Faafetai mo le Faailoaina Atu o Au i le Talalelei

Scott Edgar, Iuta, ISA

I le amataga o le vaitau o le 1980, sa nonofo lo’u aiga i Siamani i Sisifo, ma o matou o ni tagata o le Siteki a Kaiserslautern Germany Servicemen. I lea taimi, sa faamamafaina ai e o matou taitai i le lotoifale le galuega faafaifeautalai. Na ta’u mai ia i matou faapea, i totonu o la matou li’o o uo, na tuuina ai e le Alii nisi o Ana fanau agaga filifilia o e sa sailia le talalelei a Iesu Keriso.

O lo’u toalua, o Jenny, ma au sa talitonu e moni lena mea. Na uunaia e o matou taitai i matou taitoatasi e faailoa mai ni uo le lolotu na matou manatu o le a fiafia e faalogo i le talalelei. Sa tatau ona matou faia se lisi o tagata pe a ma le 10 ona anapopogi ma tatalo lea e uiga i la matou lisi o uo ma filifili po o ai o le a matou o atu i ai muamua. Sa ma filifili e faafesootai ni alii se toalua o e na matou galulue faatasi i lo’u ofisa. Sa ou talanoa muamua i se alii talavou nofofua e igoa ia Chris, ae sa ia faaalia sina fiafia laitiiti i lea taimi. Na sosoo ai, na matou filifili o le a ou agai atu ia Bruce Hamby, o se alii lelei ma agalelei ma se aiga talavou.

Ae ui i lea, sa alu ni nai aso ma sa ou lagonaina le fefe e talanoa atu ia te ia e uiga i le talalelei. Mulimuli ane, i se tasi aso na valaau mai Jenny ia te au i le ofisa ma fesili mai, “Ua e talanoa ea ia Bruce?” Sa ou fai atu, “Leai, ae o le a vave ona ou faia.” Ona ia fesili mai lea pe o i ai Bruce i le ofisa i le lena aso, ma sa ou fai atu ioe. O le taimi lena sa ia fai mai, “Scott, tuu i lalo le telefoni. O le a ou faatali atu a o e talanoa atu ia te ia!”

Sa ou tuu i lalo le telefoni ma savali atu ma le popole ia Bruce ma fesili atu, “Bruce, pe na e iloa o au o se tagata o Le Ekalesia a Iesu Keriso o le Au Paia o Aso e Gata Ai?” Sa ia fai mai ioe; ma sa ou fai atu, “Pe o le a e fiafia ea e aoao atili e uiga i le Ekalesia?” Sa ia tali mai, “Ioe, ou te fiafia i ai.”

I ni vaiaso, o Bruce, lona faletua, o Ella, ma le la tama teine, o Tanya, na o mai i lo matou fale mo le taumafataga o le afiafi ma feiloai ma faifeautalai. Na aoaoina i latou i lesona, auai i sauniga a le ekalesia ma i matou, taliaina le talalelei, ma papatisoina. O se aso matagofie ma le mamalu ma le fiafia. Sa faafetai Bruce sa matou faailoa atu lona aiga i le talalelei. E oo foi ia Chris, le alii talavou i lo matou ofisa, sa auai i le papatisoga ma sa faagaeetia. Mulimuli ane, na talanoa atu Bruce ma Ella ia Chris e uiga i le talalelei. Faatasi ai ma la latou faaaumeaina, sa aoaoina Chris e faifeautalai ma auai foi i le Ekalesia.