Savali a Faiaoga Asiasi
Puleaina ma le Atamai o Punaoa ma le Aloese Mai le Nofo Aitalafu
Ia aoao atu ma le agaga tatalo mau ma upusii nei po o se isi mataupu faavae o le a faamanuiaina ai uso o loo e asia, pe afai e manaomia. Ia molimau atu e uiga i le aoaoga faavae. Ia valaaulia i latou o loo e aoaoina e faasoa mai mea ua latou lagonaina ma aoaoina.
Puleaina o Punaoa
“‘Ola faautauta’ … o lona uiga o le [faasaoina] o a tatou punaoa, o le fuafuaina ma le atamai o mataupu tautupe, sauniuniga atoatoa mo lou lava soifua maloloina, ma sauniuniga tatau mo aoaoga ma atinae faalegaluega, ma tuuina atu le mafaufau tatau i le fausiaina o le aiga ma le uelefea faapea foi le atiina ae o le malosi faalelagona. … Afai tatou te ola atamamai ma faautauta, o le a tatou saogalemu e pei ua i ai i Lona alofi aao.”1
Peresitene Spencer W. Kimball (1895–1985).
“O a ni tomai tatou te manaomia e fesoasoani tatou te ola faalagolago ai ia i tatou lava? … I taimi popofou o le Ekalesia, na augani atu ai Polika Iaga i tuafafine e aoao e puipuia faama’i i totonu o aiga, faatulaga ni pisinisi i le fale, ma aoao tomai faatausitusi, teu tusi, ma isi tomai aoga. O loo faaaogaina lava na mataupu faavae i aso nei. O loo faaauau pea ona avea aoaoga ma mea e sili ona taua. …
“Na ou fesiligia nisi o epikopo po o a ni tomai o le ola faalagolago o le tagata ia te ia lava e sili ona manaomia e tuafafine i a latou uarota, ma sa latou faapea mai o le paketiina. E moomia ona malamalama tamaitai i taunuuga o le faatau faaaitalafu o ni mea ma le le ola fuafua i se paketi. O le tomai lona lua na lisiina e epikopo o le kuka. O taumafataga e saunia ma taumafaina i le fale e tele lava ina taugofie, e sili atu ona maloloina, ma fesoasoani e faamalosia sootaga faaleaiga.”2
Julie B. Beck, peresitene aoao o le Aualofa.
Aloese i Aitalafu
“Ou te fia fautuaina atu ni laasaga autu se lima mo le saolotoga tautupe. …
“Muamua, totogi lau sefuluai. …
“Lua, ia itiiti le tupe e faaaoga nai lo le tupe e te maua. …
“Tolu, aoao e teu [tupe]. …
“Fa, faamaoni i ou tiute tautupe. …
“Lima, aoao lau fanau e mulimuli i au faataitaiga.”3
Elder Joseph B. Wirthlin (1917–2008) o le Korama a Aposetolo e Toasefululua.
“A tatou nofo aitalafu, ua tatou lafoaia se vaega o lo tatou saolotoga taua ma lē mafaatauina ae tatou nofo pologa ai ona o a tatou lava faiga. Tatou te tuuina atu o tatou taimi, malosi, ma a tatou meatotino e toe totogi ai mea sa tatou nonoina mai—o punaoa semanu e mafai ona faaaoga e fesoasoani ai ia i tatou lava, o tatou aiga, ma isi. …
“Ina ia totogi a tatou aitalafu i le taimi nei ma aloese mai le aitalafu i le lumanai, e manaomia ai le faaaoga o le faatuatua i le Faaola—e le tau ina ia fai ia lelei atili le mea e fai ae ia lelei atili [i tatou]. E manaomia le tele o le faatuatua e fai atu ai na upu faigofie, ‘Matou te le gafatia.’ E manaomia le faatuatua e talitonu ai o le a sili atu le lelei o le olaga pe a tatou ositaulagaina o tatou manao ina ia gafatia mea tatou te manaomia faapea manaoga o isi.”4
Elder Robert D. Hales o le Korama a Aposetolo e Toasefululua.
Ata na pueina e Matthew Reier