Sa Ou Lagona le Le Agavaa
Ua taofia le igoa, Stockholm, Suetena
Ata na tusia e Allen Garns
Ina ua valaauina au e avea ma peresitene o le Aualofa, sa avea au ma se tina talavou e pisi tele. Sa ou ola ae i le Ekalesia ma ola ai i lo’u olaga e tusa ai ma ona aoaoga, ae sa ou iloaina ou te le o atoatoa ma sa lagona le popole e uiga i lo’u mafaia ona fesoasoani i uso o loo tauivi i la’u uarota.
I se tasi aso Sa i le lotu sa faapitoa lava lou faanoanoa. I le aso atoa sa taofia au e uso o loo manaomia au. O nisi sa manaomia le fesoasoani i le uelefea, ma o nisi sa na ona manaomia au e faalogo ia i latou. Ona uunaia lea o au e le Agaga e aua le alu i totonu o le sauniga faamanatuga ina ua amata, ma o le mea na ou te’i ai, sa ou feiloai i se uso e le toaga mai i le fale faafiafia na manaomia le faamafanafanaga ma le fesoasoani ma e le mafai ona faatali seia oo i le faaiuga o le sauniga.
Ina ua uma le lotu, sa ou vaivai! Sa ou tagi i le taavale i le taimi atoa ao o i le fale. I lo’u mafaufau na tatagi mai upu nei: “Talanoa i le epikopo!” Sa ou lagonaina o le epikopo o le a i ai se mea atamai e ta’u mai ia te au pe faapefea ona mafai ona ou lagonaina le faamama avega i lo’u valaauga, ae ou te lei manao e faalavelave ia te ia i le faaiuga o se aso umi i le lotu. Sa ou filifili e aua le valaau atu ia te ia ae tatagi loa le telefoni. O lou epikopo. Sa uunaia o ia e valaau mai ia te au.
Sa ou fai atu i le epikopo sa matuai faavaivaia au ina ua matua tele mea e manaomia ona foia vave ma sa ou lagonaina le faanoanoa tele ona sa ou lagonaina le le mafai ona ou fesoasoani i nisi uso. Sa ia faalogo ma le onosai. Sa ma talanoa i nisi o fesili o le uelefea na oo mai i le taimi o le aso, ma sa ou lagonaina ua sili atu le lelei.
Ina ua uma le talanoaga, sa ou fai atu, “Sa ou manatu o le a i ai se mea atamai e te ta’u maia ia te au e uiga i auala e le lagonaina ai lea avega mamafa tu.” Sa ia tali mai na te moomoo na i ai se mea faapena e fai atu, ae o le mea e faanoanoa ai e leai.
E ui lava e le i taliina la’u fesili, sa ou lagonaina le fiafia ina ua ou tuu i lalo le telefoni. Sa ou lagonaina na tali mai e le Alii lo’u manaomia o le taitaiga ma le lagolago.
I le taimi o vaiaso na sosoo ai na toe foi mai lagona o le le saogalemu, ma sa ou tatalo ina ia malamalama i mea e tatau ona ou faia ina ia avea ai ma se peresitene o le Aualofa e sili atu ona lelei. I se tasi aso, a o ou faalogologo i le konafesi aoao, o ni upu na taulai i ai lo’u mafaufau, ma sa talanoa malosi mai le Agaga i lo’u loto. Sa ou malamalama o le mafuaaga na ou lagonaina ai le matuai le agavaa aua sa ou le agavaa a’u lava ia.
E ala i lana faataitaiga, na faaali mai e lo’u epikopo ia te au le taua o le faalogo i le Agaga Paia. O le Agaga o le ki lea i o tatou valaauga i le Ekalesia, e le o a tatou lava taleni po o tomai. Mo le taimi muamua i se taimi umi lava, sa ou lagona le filemu ma le mautinoa.
O loo leai pea sou poto masani ma o loo ou pisi pea i lo’u aiga e pei o le taimi muamua, ae ou te le o toe talitonu e tatau ona ou faatinoina atoatoa lo’u valaauga. O le Tama Faalelagi e mafai ona tuuina mai ia te au mea ou te manaomia e faataunuu ai Lona finagalo ma e mafai ona faalauteleina a tatou taumafaiga pe afai o tatou tausia Ana poloaiga.