O Clarence ma le Siamupini
Na sioa Clarence i fafo o le faamalama o le taavale ina ua iloa atu le uafu. O vaa na opeopea i le vai i luma o fale felanulanuai ma faleoloa. O Copenhagen, Tenimaka, o se aai matagofie e tumu i maota o tupu, maota tetele, ma paka. Sa le pei o le nuu o Clarence i Iuta, ISA. Na mafai e Clarence ona vaai faalemafaufau i auala pefu ia sa ia tamoe ai i tuuga ao tamaitiiti. O lenei ua avea o ia o se tagata o le au tamomoe a le Iunaite Setete, ma o a taeao o le a feagai ai ma se tagata momoe Tenimaka lauiloa i se tuuga taua.
Sa tu le taavale i se tamai falelotu lea ua amataina ai se sauniga a le Ekalesia.
A o nofo ane i lalo Clarence i le pito i tua o le sauniga, sa iloa mai o ia e se tasi o faifeautalai o loo nofo i luga o le tulaga mai se tusiga o talafou e uiga i le tuuga a taeao. Sa talosaga atu le peresitene o le paranesi ia Clarence e sau i luga ma fai se tautalaga.
Ina ua uma ona tau atu e Clarence pe aisea na ia asiasi atu ai, sa tulai i luga se tamaitiiti ma sii lona lima. “Pe e te manatu e mafai ona e faatoilaloina le siamupini Tenimaka?” na ia fesili ai.
Sa le mautinoa e Clarence le tala e fai atu. O le tagata tamoe Tenimaka na sa sili atu lona taimi i le maila i lena tausaga.
“Ae a na te mafaia,” fai mai ai se tasi o faifeautalai a o lei mafai ona tali atu Clarence. “Aua na te tausia le Upu o le Poto.” Sa ia susue ana tusitusiga paia i le Mataupu Faavae ma Feagaiga 89. Sa ia faitauina le folafolaga faapea o i latou e tausia le Upu o le Poto “e taufetuli a e le vaivai, ma o le a savavali ae le matapogia” (i le fuaiupu 20).
O le a se tala e mafai ona fai atu e Clarence? Sa ia iloa o le Upu o le Poto e moni. Ma a o laitiiti sa ia folafola atu e tausia pea. Ae e le faapea o lona uiga e mafai ai ona ia manumalo i lenei taufetuliga. O le manumalo foi e manaomia ai le faataitai ma le tomai. Ao tuua e Clarence le sauniga, sa ia mafaufau, “Ia, e leai se tasi mai le lotu o le a i ai i le tuuga taeao i se isi itu.”
O le afiafi na sosoo ai a o toleni Clarence mo lana tuuga, na ia tepa ae i luga ma vaaia faifeautalai e toalua ma se vaega o tama pe a ma le 17. Na latou o mai!
A o latou latalata atu, sa musumusu atu se tasi o faifeautalai ia Clarence, “Afai na e tamoe muamua i lou olaga, ia e sili atu ona tamoe i le po nei.” O le toatele o alii e le o ni tagata o le Ekalesia ae na o mai ma a latou uo e vaai pe matuai moni lava le Upu o le Poto.
Sa popole Clarence. I lenei tuuga, o lana taumafaiga sili atonu e le lava le lelei. Ae o le a ia tamoe mo se mataupu faavae o le talalelei a Iesu Keriso. E tatau ona ia manumalo. Sa le’i tatalo lava o ia ia manumalo muamua, ae sa ia maua se potu gaogao e fai ai se tatalo.
Sa ia tatalo, “Tama oi le Lagi, ou te iloa e moni le Upu o le Poto, ma ou te lei solia lava. Faamolemole ia faamanuia mai ia te au i le manumalo i lenei tuuga.” A o ia savali atu i le laina e amata ai, sa ia iloaina na faafofogaina e le Tama Faalelagi lana tatalo. Sa Ia talitonu i le finagalo o Lona Tama
O le afiafi, sa timuga ma palapala. A o amata e Clarence le tuuga, sa foliga mai e pei lava o le tele o isi tuuga o le maila sa ia tamoe ai. Sa saoasaoa le tuuga, ma o le siamupini Tenimaka sa i luma atu. Ae ina ua faauma e Clarence le taamilosaga lona tolu, na faafuasei lava ona le toe vaivai o ia. Sa amata ona ia tamoe e saoasaoa atu, ma e lei tiga. E oo lava i le fai si saoasaoa atu e lei tiga lava. Sa ia pasia le siamupini Tenimaka ma sa sili atu pea le saoasaoa.
Ina ua oo mai Clarence i le pioga, sa alaga atu lona faiaoga, “Alu lemu! E te le oo i le laina faatini!” Ae na iloa e Clarence e mafai ona ia tamoe pea. Ma ina ua maea le tuuga, sa sili atu ma le 50 iata (46 m) le mamao ma le tagata tamoe Tenimaka! Sa ia iloaina sa ia manumalo ona sa tali mai le Tama Faalelagi i lana tatalo ma ona o le Upu o le Poto e moni.