O se Malumalu e Afa le Taamilosaga i le Lalolagi

Robin Estabrooks, Virginia, ISA

I o’u tausaga talavou sa ou auai i le Ekalesia e le tusa ai ma faamoemoega o lo’u aiga. A o ou i le 20 o o’u tausaga, sa amata ona ou galue i lo’u talafaasolopito o aiga ina ua maliu lo’u tama. Na vave lava, sa avea a’u ma se ava pisi ma se tina e tausiaina ni fanau talavou, ma na taofia ai le galuega o talafaasolopito o aiga.

Ona e lei i ai ni ou aiga i le Ekalesia, sa ou maua ai se naunautaiga malosi e saili lo’u talafaasolopito o aiga. Sa ou fiafia i le faia o lena mea, ma moomoo mo nisi taimi e faia ai.

Ina ua 33 ou tausaga, sa faafuasei ona i ai se suiga e lei faamoemoeina ina ua amata ona faasolo ina le lelei lou ola maloloina. O le taimi muamua sa mafai ona ou savali sopo ma lo’u aiga, ae o le savalivali faataamilo i le poloka ua oo ina faigata. O le faamamaina o le fale i le lua itula i se aso Toonai ua le mafai, ma sa ou fiafia lava pe afai ou te mafai ona faauma le faamamaina i le masini. O le taimi muamua sa ou maua se lio tele o uo, o lenei o lau li’o o uo ua faaitiitia aua ou te le mafai ona toe i ai iina mo i latou faapei ona ou faia i le taimi ua tuanai.

O le taimi lenei sa ou toe amata ai ona faia lo’u talafaasolopito o aiga. O la’u tama teine na amata ona faia sailiiliga mo le itu o lona tama ma i le tasi o afiafi na faamaea ai le galuega lea na ou faaaluina ai le tele o tausaga e fai ai. Na ou faamaeaina ni nai augatupulaga i lau laina ma auina atu igoa i le malumalu mo galuega e tatau ona faataunuuina. Sa ou manao lava i taimi uma e alu atu i le malumalu mo tagata o lo’u aiga e fai e au lava, ae o lo’u ola maloloina ma le mamao mai le malumalu na faigata ai.

Ina ua uma ona tuuina atu igoa, sa amata ona ou tagi, i le lagonaina e pei ua ou faatoilaloina tagata o lo’u aiga talu ai o le a ou le i ai faatasi ma i latou i le aso faapitoa o le a faia ai sauniga mo i latou. O se vaiaso mulimuli ane, a o ou saini i luga o le FamilySearch.org e siaki ai le alualu i luma o a latou galuega i le malumalu, sa ou vaaia ai se mea ofoofogia. E le gata o le galuega ua maea, ae sa faia e tagata o le ekalesia i le Malumalu o Accra Ghana le galuega! Sa ou tei lava i le iloa o tagata i le afa o le taamilosaga i le lalolagi na faamaeaina galuega faalemalumalu mo lo’u aiga laitiiti. Na matuai maligi ou loimata i le mafaufau atu i taulaga a tagata o Ghana na latou faia i lo latou malaga atu i le malumalu mo lo’u aiga. Ou te matua faafetai lava mo na tagata o le itu o le Malumalu o Accra Ghana sa faia le mea na ou le mafaia: auai i le malumalu ma tuuina mai i lo’u aiga le faamanuiaga o sauniga o le malumalu.