Saunia—ma Faia

Elder Hugo E. Martinez

O Le Fitugafulu

O le sauniaina o oe lava ia ma faia le galuega a le Alii o le a suia ai lou olaga.

Sa avea au o se faiaoga o le seminare mo le ono tausaga. Matou te feiloai i le 6:00 i le taeao i taeao uma i lo’u fale i Puerto Rico. O se galuega tele le saunia o lesona i aso uma, o le aso Gafua i le aso Faraile. Ae ou te fiafia i ai, ma na fesoasoani ia te au e atiina ae se alofa sili atu mo le autalavou o le Ekalesia.

Sa ou matauina o le tele o mea na maua e tamaiti aoga mai le seminare sa faalagolago i a latou sauniuniga. O lea afai e te manao e maua mai ni mea se tele mai se lesona o le seminare, ou te valaaulia outou e suesue i le lesona muamua ma mafaufau loloto moni lava. O mai i le vasega ma se naunau loloto mo le poto. O mai e pei o se tamaitiiti laitiiti, e mananao i taimi uma e aoao. Saunia ina ia mafai ona auai ina ia mafai ona outou aoao atu e le tasi le isi. Ma o mai ma ni fesili. O se isi talavou, o se mau e faitauina, pe atonu o se faamatalaga e fai e le faiaoga e mafai ona taliina ai au fesili.

E oo mai le aoaoga sili ona lelei i le taimi o soo se vasega po o sauniga a le Ekalesia pe a e saunia ma e mauaina ni uunaiga faaleagaga e oo mai o ni mafaufauga. Tusi i lalo, ona faatino lea. Vaavaai mo nisi mau po o lauga o konafesi aoao po o tusiga mai mekasini a le Ekalesia e uiga i na manatu. Mafaufau loloto i ai i lou mafaufau ma lou loto ma ia saunia e auauna atu, ona o le taimi lava e te maua ai nei upumoni i totonu ia te oe, o le Alii o le a faaaogaina oe e fesoasoani atu i isi.

Mulimuli ane, ina ua ou auauna atu o se peresitene o le misiona ma lo’u toalua, sa ou iloaina o le seminare o se sauniuniga lelei tele mo le galuega faafaifeautalai. I le tele o tausaga ua ou vaai ai i le mana ofoofogia o le talalelei ua faamanuia ai i latou o e na avea ma tamaiti aoga seminare faamaoni. Latou te faaaogaina mea na aoaoina i na lesona i luitau tetele i o latou olaga ua foi mai na luitau, e oo lava i le toe foi mai i le Ekalesia ina ua mavae se vaitaimi o le avea ai ma ni tagata le toaaga mai.

E taua tele outou i le Alii. E taua moni lava outou. O le galuega a le autalavou o le saunia mo le galuega faafaifeautalai ona faia lea o le galuega faafaifeautalai. Ia, e tatau ona outou malamalama ao outou faaauau ona faia le galuega faafaifeautalai, ma a o faaauau ona outou saunia, o lenei mea o le a uunaia ma taialaina lo outou tuputupu ae o se faifeautalai a le Alii. E te le tau faia se pine o igoa o faifeautalai e faia ai le galuega faafaifeautalai, aua ua e tauaveina le suafa o Iesu Keriso i lou loto ona o au feagaiga.

E faapena foi i le galuega o talafaasolopito o aiga ma le malumalu. Mo se faataitaiga, i le Eria o le atu Keripeane, lea ou te auauna atu ai, o siteki na e faaaogaina le autalavou o ni faatonu o talafaasolopito o aiga ua maua se pasene e maualuga atu o tagata ua sailia igoa mo galuega faalemalumalu ma faia galuega o le malumalu. I se tasi o siteki e toa 20 le autalavou o e na valaaulia e avea ma faufautua o talafaasolopito o aiga mo le tasi le tausaga a o lei lava lo latou matutua mo misiona. Ao latou asiasi atu i tagata o le ekalesia i o latou aiga e faaali atu ia te i latou pe faapefea ona fai le talafaasolopito o aiga, latou te talanoa i tagata i le ala ma ta’u atu ia te i latou e uiga i le malumalu ma talafaasolopito o aiga. O le galuega faafaifeautalai lena!

Ou te faamoemoe pe a latou auauna atu faamisiona, ua uma ona latou lagonaina le Agaga i se auala mamana—e faamoemoe i o latou aiga, ae afai e le o iina, ona mautinoa lava lea a o latou faia le galuega faafaifeautalai, talafaasolopito o aiga, ma o i le malumalu e galulue. Ona, pe a latou ulufale atu i le maota autu mo aoaoga faamasani a faifeautalai, ou te faamoemoe e leai se tasi o i latou e ta’u maia ia te au, “ua ou lagonaina le Agaga malosi atu iinei nai lo se isi lava taimi muamua i lo’u olaga.” Sa tatau ona latou lagonaina Lana uunaiga malosi ae lei oo mai iinei.

E alofa le Alii ia te outou. O Lana faaaliga vaaia e mo talafaasolopito o aiga, malumalu, ma le galuega faafaifeautalai e faia e outou. Ua i ai ia te outou tomai ma le malamalama. Pe a outou saunia lelei, e mafai ona outou faia lenei galuega. O le a faamanuiaina ma suia ai lou olaga.