“E faapefea ona ou faatalitonuina a’u uo o o tatou tulaga faatonuina e faatatau moni i le saolotoga ae le o se avega mamafa?”

Ua matua tele lava filifiliga i le olaga; o nisi e sa’o, ao nisi foi e sese. Ua tuuina mai e le Tama Faalelagi ia i tatou tulaga faatonuina e fesoasoani tatou te faia ai filifiliga lelei. A tatou ola ai i tulaga faatonuina, e faamanuiaina ma puipuia i tatou (tagai i le Roma 8:28; Mosaea 2:41; MFF 130:21). A tatou le ola i tulaga faatonuina, tatou te le maua na faamanuiaga, ma e mafai ona tatou manunua ai faaleagaga ma o nisi taimi e faaletino.

O i latou o e ola i tulaga faatonuina o le talalelei latou te le o lafoaia o latou faitalia: o loo latou filifili e faia mea e aumaia ai ia i latou faamanuiaga ma le filemu o le loto. Ua latou iloa o le lē usiusitai e na ona aumaia ai o faafitauli i o latou olaga—o faafitauli latou te filifili e aloese ai.

O tulaga faatonuina o le Ekalesia, e pei o tulaga faatonuina o loo maua i le Mo le Malosi o le Autalavou, ua faavae i aoaoga faavae, po o upumoni e faavavau. Mo se faataitaiga, o o tatou tino o malumalu o o tatou agaga (tagai i le 1 Korinito 3:16). O se tulaga faatonuina e faavae i lena aoaoga faavae o le Upu o le Poto: tausi i lou tino e ala i le taumafa i meaai lelei, ma aloese i fualaau oona ma vailaau leaga e fai ma vaisū.

O le mea lea, a o e ola i tulaga faatonuina, o loo e ola e tusa ai ma upumoni e faavavau ua tuuina mai e le Tama Faalelagi ia i tatou. “E tuu faasaoloto foi outou e le upu moni” (Ioane 8:32).

O Le Usiusitai e Aumaia Ai le Saolotoga

A o ou taumafai e usiusitai i upu a perofeta, ou te maua i taimi uma faamanuiaga faaletino ma faaleagaga mai le Atua. Ona ou lagona ai lea o le faateleina o lo’u lototele i le faiga o filifiliga, ma iloa ai e a’u uo na ou totogiina le tau o le usiusitai ina ia maua ai lenei saolotoga sili atu. Molimau atu ma le lototoa i faamanuiaga o loo e fiafia ai i le avea ma se tagata usiusitai o le Ekalesia. O le a e faatalitonuina au uo i au upu ma faataitaiga, o le ola i tulaga faatonuina e le faaitiitia ai lou saolotoga ae o le faia o filifiliga sese e faaitiitia ai. O tulaga faatonuina musuia e faasino atu ai i tatou i se itu ia fai ai filifiliga lelei, ma mafai ai ona matalatala tele faitotoa o avanoa. O le tele o taimi e mananao ai a’u uo i lena lava saolotoga.

Elder Madsen, 21, Misiona a Initonesia Jakarta

Faamalamalama Atu i Ai o Loo E Fiafia

Sa fesiligia foi a’u e a’u uo, tagata o la’u vasega, faapea foi i o’u faiaoga i le aoga e uiga i o tatou tulaga faatonuina. Fai mai i latou o tulaga faatonuina o la tatou Ekalesia ua matua mamafa tele. Nai lo lo’u finau atu ia i latou, sa ou talosaga i ai mo so latou taimi ou te faasoa atu ai ia i latou mea uma e uiga i tulaga faatonuina o la tatou Ekalesia. Sa ou faaali atu ia i latou o loo ou fiafia lava ma mafanafana i le ola ai ia tatou tulaga faatonuina. Ou te lei faaaogaina foi o tatou tulaga faatonuina e fai ma ’alofaga e misia ai nisi o gaoioiga a le aoga. Nai lo lena, sa ou fautuaina atu nisi o manatu mo gaoioiga a le aoga e mulimuli ai i tulaga faatonuina a la tatou Ekalesia. Sa ou faasoa atu foi ia i latou ni vaega e lelei ai le mulimuli i na tulaga faatonuina.

Ailyn L., 19, Davao, Filipaina

Valaaulia Au Uo i se Gaoioiga

Ua tuuina mai e le Tama Faalelagi le faitalia i Ana fanau uma lava. E ese a tatou tulaga faatonuina mai tulaga o le lalolagi, talu ai la o lea, e tele taimi tatou te manatu ai e le mafai ona tatou faia nisi o mea. Ae ua ia i tatou le mana e filifili ai, ma e tatau ona tatou filifilia i taimi uma le mea e sili mo i tatou, ina ia tatou le faamanualia ai o tatou tino ma lo tatou tuputupu a’e faaleagaga.

Valaaulia au uo e o mai i se gaoioiga a le Ekalesia, ma faaali atu ia i latou le auala e mafai ona tatou faia ai ni gaoioiga eseese atoatoa ma le fiafia e aunoa ma le lafoaia o o tatou tulaga faatonuina. Taumafai i taimi uma ina ia ogatasi lou olaga ma le Agaga Paia, ma o le a sili atu ona faigofie mo oe le faia o filifiliga sao ma avea o se faataitaiga lelei.

Amanda V., 18, Curitiba, Pasila

Fai Le Mea Sa’o

O le tausaga ua te’a, sa i ai ni a’u uo sa le faaaloalogia o’u tulaga faatonuina. Sa latou fai mai, o a’u e lē mālie, ma o o’u tulaga faatonuina ua ou le maua ai se saolotoga pe fai ai ni mea malie. Sa ou manatunatu loloto, tatalo, ma faitau i tusitusiga paia ina ia faatasi mai le Agaga Paia ia te a’u ma tuuina mai lo’u malosi faateleina. Ona ou filifili lea e ta’u atu i a’u uo ou te faia ni mea malie i se isi auala—o le le ulaula, ma le le inu pia. O nei tulaga faatonuina ua aumaia ia te a’u le tele o le saolotoga, e sili atu nai lo i latou, aua o loo saisaitia i latou e le pia ma le tapaa. Ina ua uma ona ou ta’u atu ia i latou lea mea, sa latou malamalama ia te a’u. Ae ui lava i lea, sa ou filifili e suia a’u uo. Sa tuua na o a’u mo se taimi, ae mulimuli ane sa ou maua ai ni uo e tutusa o matou tulaga faatonuina, ma o lea la ua lelei ai la’u faalogoga. O le a faamanuiaina oe e le Tama Faalelagi pe a e faia le mea sa’o.

Belén G., 15, Colonia, Iurukuei

O Tulaga Faatonuina E mo Lo Tatou Manuia

E i ai foi a’u uo e faapena o latou manatu e uiga i tulaga faatonuina o la tatou Ekalesia. O le taimi muamua sa ou tau musu e faamalamalama i ai, ae na ou iloa o le a latou le malamalama pe a tatou le ta’uina atu. Faailoa atu ia i latou o tulaga faatonuina ua tuuina mai e le Alii mo le manuia o o tatou agaga ina ia le faamanualia i tatou e faatosinaga lē lelei. O tulaga faatonuina e pei lava o faatonuga i le taimi o se suega. Afai e te le mulimuli i ai, o le a mautinoa lava lou le pasi. Ma e pei lava o le taimi o se suega, e mafai ona e filifili e te mulimuli ai pe leai. E i ai lava le taimi o le a talisapaia ai e au uo lou tutumau i le tausiga o tulaga faatonuina o lau Ekalesia, ma e mautinoa lava o le a faamanuiaina oe.

Cleem L., 18, Tanjay, Filipaina

O Poloaiga e Puipui Ai i Tatou

O poloaiga ia e ono vaaia o ni tapu, o ni puipuiga moni lava. Ua tuuina mai e le Atua ia taiala e puipui ai i tatou i vaega uma lava o o tatou olaga (faaletino, faalelagona, ma le faaleagaga). Ua tatou iloa le tulafono faaletino o le saogalemu, o le aua nei tago i se ogaumu vevela. E moni, e mafai ona e tago i le ogaumu, ae o lona uiga o le a e ola ma le taunuuga o se mu. Afai e te filifili e matamata i se ata mataga pe soli le Upu o le Poto, o le a e ola ai ma “manu’a” e tiga. O faaosoosoga e mafua ai ona sui la tatou taulaiga mai le Alii i le faamalieina le tumau, o le le amanaiaina o taunuuga o a tatou agasala. A tatou faia se filifiliga, ua tatou filifilia foi ma le taunuuga, e tusa lava pe tatou te lei fuafuaina. E pei ona fai mai soo lava lo’u tina, “A e fuafua e te solia se poloaiga, ua i ai lou faitalia ma mafai ona fai le mea o loo e naunau i ai, ae o le a lē o le mea lea e te manao i ai.” O le tausia o poloaiga o le a aumaia ia te au le fiafia moni lea ou te manao i ai.

Joseph G., 13, Iuta, ISA