaea e le eleele, ma o le vai na faatumulia Moronae. O le feei, tauemuga, tala malie le mafaufau, ma le agasala ua le o toe i ai. Na suia i latou e le filemu o le ita, ma le pogisa mafiafia. O le onosai o le Atua ua maea le aoga, o Lana lava taimi ua faataunuuina.
E lei aveesea lava e Maria Linford lona faatuatua e ui lava i sauaga i Egelani, o faigata o lana malaga atu i “le nuu ua saunia … Atua,”6 ma tofotofoga faifai pea sa ia onosaia mo lona aiga ma le Ekalesia.
I se sauniga i le tuugamau i le 1937 na faapitoa i le manatuaina o Maria, na talosagaina ai e Elder Siaosi Alapati Samita (1870–1951) lana fanau: “Pe o le a outou ola faamaoni i le faatuatua o ou tuaa? … Taumafai ia agavaa mo osigataulaga uma na [latou] faia mo outou.”7
A o tatou saili e fausia Siona i o tatou loto, i o tatou aiga, i o tatou nuu, ma i o tatou atunuu, ia tatou manatua le lototele ma le faatuatua mausali a i latou o e na tuuina atu a latou mea uma ina ia tatou olioli i faamanuiaga o le talalelei toefuataiina, ma lona faamoemoe ma le folafolaga e ala i le Togiola a Iesu Keriso.