Tumau Malosi i Farani

Saunia e Mindy Anne Selu

Mekasini a le Ekalesia

I le avea ai ma se tasi o le Ekalesia i le Autau a Farani, o Pierre e faalagolago i le tatalo ma le suesue i tusitusiga paia e avea ma faaa’oa’o o lona faatuatua.

Ata

pierre-in-france

O le aoaoga e avea ma se pailate helikopa e le o se avanoa e maua e le toatele o tagata. Ae ina ua filifili Pierre O., 24, e lesitala i le Autau o Farani, sa ia maua tonu lava lena mea. O lenei ua i lona tausaga lua i le aoaoga e fa-tausaga, o loo faia e Pierre le mea sili na te mafaia e ola o se faataitaiga o e ua faatuatua, e ui lava i lona siosiomaga.

E nonofo e tusa ma le itula ma le afa i fafo atu o Bordeaux, i sautesisifo o Farani, o Pierre ua mamao ese mai ana uo, aiga, ma lona nuu o Rennes. O le falelotu aupito lata ane o se itula le mamao, o lona uiga ua le feoeoeai faatasi tele ma tagata o le ekalesia i le taimi o le vaiaso. “E le faigofie ona avea ma se tagata o le Ekalesia i le ami,” na fai mai ai Pierre, “aua o loo i ai le tele o faaosoosoga, ma o le mea moni e na o le lua lalolagi faafeagai. E faamasinoina oe i le tele o taimi i le ami e le faavae i luga o mea e te faia, ae po o ai oe.” E manao Pierre ia i latou o siomia o ia e vaai o ia e le inu ava malosi, ulaula, matamata i ponokalafi, pe pati—o gaoioiga masani ona tutupu i le autau—ona o le tagata o i ai o ia: o se tagata o le Ekalesia. Ao ia tauivi ina ia maua le faaaloalo a i latou o siomia o ia, o le tatalo ma le suesuega o tusitusiga paia e fesoasoani e faatumauina le malosi o lana molimau. “Ou te taumafai e le alu e moe e aunoa ma le faitauina o a’u tusitusiga paia muamua,” na ia faamalamalama mai, “ma ou te taumafai e tatalo i soo se taimi lava ou te mafaia ai.”

“O le faitauina o tusitusiga paia ma le tatalo na fesoasoani tele ia te au i le taimi atoa o lau aoga e iloa ai o loo soifua le Atua, o Ia o loo i ai iina—e aunoa ma le malamalama moni i le isi vaega o le talalelei,” na faamalamalama mai e Pierre. “Pau lava le mea na ou iloa sa i ai le Atua iina, ma o lena mea na fesoasoani ia te au e tumau ai i le ala sa’o.”

O lena faavae o le suesue i tusitusiga paia na lagolagoina Pierre i ana aoaoga uma ma le taimi nei foi i lana aoaoga i le autau. A o lei lesitala, na faamisiona Pierre i Montreal, Quebec, Kanata, lea na faamautu ai lana molimau ma le malamalama e uiga i le talalelei.

“O tusitusiga paia o se tasi o auala e sili ona lata mai e tali mai ai le Tama Faalelagi,” o lana tala lea.

E ala i ana tatalo i aso taitasi ma le suesuega o tusitusiga paia, e mafai e Pierre e le gata ina mauaina musumusuga, ae faapea foi ona avea ma se faataitaiga ia i latou i lana iunite o le autau. E ui o ia ma ana uo i le vasega atonu e le tele ni mea e tutusa ai sei vagana ai lo latou alolofa i le atunuu, ua iloa e Pierre o le mulimuli i aoaoga a tusitusiga paia, o le a avea ai o ia ma se tasi e mafai ona latou faaaloalogia ona o, ae le o le inoino i ona talitonuga.

O nisi mea e uiga ia Pierre

O a meaai e te fiafia e ai?

Ou te fiafia i le Breton galette (o se meaai e pei o se waffle mai Farani i sisifo). Ou te fiafia foi i le falaoa, sisi, sosisi ma pâté.

O a au mea e fai i taimi avanoa?

Ou te fiafia e o faatasi ma a’u uo. O nisi taimi na o le matou o lava e aai ma talanoa. Ou te fiafia e o e faatau ma lo’u toalua po o le o i le tifaga. Ou te fiafia foi e faitau ma taalo i ni taaloga. Ou te fiafia faapitoa lava i le tamoe ma le aau.

E faapei le tafao faamasani i Farani?

E faafaigata le o faatasi ma se teine e pei lava o se uo, sei vagana ua silafia e le teine pe faapefea ona tafafao faamasani tagata i le Iunaite Setete: o le o faatasi ina ia iloa e le tasi le isi ma avea ma ni uo. E taumafai taitai o le Ekalesia ina ia faia le tele o gaoioiga a talavou nofofua ona o lea e mafai ai ona tatou feiloai atu i tagata ma faia ai se tafaoga faamasani a se vaega toatele se tasi—o le auala lena na ma feiloai ai ma lo’u toalua.