Taulimaina o le Sau Vave i le Fale
E alala le tusitala i Iuta, ISA.
O le toe foi vave mai i se misiona, e tusa lava po o mafuaaga o le soifua maloloina, e mafai ona avea ma se aafiaga faataumaoi. Sa faapena mo au. Ae e mafai ona e faia o se laasaga i luma, ae lē o se laasaga i tua.
Ata na pueina e Colin Ligertwood
Sa alu tama i fafo atu o le matou nuu i se malaga faapisinisi, o lea, pau le tagata e toatasi na faafeiloaia au ina ua ou setusetu ese mai le vaalele mai la’u misiona o lo’u tina. Sa ia fusi mai au ma ma fetagisi.
Sa ou faia le tele o ni suesuega faafomai e mafai ai, ae na le mafai ona maua e fomai le faafitauli. O le ave ese o lau pine faifeautalai i le iva masina e vave ai o se mea sa sili ona faigata ua ou faia. Sa ou lagonaina e pei o se tagata toilalo mo le le faaumaina o la’u misiona.
Faamoemoe e Avea ma se Faifeautalai
O le avea ma se faifeautalai sa masani ona i ai i a’u fuafuaga. Ina ua alu lo’u tuagane matua i lana misiona, sa ou ofuina se pine o igoa na ou faia e faamavae atu ai ia te ia. Ina ua fofogaina mai le suiga o tausaga o le misiona i le 2012, faatoa atoa lou 19 ma na iloa o le faasilasilaga o se tali i a’u tatalo. Sa ou siva faataamilo i le potu, faatumu a’u pepa o galuega i lena aso, faatulaga o’u taimi faatulagaina faafomai, ma auina atu ou pepa i totonu o le vaiaso. Sa ou maua lo’u valaauga i le Misiona a Kalefonia Anaheim i le lua vaiaso mulimuli ane ma lipoti atu i le nofoaga autu e aoao ai faifeautalai i le lua masina talu mai lena taimi.
Ina ua ou taunuu i le misiona, sa matuai naunau i le galuega faamisiona “masani a se faifeautalai fou” ma e lei manao lava e faifai lemu. O maua ma lou faiaoga na faia moni lava ni lesona aua sa ma fiafia lava e aoao atu. Ia te au, o le avea ma se faifeautalai o le mea aupito sili ona masani ai i le lalolagi. Sa ou matamuli ma tauivi i nisi o taimi, ae sa leai se mea e aupito sili ona ofoofogia ia te au nai lo le avea ma se faifeautalai.
Pe tusa ma le valu masina i totonu o la’u misiona, na tuuina mai ai ia te au ma a’u soa ni uila vilivae ona o le le lava o taavale. Ou te le’i tietie i se uila mo se taimi umi ma e lei mautinoa atoatoa pe faapefea ona faia i se sakete, ae sa ou fiafia lava pea. Ina ua mavae ni nai vaiaso, e ui i lea, sa ou lagonaina se tiga i lo’u itu lea na sau ma toe alu ese. Sa ou le ano i ai ma faaauau le galue.
Sa amata ona oso soo le tiga ma faateteleina seia oo i se tasi po na tatau ai ona ave au e la’u soa i le potu mo faalavelave faafuasei. Sa ou faia ni suesuega faafomai se tele ae sa le mafai ona maua e fomai le puna o lo’u tiga.
I vaiaso na sosoo ai, sa ou tatalo i le Tama Faalelagi e aveese le tiga ma na mauaina le tele o faamanuiaga faaleperisitua, ae sa na ona faateteleina. Sa tiga i soo se tulaga e i ai lou tino; sa tiga i taimi uma. Ae sa ou filifili e mafai ona ou faamasani i ai ma faaauau ai pea.
I se tasi aso na ou solofa ai i lalo i autafa o le auala, ma le mafai ona toe migoi. Sa aveina atu au i le falemai e fai ni suesuega ae na leai ni tali. Sa ou taumafai e faaeteete ma saofai i nofoa uumi o le fale faatali pasi faatasi ma a’u soa ma aoao atu i tagata a o latou faatalitali mo a latou pasi. Sa ou nofo ai i lesona, ma u lo’u laugutu e faagalo ai le tiga. Na iu lava ina ua ova lou le faaeteete o au lava ia ma toe iu ai i le falemai. Sa ou iloa e mafai ona ou faaleagaina tumau au lava ia pe a ou nofo ai i la’u misiona. Ina ua mavae le tele o tatalo, sa ou maua ai le tali e tatau ona ou alu i le fale ina ia foia ai o’u faafitauli o le soifua maloloina.
O se Laasaga i Luma
Ina ua ou iloaina sa ou i ai tumau i le aiga, sa ou matuai faanoanoa lava. Ae sa ou taumafai i le mea sili e faatumauina lo’u faatuatua ma suesuega faaletusipaia. Sa taulimaina lelei le tulaga e lo’u aiga, ae o isi tagata na siomia au e lei mautinoa pe faapefea ona tali mai i lo’u tulaga. Na latou tuu fesili pea lava pea ia te au, ma sa faigata ona taofiofia ou lagona. O se tasi alii, e ui i lea, na valaau faafuasei mai ia te au ma ta’u mai ia te au o lona atalii na vave sau i le fale mai se misiona i se taimi ua leva. Na ia fai mai o lenei tofotofoga sa i ai le malosiaga e faaumatia ai lo’u faatuatua ma le fiafia ma e masani lava ona tupu i le toatele o faifeautalai na toe foi vave mai. “O le mea e tatau ona e manatua,” na ia saunoa ai, “e faapea, e pau lava le mea afai o loo e taumafai i le malosi e te mafai ai ona e ola amiotonu i lou olaga, o taimi uma lava o se laasaga agai i luma e tusa lava po o le a se mea e tupu e le mafai ona e pulea.”
Na avea lena mea ma au mau tauave, ma sa ou faalagolago tele i ai mo le tausaga na sosoo ai. Mo le valu masina sa tau le mafai ona ou savali, ae o tagata e faamasinoina lava au pe a latou iloaina na ou sau vave i le fale. Sa fai mai sa i ai tagata e sili atu le leaga o tulaga faalesoifua maloloina na i ai ae na faamaea ona auauna atu. Latou te lei malamalama pe aisea na le mafai ai ona ou faamaeaina, e ui lava i faigata faafomai. Sa tiga tele le faalogo i lenei mea aua na ou fiafia tele i la’u misiona, ae sa i ai lou faatuatua o le Tama Faalelagi e i ai se faamoemoega mo lo’u tofotofoga, ma o le a avea o se laasaga i luma.
Sa ou toe amata ona aoga ma amata ona tafafao faamasani. Sa ou vaaia ua ou faasolosolo ina manuia, ae sa ou lagonaina o le a ou vaai pea i la’u misiona faatasi ma se vaega itiiti o le oona matuitui. Ona faamanatu mai lea e sa’u uo e mafai e le Togiola a le Faaola ona faamaloloina tiga uma ma le oona matuitui. Faatasi ai ma Lana fesoasoani e mafai ona ou fiafia pe a mafaufau e uiga i la’u misiona.
Sa ou tootuli i lalo ma tatalo i lo’u Tama Faalelagi. Sa ou tau atu ia te Ia e uiga i lo’u tiga ma a’u taumafaiga ina ia faamaloloina, ma faamafanafanaina. Sa ou fesili atu pe o le a Ia aveese le oona sa ou lagonaina. Ina ua uma la’u tatalo, na faapupulaina e le Alii ou mata e vaai i la’u misiona mai Lana vaaiga. O la’u auaunaga ma le toe foi vave mai o se vaega o le fuafuaga a le Alii ina ia fesoasoani ia avea au ma le tagata e finagalo o Ia ia ou i ai. Sa ou vaaia vavega sa Ia tuuina mai talu ona ou sau i le fale. Sa avea o se auala faigata, ae o lenei ua mafai ona ou tepa i tua i lo’u sau vave i le fale ma le filemu, ma le iloaina o le Atua e faia le mea e sili ona lelei mo au.