O Le Auala Na Ou Iloa Ai
O Le Aoao e Avea ma se Malamalama i le Lalolagi
E alala le tusitala i le Ripapelika Tominika.
Sa ou fanau i le Repapelika Tominika ma sa ou ola ae i le Ekalesia. Sa ou ola ae o siomia e ni taitai maoae na taumafai e fesoasoani ia te au e mulimuli i le ala sa’o. Sa ou miti e auauna atu i se misiona ma fesoasoani i tagata.
Ona sa malaga atu lo’u tama i le Iunaite Setete e taumafai e sue se olaga sili atu ona lelei mo i matou, sa tausia e lo’u tina ou tuafafine ma au na o ia lava. O nisi taimi sa ou lagonaina le tuuatoatasi, ae e lei tuua lava na o au aua e mafai ona ou talanoa e uiga i soo se faafitauli i lo’u olaga ma o’u taitai o le Ekalesia.
Ina ua matou siitia atu i le Iunaite Setete, na amata ona matautia tofotofoga mo au. Sa matou auai i se paranesi laitiiti ma sa i ai ni taitai maoae na mananao e fesoasoani ia te au, ae o a’u uo aoga na taumafai e toso ese au mai le ala o le talalelei. Ae faanoanoa ai, sa amata ona ou talanoa atu i lo’u tina i se auala le alofa ma e seasea faalogo i lana fautuaga.
Ou te alu i le lotu i aso Sa uma lava, ae ou te lei maua moni le manao e alu, ma sa ou le iloa pe ou te manao e alu i se misiona.
I se tasi taeao sa ou susueina le Tusi a Mamona, ma na matala tonu lava i le itulau o lau mau e fiafia i ai, 3 Nifae 12:14–16:
“E moni, e moni, ou te fai atu ia te outou, ou te tuu atu ia te outou ia avea outou ma malamalama o lenei nuu. O se aai e faatu i luga o se maupuepue e le mafai ona lilo.
“Faauta, pe tutu ea e tagata se lamepa ma tuu i lalo o se pusa fua saito? E leai, ae latou te tuuina i luga o se tuugalamepa, ma o le a susulu atu ai lona malamalama ia i latou uma o e o i totonu o le fale.
“O lea ia faasusulu atu ai lo outou malamalama i luma o lenei nuu, ina ia latou vaai ai ia outou galuega lelei ma viia lo outou Tamā o i le Lagi.”
Na tuuina mai ia te au le olioli tele e faitau i lenei mea aua na fesoasoani ou te manatua ai le mea na ou aoaoina i le seminare ma le matua ofoofogia o le fuafuaga a lo tatou Tama. O lea sa ou filifili ai e taumafai e avea ma se malamalama i le lalolagi.
Sa ou valaauliaina tausoga e toalua e o mai i le lotu. O se tasi sa le toaga mai, ma na toaga mai. O le isi e le o se tagata o le Ekalesia, ma sa mafai ona ou papatisoina o ia.
O se tausaga mulimuli ane sa ou maua ai lo’u valaauga faamisiona e auauna atu i Kalefonia, ISA. A o ou auauna atu, sa ou vaai e aunoa ma se masalosalo o le talalelei moni lenei a Iesu Keriso. A o ou fesoasoani i tagata, sa faatupulaia pea lava pea la’u molimau, ma o taimi uma lava ou te faitau ai a’u tusitusiga paia, sa ou taulotoina lava i taimi uma le fuaitau i le 3 Nifae ia avea ma se malamalama i le lalolagi.