Puipuia mai mea e Le’i Faamoemoeina
Na matou iloa o le a puipuia i matou e le Alii i la matou malaga i le malumalu. Ae matou te lei iloa le tele o lo matou manaomia o Lana puipuiga.
Ina ua maea le tietiega pasi mo le 61 itula, sa taunuu loa le matou autalavou i le Malumalu o Manila Filipaina. I le faailogaina o le 20 tausaga o le malumalu, na sauniuni ai le autalavou a le siteki a Davao mo le iva masina mo le malaga, na auai atu i vasega o talafaasolopito o aiga, auai malosi i gaoioiga a le Ekalesia, sailiili ma sauniuni igoa o aiga, ma fesoasoani e saili tupe mo le malaga. Sa fiafia tagata uma ao o ese mai le pasi le toa 63 o i matou i lena po o le Aso Gafua. Sa matou faia se afiafi faaleaiga toatele i le faletalimalo o le malumalu, faatasi ai ma faafiafiaga o musika ma savali faaleagaga, ona matou taumafai loa lea e momoe.
I le lua o aso na sosoo ai sa papatisoina ma faamauina ai le autalavou mo le sili atu ma le 2,000 o o latou tuaa, ua tuuina atu ai i na tuaa le avanoa e talia ai le talalelei toefuataiina. Matou te lei lagona se fiaaai pe lelavavā foi a o matou galulue mai lea itula i lea itula i totonu o le malumalu. Sa matua malosi lava le Agaga. O nisi talavou na matua fiafia o latou foliga; o isi sa maligi loimata o le olioli.
Na vave lava foi ona oo i le taimi e toe foi ai i aiga. I ni nai minute talu ona alu la matou malaga, ae faasalaveia loa le toafilemu o la matou pasi i le feei o sailini a leoleo. O fafo, sa siomia i matou e taavale a leoleo, lea na faamalosia ai le tu a le matou pasi. Ona matou iloa atu lea o fana a leoleo na tau fai ta’i agai i luma. I na taimi o le atuatuvale, sa matou iloa ai, o pasese o se pasi na i luma teisi atu o i matou, na taofia faamalosi e ni tagata leaga, ma sa faaaoga e leoleo la matou pasi e fai ma a latou talipupuni!
Sa taumafai i matou o taitai e faia le mea sili e faatoafilemu ai tagata uma, ae na amata ona popole nisi. I le fenumiai na faatonuina ai i matou e leoleo e faapauu uma i le fola o le pasi. Ina ua mavae na minute na sili ona matautia, sa matou faalogoina se tagata o ‘e’ē mai matou o ese mai le pasi. O le mulimuli ai i faatonuga, sa faatopetope loa ona matou o ese mai le pasi ma o loa i se fale avanoa na latalata ane.
Mo le sili atu i se itula, sa matou nonofo ai i le fale pogisa, ma tatalo ma faalogologo mo le papā o fana. Mulimuli ane, na ta’u mai ai ua mafai ona matou toe o i le matou pasi. Ua maea le taugafana; na fasiotia ai ni tagata se toalua sa taofia faapagota ma tagata e toalua na taofia faamalosi le pasi.
Sa matou matua fefefe lava ao faaauau la matou faigamalaga. Ae peitai, ina ua tau te’a atu lagona faateia, sa matou iloa ai sa puipuia i matou. Na leai se tasi o i matou na faamanualia, ma na matou iloa sa i o matou luga le aao o le Alii. Sa matou lagonaina se mafutaga faalelagi ma manatu ai, atonu na latalata mai nisi o i latou na matou sui papatiso ai.
Sa ou mafaufau i le mau lea e faapea mai, “Ua noatia a’u, le Alii, pe a outou faia mea ou te fai atu ai” (MFF 82:10), ma sa ou fiafia aua e tausia e le Alii Ana folafolaga. A tatou tausia poloaiga ma faia pea ma le faamaoni o tatou tiute, e aofia ai le malumalu ma le galuega o talafaasolopito o aiga, o le a tatou agavaa mo faamanuiaga a le Alii—e aofia ai ma Lana puipuiga i taimi e sili ona tatou manaomia ai.
Ata na tusiina e Roger Motzkus