Uunaiga a Tupulaga & Pisto
E alala le tusitala i Saltillo, Mekisiko.
Sa ou iu ane i se pati ma a’u uo uma lava, ae o tagata uma sa inupia.
Ina ua 12 o’u tausaga, o nisi o teineiti i la’u aoga fou na valaaulia au i se pati o le aso fanau. O le pati muamua lea faatasi ma nei uo i le aoga sa valaauliaina ai au. Ina ua ou fesiligia o’u matua pe mafai ona ou alu, na la fai mai leai ona e tuai tele ona amata le pati.
I se taimi puupuu mulimuli ane, sa ou maua ai se isi valaaulia. Sa ou toe fesili ai i o’u matua, ae na la toe fai mai e leai, ma sa oo ina ou ita. Pe le mafai ona ou fiafia?
Ona fuafuaina lea e se tasi o au uo mamae se pati. O au le tagata muamua sa ia valaaulia. Na vave amata le pati nai lo isi. E le faalauaiteleina ma faia e lata ane i lo’u fale. Sa ou fesili atu i ou matua mo se faatagaga e alu, ma la fai mai ioe! Sa ou fiafia lava.
Na oo mai le aso. A o aveina atu au e o’u matua iina, sa la fai mai o le a la toe pikiina au i le 10:00 i le po. Ina ua ou taunuu i le pati, sa ou mauaina ai a’u uo teine. E lua sefulu minute mulimuli ane, ou te le’i vaaia lava le teine fai aso fanau.
I ni nai minute mulimuli ane, sa sau se alii talavou ia i matou ma fesili mai “Pe na outou aumaia ni tupe mo le pisto?” Sa ia faia se faailoga e ta’u mai ai ia te au o le “pisto” o le pia. Sa ioe a’u uo teine i le talosaga mo tupe. E le’i i ai se tupe ia te au, o lea sa ou filifili ai e alu ese ma nisi o teine a o faia e lenei vaega la latou pisinisi.
Mulimuli ane, na taunuu mai le teine fai aso fanau—o se itula ua tuai ai. Sa ou faamanuia ia te ia, ma a o ma talanoa, na taunuu mai se loli tele. Na o mai i fafo ni alii se toalima ma tuu i lalo ni pusa pia se lua. Na potopoto faataamilo tagata uma ma amata ona tufaina atu le pia. Sa o i fafo au uo teine, ma sa tuua na o au, e matamata atu i na tagata talavou o tauivi e inu pia.
Na oo mai au uo teine ma ofoina mai ia te au nisi o pia. “Leai, faafetai lava,” sa ou fai atu ia te i latou. Na latou toe faatauanau mai. Sa ou toe fai atu leai. Na amata ona tatavale lou fatu, sa ou lagonaina se mea uiga ese, e pei o se tifaga matautia lea e avea ai au ma tagata autu ma sa maileia a’u i le ogatotonu o se nofoaga ese. Ona ou faalogoina lea o se pu o le taavale—o ou matua! Sa ou aluese vave mai ma se faatofa faigofie ma tamoe atu i le taavale.
Sa ou oso i totonu, ma manava loloa. Sa amata ona ou mafaufau i le lagona taufaafefe o le siosiomaga lea sa ou i ai. Na fesili mai lou tina pe sa lelei mea uma. “Ioe,” sa ou tali atu, “ae sa i ai se mea na faateia ai a’u.”
“O le a le mea na faateia ai oe?” o le fesili lea a lo’u tama.
“Na inu pia uma a’u uo, ma sa ou i ai iina, na faate’ia, ma faatalitali mo se mea lelei e tupu. Sa ou matua manao mo oulua uma e o mai iinei, ma o lenei ua ou iinei.” Sa ou tilotilo i le uati o le taavale; e lei taina le 10:00.
Na fai mai lo’u tina, “Ua faapena pati i le lalolagi. O le mafuaaga lena na ma le faatagaina ai oe e alu i pati muamua.”
O le po lena ina ua ou tatalo, sa ou faafetai atu i lo’u Tama Faalelagi ona sa oo vave mai o’u matua.
O i tatou o tagata o le Ekalesia o loo i le lalolagi, ae tatou te le pei o le lalolagi. Sa ou aoaoina faapea pe afai ou te faaauau pea ona auai atu i nisi o na pati, atonu ua ou pau atu i le solia o le Upu o le Poto e oo lava i le tulafono o le ola mama. O le toatele o a’u uo, e pauu atu i lenei mea, o le toatele o i latou e le auai i le Ekalesia, ae e oo lava i tagata o le Ekalesia lava latou e mafai ona ausia le tulaga o le pauu ese pe afai latou te le tumau mausali.
Ou te lagona le fiafia i lena faaiuga na ou faia e le inu pia. Sa ou manatu o le a ulagia mulimuli ane, ae o a’u uo na iu ina faaaloalo tele ia te au ona ua latou iloaina o’u tulaga faatonuina. Ina ua mavae lena, ou te le’i toe fefe e fai atu leai i se mea ua ou iloa o le a faatamaia ai au.