Faasaoina o Lou Sapati
E alala le tusitala i Iuta, ISA.
Sa ou tuai! Sa ou faatatope le faia o se ofu manaia, uu mai se lipine mo le lauulu, tietie atu i le lotu, paka la’u taavale, ma faananati atu i totonu. Oka! Sa ou mauaina se nofoa i luga o le tulaga ao tulai i luga le epikopo e amata le sauniga faamanatuga.
Sa ou lauga i lena aso Sa, o lea sa ou tilotilo vave ai i a’u faamatalaga tusitusia, ia mautinoa ou te lei faagaloina se mea. E lei umi lava, sa foliga mai e pei ua uma le sauniga faamanatuga, ma sa ou alu i le Aoga Sa. O le isi faamanatuga manuia!
Ae sa manuia?
I le aluga o le vaiaso na sosoo ai sa amata ona ou mafaufau. Ua oo mai le isi aso Sa, ma a o ou nofo i le sauniga faamanatuga, ma mafaufau po o le a le uiga o le faamanatuga ia te au, na oo faafuasei mai se manatu ia te au: ou te tautino i vaiaso taitasi e manatua pea Iesu Keriso, ae pe o mamafa ia te au le faia o lena mea?
Sa ou manao ina ia sui, o lea sa ou filifili ai e fai se fuafuaga faalevaiaso.
-
I le taimi o le vaiaso, o le a ou faaaluina le taimi e mafaufau ai i la’u amio, ma ole atu mo le faamagaloga mo a’u agasala. O le a ou mautinoa ia vave taunuu i le lotu ina ia mafai ona ou faalogologo i musika e muai tataina ma lagonaina le Agaga.
-
I le taimi o le faamanatuga, o le a ou manatua Iesu Keriso ma Lana Togiola. O le a ou iloiloina ma le agaga tatalo mea sao na ou faia ma mea sese na ou faia. O le a ou fesili ia te au lava, “Le Alii e, se a se mea o toe ou te lei faia?” (tagai Mataio 19:20).
-
O aso uma i le mavae ai o le faamanatuga, ou te tatalo mo se fesoasoani e faaleleia atili ai ma ia manatua Keriso.
A o ou mulimuli i la’u fuafuaga, na faasolo ina ou fiafia i le faamanatuga! Ou te fiafia e tatalo i le Tama Faalelagi ma talanoaina ma Ia e uiga i lo’u olaga. Tusa lava pe na a la’u amio i le vaiaso ua tuanai, sa ou faafetai pea mo le Togiola a Iesu Keriso ma le avanoa e sui ai ma faaleleia atili. O lenei ua ou aoaoina o le faamanatuga e le mo na o le aso Sa; e mo aso uma.