O La’u Fanau Uma Lava
Karsen H. Cranney, Kalefonia, ISA
“O lau fanau uma ia?”
O se fesili lea ou te faalogo soo i ai, o lea sa le o se mea na ou te’i ai, ina ua ou faalogo atu o fesili ai le tamaitai sa i o’u tua i le laina i le faleoloa. Sa ou tilotilo atu i la’u fanau teine e ono tausaga ma le lima tausaga le matutua sa tutu i itu e lua o la’u tololi tumu, o la’u tamaitiiti laitiiti o loo luelue fiafia ona vae mai le nofoa i luma o le tololi, ma la’u pepe e fa masina o loo afisi i lo’u fatafata.
“Ioe, o la’u fanau uma lava,” na ou ataata ma ou tali atu ai.
Mai le taimi na amata ai lo ma aiga ma lo’u toalua, o le ma filifiliga i le toafia o se ma fanau e maua ma le taimi e maua ai na masani ona fesiligia e tagata lautele. O le filifiliga e fai le ma tamaitiiti muamua sa le o se mea talafeagai lea, pe a fuafua atu i tulaga faatonuina o le lalolagi. Faatoa te’a ma le ta’i 20 o ma’ua tausaga. I le faatoa uma ai ona faauu o lo’u toalua mai le kolisi, sa ia tau sailia ai lava se “galuega mautu.” Sa laitiiti le ma tupe maua ma sa leai foi se inisiua. Ae, sa le mafai ona teenaina le lagona, o loo faatalitali mai ma le naunautai agaga e o mai i lo maua aiga, o lea na ma agai ai pea i luma ma le faatuatua.
Sa faamanuiaina i maua i se maitaga manuia, o se pepe teine aulelei, ma se galuega mautu e agai atu i se matatā. Sa ou faafetai i le mafai ona ou nofo i le fale ma la’u tama teine ma la’u fanau e toatolu na mulimuli mai. Sa aumaia i latou uma i totonu o lo ma aiga i taimi uma e maea ai le oo mai o lagona loloto faaleagaga e ta’u mai ai ua talafeagai le taimi, ae sa lei faigofie ona faamalamalama atu i isi le mafuaaga o le a ma maua ai se fanau toatele ma sosoo tumua’i.
O le tele o fesili ou te maua soo e tele lava ina fesiligia ai la’u fuafuaga tatau: “Aisea ua soona toatele ai [lau fanau]?” “E te le iloa le taugata o le tausiga o se tamaitiiti seia oo atu i le 18 tausaga?” “E mafai moni ea ona e tuuina atu i tamaiti taitoatasi le taulaiga ma avanoa na te manaomia?” Ia, ma le isi fesili, “Ua tai uma mai la [lau fanau]?”
Ou te faamoemoe e lei uma [mai le ma fanau], e ui lava o tausaga e tausia ai fanau iti e faigata tele ma sili ona luitauina faaletino, faalelagona, faalemafaufau, ma faaleagaga. E i ai aso e manaomia ai ona fafaga tamaiti, manaomia le sui o napekini, manaomia le faanānā o pepe, ma solo o latou isu—i le taimi e tasi. O taimi faapena ou te fesiligia ai lo’u atamai ma mafaufau ai pe o o’u iloa la’u mea o loo fai. O aso faapena e foliga ai e taliē faatauemu mai ai leo o le lalolagi, e peiseai o fai mai, “Na ou fai atu foi!”
Ae ou te matua faafetai i na taimi mo aoaoga o le talalelei a Iesu Keriso ma lona faatauaina o aiga. O aso uma ou te faalagolago ai i mataupu faavae o le talalelei na aoao mai e perofeta ua mavae ma [perofeta] o i ai nei, e iloa ai o la’u galuega o le avea ma se tina—ma o se galuega lava—o le mea aupito taua lea e mafai ona ou faia i lo’u olaga, ma e tatau i ai taumafaiga uma lava. I tali i tatalo faatauanau, ou te maua ai fesoasoaniga faalelagi i aso uma e faia ai mea ua fautuaina a’u e fai i lo’u aiga. E ala mai i Lona alofa tunoa, e faatagaina ai e se Tama oi le Lagi alofa na aso o le vaivai tele e o mai faatasi ma taimi o le olioli loloto.
O lea la, i le tamaitai sa i ai i le faleoloa ma isi o e e tuufesili pe aisea o le a tuuto ai lo’u loto ma lo’u agaga i le tausiga o tamaiti, ou te tali atu ma le mitamita, “Ioe, o la’u fanau uma lava—ma le agaga faafetai tele, ma le loto atoa lava, ma e aunoa ma le faatuai!”