O Lou Faamanuiaga Faapeteriaka

Ua faamatalaina e Peresitene Monson se faamanuiaga faapeteriaka o “se Liahona patino e e faatautaia lau malaga ma taialaina lou ala.” O le a la lenei faamanuiaga, ma e mafai faapefea ona fesoasoani e taialaina lou olaga?

O le a le faamanuiaga faapeteriaka?

E lua faamoemoega autu o lou faamanuiaga. Muamua, o le a folafola atu ai lou tupuaga, po o le fea ituaiga o le aiga o Isaraelu e te i ai. Lua, o le a maua ai faamatalaga e fesoasoani e taialaina ai oe. E mautinoa lava o le a maua ai i lou faamanuiaga folafolaga, apoapoaiga, ma lapataiga.

O le fia o o’u tausaga e tatau ona maua ai lo’u faamanuiaga?

E leai se tausaga faatulagaina, ae e tatau ona lava lou matua e te talisapaia ai le natura paia o le faamanuiaga. E toatele tagata o le Ekalesia e amata ona mafaufau i le mauaina o o latou faamanuiaga i le amataga o o latou tausaga talavou.

E faapefea ona ou maua le faamanuiaga?

Muamua talanoa i lou epikopo po o le peresitene o le paranesi. Afai ua e saunia ma agavaa, o le a e maua se pepa faataga. A mavae lena, e mafai ona faatulaga se taimi atofaina e feiloai ai ma le peteriaka i lo outou eria.

O le a la’u mea e fai i lo’u faamanuiaga?

Teu i se nofoaga malu, ma faitau soo i ai. Manatua, o lou faamanuiaga e paia ma e patino lava ia te oe. E mafai ona e faasoaina atu i tagata o lou aiga patino, ae e le tatau ona e faasoaina atu faalauaitele. E le gata i lea, o faamanuiaga uma lava o loo ta’ua i lou faamanuiaga faapeteriaka ua faavae i luga o lou faamaoni ma le taimi a le Alii.