Malamalama i le Autalavou E Te Aoaoina

O le faia o se taumafaiga e aoao e uiga i le autalavou e te aoaoina e mafai ona tatalaina le faitotoa i lo latou liua.

Ata

teacher-with-youth

O le tele o tagata talavou ua i ai le naunautai ma le malosi lea e mafai ai ona avea le aoao atu ma le fautuaina o i latou o se mea fiafia. Ae o nisi atonu o loo feagai ma ni luitau a o latou tuputupu ae ma matutua—i mea uma mai le taufetuunai i suiga i o latou tino, i le mafaufau mamafa i le aoga, i uunaiga faaleaganuu ia e taumafai e tauanau ese i latou mai le ola ai i le talalelei. E manaomia e le autalavou ni faiaoga e malamalama i ai ma alolofa ia i latou. Latou te manaomia ni faufautua e atiina ae se siosiomaga saogalemu mo i latou e aoao ma faatino ai mea ua latou aoaoina.

O nisi nei o mea e mafai ona fesoasoani e iloa ai e uiga i le autalavou a o e fuafuaina, saunia, ma aoaoina i latou i le ala a le Faaola:

1. O le autalavou e mananao ma e tatau ona aoao le aoaoga faavae. I se lalolagi o loo agai mamao ese mai tulaga faatonuina o le talalelei, o le autalavou ua matelaina mo le upumoni e faavavau. Latou te mananao ia aoaoina “mea e pei ona e i ai moni lava, ma e uiga i mea e pei o le a i ai moni lava” (Iakopo 4:13). O nei mea o loo maua i aoaoga faavae o le talalelei. A o e aoao atu, taulai atu i aoaoga faavae o loo maua i tusitusiga paia, o aoaoga a perofeta soifua ma aposetolo, ma isi tusi aloaia a le Ekalesia. Uunaia le autalavou e suesue i nei punaoa e i latou lava ia. O aoaoga faavae e i ai se uiga malosi (tagai i le Alema 31:5).

2. Ua faatuina e le autalavou lo latou faasinomaga. O loo latou taumafai e mafaufau po o ai i latou ma po o ai latou te mananao ia avea ai. A o latou saunia mo matafaioi i le lumanai, atonu o le a latou mafaufau po o a mea ua fuafuaina e le Alii mo i latou ma pe o le a mafai ona latou faia mea uma o loo faamoemoeina mai ia i latou. I le avea ai ma se tasi o matua po o se faiaoga, e mafai ona e musuia le talitonuga e uiga i le lumanai ma tuu atu le taitaiga i le sauniaina mo le lumanai. Fesoasoani ia i latou e faalatalata atili atu i le Atua ma fausia o latou olaga i luga o tulaga faatonuina o le talalelei. Aoao i latou i le taua o le malumalu ma la latou matafaioi i le fausiaina o le malo o le Atua.

3. E iloa e le autalavou pe a e alofa popole. Mo le autalavou ia auai moni lava i le aoaoina o le talalelei, e manaomia ona latou iloa e te alofa ia i latou ma e fiafia ia i latou o ni tagata taitoatasi. Faalogo ia i latou. Vaavaai mo le lelei ia i latou ma saunia au lesona i na uiga lelei. Faailoa atu lou talitonuga ia i latou ma tuuina atu le faamautinoaga o loo latou faatauaina ma manaomia.

4. O le autalavou e tele mea e fiafia i ai. O tagata talavou taitoatasi o se tagata e tulaga ese. Ia iloa o latou fiafiaga patino, manaoga, ma luitau. E mafai e lenei mea ona manaomia ai le aapa atu ia te i latou i tua atu o fonotaga masani faatulagaina, vasega, ma gaoioiga. E ala i le iloaina o i latou, o le a e maua ai ni manatu ma musumusuga e ala i le Agaga e uiga i o latou manaoga na e mafai ona uunaia ai le ala e te aoaoina ai i latou. A o lagonaina e le autalavou lou fiafia moni i o latou olaga, o o latou loto o le a sili atu ona matala mai i lau aoaoga ma le molimau.

5. E mafai ona maua e le autalavou ni tali i a latou fesili. O tagata aoao i vaitausaga uma lava e olioli i le mauaina o malamalamaaga o le talalelei, ae o lenei mea e sili ona taua mo talavou a o latou atiina ae o latou tulaga faatauaina ma talitonuga. O lesona o le talalelei e i ai se aafiaga tumau pe a aoaoina i se tulaga faaletagata patino—ma ola ai. Nai lo le tuuina atu i le autalavou ni tali, e mafai ona e faaaogaina ni metotia faafaiaoga ina ia valaaulia ma musuia i latou e maua ai ni a latou lava tali. O le a taitai atu ai lenei mea i le liua e sili atu le loloto—le sini tupito o aoaoga uma o le talalelei.

6. E mafai e le autalavou ona aoao atu e le tasi le isi. O le autalavou e i ai se fiafiaga i le tuuina atu o ni manatu i mea o loo aoaoina ma e fiafia lava e faasoa mai mea latou te iloa. E ala i au faataitaiga ma aoaoga, e mafai ona e fesoasoani ia i latou e aoao atu i le ala a le Faaola. Faatasi ai ma lau taitaiga latou te mafai ona amata e ala i le aoaoina atu o se vaega o se lesona po o le taitaiina o se talanoaga puupuu. A o latou maua le poto masani ma le mautinoa, o le a mafai ona latou maua ni avanoa e aoao atu ai se lesona atoa. Pe a aoao le autalavou mai le tasi i le isi, latou te fesoasoani e faamalosia le tasi ma le isi e tetee atu i uunaiga mai ia i latou e le tutusa o latou tulaga faatauaina.

7. O loo aoaoina e le autalavou le tulaga faataitai. O au peresitene o vasega ma korama e i ai ni valaauga paia e taitai a latou uo e tupulaga. Ae e tusa lava pe ua latou maua se poto masani faaletaitaiga, latou te manaomia le taitaiga mai ia te oe i le auala e taitai ai fonotaga, fesoasoani i isi e aoao, ma auauna atu. O isi avanoa faaletaitai e mafai ona oo mai i le fale a o e tuuina atu i le autalavou ni tiutetauave aoga.

8. O autalavou e aoao mai i matua ma isi tagata matutua o ni faataitaiga lelei. O se vaega taua o lou tiutetauave o se faiaoga e fesoasoani e faamalosia le sootaga i le va o le autalavou, o latou taitai, ma o latou matua. E mafai ona e fesoasoani i le autalavou e sue tali i le tele o a latou fesili, ae o nisi o a latou fesili o le a sili atu ona taliina e ala mai i o latou matua po o taitai. Faasino atu tagata talavou i o latou matua ma uunaia i latou e faamalolosia sootaga faaleaiga. Fesootai soo ma matua e uiga i le mea o loo e suesueina i le vasega ma faasoa atu ni taleni, ni mea ua faatupulaia, ma ni saofaga lelei ua e matauina i o latou atalii ma afafine. Fesili atu i mea e mafai ona e faia e fesoasoani ia i latou ao latou aoao atu a latou fanau.

O le fesoasoani i le autalavou ia liua e manaomia ai taumafaiga tuufaatasi a matua, taitai, faufautua, ma faiaoga, e aofia ai faiaoga seminare. Faatasi o le a outou mafai ona fatuina se aafiaga mamana e aoao ai mo le autalavou nai lo le mafai ona ausia eseese.