Aoao e Faalogo
“Faalogo i a’u upu; savali i le agamalu o lo’u Agaga, ma o le a e maua le filemu ia te a’u” (MFF 19:23).
Ina ua iva o’u tausaga, sa faia se faatasiga faaleaiga i lo matou fale i Coimbra, Potukale. Sa pisi o’u matua i le faafiafiaina o o matou aiga. Sa talatalanoa ma talitaliē tagata uma. A o pisi lava tagata matutua, sa tonu ia te au ou te fia faia foi ni mea malie.
Sa latalata lo matou fale i le Vaitafe o Mondego, ma sa ou manatu o le a malie le alu e fagota. Ou te lei fia alu na o a’u, o lea na ou alu ai ma ave lo’u tuafafine e fa tausaga le matua. Sa ou lagonaina e tatau ona ou ta’uina i lo’u tina ma lo’u tamā le mea ma te o i ai. Ae sa pisi lava i la’ua e talanoa, o lea na ou filifili ai ma te o e aunoa ma le ta’uina i ai.
Sa ma savavali i luga o augutu o le vaitafe seia oo ina ma maua se nofoaga manaia lava. Sa ou tago tuu ni tamai maa i lo’u tuafafine e togitogi i le vai a o ou fiafia i la’u fagotaga.
Sa lei umi ae iloa loa e o’u matua ua ma le i ai ma lo’u tuafafine i le fale. Sa tietie solo i la’ua i le taulaga e su’e i ma’ua. E tele ni itula mulimuli ane, ae faatoa iloa e lo’u tamā ua leai ni a’u mea fagota. O lea na la sueina ai ma lo’u tina le auvai atoa seia oo ina tau mai ia i ma’ua.
Sa faafetai ou matua ina ua la maua i ma’ua, peitai sa le fiafia foi i la’ua ia te a’u. O se tulaga matautia le taaalo i autafa o le vaitafe e aunoa ma o’u matua, aemaise lava mo lo’u tuafafine laitiiti.
Mai i lenei aafiaga ua ou aoaoina ai e tatau lava ona tatou talanoa i o tatou matua—ma faalogo ia i latou. E mananao i latou e fai le mea sili mo i tatou. Sa ou aoaoina foi e taua le faalogo i le Agaga Paia. Sa taumafai le Agaga Paia e ta’u mai ia te a’u e le tatau ona ou alu ou te fagota e aunoa ma le ta’uina i o’u matua. Ae ou te lei faalogo. E ui lava sa ma faia ni mea malie, ae sa ma i ai lava ma lo’u tuafafine i se tulaga matautia. Afai tatou te faalogo lelei i o tatou matua ma le Agaga Paia, o le a tatou saogalemu.
Ata na tusia e Casey Nelson