Tala Faamamai o le Talalelei
Tulimatai atu i le Malumalu
O le malumalu o se fale po o le maota o le Alii. Pe a asiasi mai le Alii i le lalolagi, o le a afio mai o Ia i Lona malumalu. O i tatou o le aiga o le Alii. O i tatou o Lana fanau sa fanauina i le muai olaga [faaleagaga]. O le mea lea, e pei ona faapotopoto tama ma tina faalelalolagi ma o latou aiga i lo latou aiga, e faapena foi ona faapotopoto tagata o le aiga o le Alii e pei ona tatou faia i le maota o le Alii.
O le malumalu o se nofoaga o aoaoga. O iinei e toe iloiloina ai mataupu faavae o le talalelei, ma tatala mai ai upumoni loloto o le malo o le Atua. Afai tatou te ulufale i le malumalu i le agaga tonu ma faalogo lelei, tatou te o ese mai ua faamauoaina i tatou i le poto ma le atamai faaletalalelei.
O le malumalu o se nofoaga o le filemu. O iinei tatou te tuuese ai fuafuaga ma popolega o le lalolagi fesousouai i fafo atu. O iinei e tatau ai ona tulimatai o tatou mafaufau i mea moni faaleagaga, ona o iinei ua na o mea lava a le agaga tatou te popole i ai.
O le malumalu o se nofoaga o feagaiga, ia o le a fesoasoani tatou te ola amiotonu ai. O iinei tatou te tautino atu ai o le a tatou usiusitai i tulafono a le Atua ma folafola atu ai o le a faaaogaina lo tatou malamalama o le talalelei mo o tatou lava faamanuiaga ma mo le lelei o tagata. E fesoasoani sauniga faigofie ia i tatou ina ia tatou o ese atu mai le malumalu ma le faamoemoe maualuga ina ia taitaia o tatou olaga ia agavaa mo meaalofa o le talalelei.
O le malumalu o se nofoaga o faamanuiaga. E tuuina mai ia i tatou ni folafolaga ia e amata atu i le taimi nei seia oo i le faavavau, ae ua na o lo tatou faamaoni e faalagolago i ai. O le a fesoasoani ia i tatou e malamalama ai i le latalata mai o o tatou matua faaleagaga. O le mea lea ua tuuina mai ai ia i tatou le mana o le perisitua i ni fuataga fou ma le tetele.
O le malumalu o se nofoaga e faia ai sauniga e faatatau i mea faaleatua. O mea lilo maoae o le olaga, faatasi ai ma fesili a tagata e le’i taliina, e faamanino mai ai iinei: (1) O fea na ou sau ai? (2) Aisea ua ou i ai iinei? (3) O fea ou te alu i ai pe a mavae lenei olaga? O iinei e umia ai i se tulaga matua taua tele ia manaoga o le agaga lea e pogai mai ai isi mea uma lava o le olaga.
O le malumalu o se nofoaga o faaaliga. O iinei foi e mafai ona tuuina mai ai faaaliga e le Alii, ma e mafai e tagata taitoatasi ona maua faaaliga e fesoasoani ia te ia i le olaga. O le poto uma, o fesoasoaniga uma e mai le Alii, e tuusa’o mai pe le tuusa’o mai foi. E ui e le o i ai iina o Ia i le tino, ae o loo i ai o Ia e ala i Lona Agaga Paia ma ala mai i tamalii i le lalolagi o loo umia le perisitua. O lena Agaga latou te taitaia ai le galuega a le Alii iinei i le lalolagi. O tagata uma o e ulufale atu i lenei nofoaga paia i le faatuatua ma le tatalo, o le a maua le fesoasoani i tali mo faafitauli o le olaga.
O se mea lelei le i ai i totonu o le malumalu, le maota o le Alii, o se nofoaga o aoaoga faaleperisitua, o le filemu, o feagaiga, o faamanuiaga, ma faaaliga. E tatau ona taumasuasua o tatou loto i le agaga faafetai ma se faanaunautaiga malosi e maua le agaga o le sauniga.
E tatala le malumalu, faatasi ai ma ona meaalofa ma faamanuiaga, ia i latou uma o e tausia tulaga manaomia o le talalelei a Iesu Keriso. O tagata taitoatasi ua agavaa e mafai ona talosaga atu i lona epikopo mo se pepa faataga e ulufale ai i le malumalu.
O sauniga e faatinoina iina e paia; ae lē o ni mea e faalilolilo. O i latou uma o e talia ma ola i le talalelei ma tausia i latou lava i le mama e mafai ona auai i ia sauniga. E moni, ua valaauliaina ma faamalosiauina tagata faamaoni uma o le Ekalesia ina ia faaaoga le malumalu ma olioli ai i ona faamanuiaga. O se nofoaga paia o loo tuuina atu ai sauniga paia i tagata uma o e ua faamaonia lo latou lava agavaa e maua ai ona faamanuiaga.
Po o a lava mea ua ofoina mai e le talalelei e mafai ona faia i totonu o se malumalu. O papatisoga [mo e ua maliliu], faauuga i le perisitua [mo e ua maliliu], faaipoipoga, ma faamauga mo le taimi nei ma le faavavau mo e o loo soifua ma e ua maliliu, o faaeega paia mo e o loo soifua ma e ua maliliu, … aoaoga faaletalalelei, aufono mo le galuega o le talaiga, faapea ma isi mea uma lava o le talalelei e faatinoina iinei. E moni, o le faatumutumuga o le talalelei o loo i totonu o le malumalu. …
E le o i ai se faamoemoe o le a matua malamalama le tagata e “ulu atu” i le malumalu mo le uluai taimi i sauniga uma o le malumalu i ona tulaga atoatoa. O le mea lea ua saunia ai e le Alii auala e toe faia ai ma saga fai. O galuega o le malumalu e tatau ona faia muamua e le tagata mo ia lava; ona mafai ai lea ona faia mo ona tuaa ua maliliu po o uo i taimi uma lava e talafeagai ai fuafuaga. O le a tatalaina i lenei sauniga faitotoa o le faaolataga mo e ua maliliu ma o le a fesoasoani foi e faatumauina i mafaufau o e o loo soifua le natura, uiga, ma tiutetauave o le faaeega paia. E ala i le tausisia ia fou pea i le mafaufau le faaeega paia, o le a mafai ai ona faaleleia atili le faatinoina o o tatou tiute i le olaga a o i lalo o uunaiga o faamanuiaga faavavau.
O sauniga o malumalu o loo otooto auiliili mai i le faaaliga ua taua o le vaega e 124, fuaiupu e 39–41, o le Mataupu Faavae ma Feagaiga:
“O lea, e moni ou te fai atu ai ia te outou, o a outou faauuga, ma a outou mulumuluga, ma a outou papatisoga, mo e ua oti, ma a outou faapotopotoga paia, ma a outou mea faamanatu mo a outou taulaga osia e atalii o Levi, atoa ma a outou faaaliga i o outou nofoaga sili ona paia tou te maua ai talatalaga, ma a outou tulafono ma faamasinoga, mo le amataga o faaaliga ma le faavae o Siona, ma le mamalu, viiga ma le faamanuiaga o ona matata ua faauuina i sauniga o lo’u fale paia, o le ua poloaiina ai pea lo’u nuu ia fausia i lo’u igoa paia.
“E moni foi ou te fai atu ia te outou, ia fausia lenei fale i lo’u igoa ina ia ou faaali atu ai a’u sauniga i lo’u nuu;
“Aua ou te loto ina ia faaali atu i la’u ekalesia mea ua natia pea a o le’i faavaeina le lalolagi, o mea tau le augatupulaga o le atoatoaga o aso.”
I totonu o le malumalu e laei tutusa tagata uma i le paepae. O le paepae o le faatusa o le mamā a’ia’i. E leai se aia a se tagata eleelea e ulufale atu ai i le maota o le Atua. E le gata i lea, o laei tutusa e faailoa mai ai o luma o le Atua lo tatou Tama i le lagi, e tutusa tagata uma lava. O le tagata aisi ma le teutupe, o le tagata aoaoina ma le le aoaoina, o le perenise ma le tagata mativa e nonofo faatasi i totonu o le malumalu ma e tutusa lo latou taua pe afai latou te ola amiotonu i luma o le Alii le Atua, le Tama o o tatou agaga. E maua e le tagata i totonu o le malumalu le malosiaga faaleagaga ma le malamalama. O tagata uma lava e tulaga tutusa i luma o le Alii. …
Mai le amataga i le faaiuga, o le ulu atu i le malumalu o se aafiaga mamalu. E faagaeetia, ma malamalama ai. E maua mai ai le lototele. E auina atu lea sui ma le malamalama faateleina ma le mana e faia ai lana galuega.
O tulafono o le malumalu ma feagaiga o le faaeega paia e matagofie, fesoasoani, faigofie, ma malamalama gofie. O le tausia o ia tulafono e faapena foi ona faigofie. Peitai, e ofoofogia le mafai e le Perofeta o Iosefa Samita, o le sa lei aoaoina i ala o le lalolagi, ona faatulagaina ia tulafono i se faagasologa tatau e faataatiaina ai le faavae mo le alualu i luma faaleagaga o le tagata. O lea mea moni e tasi e faamaonia ai lo tatou faatuatua o Iosefa Samita sa taialaina e mana e sili atu i mana o tagata faaletino.
Mo i latou o e ulu atu ma le faatuatua i le auaunaga i le malumalu, i le tuuina atu atoa o le loto i le Alii, o le a avea lena aso o se aafiaga mamalu. O le a oo mai le malamalama ma le mana ia i latou. …
Soo se mea lava e liliu i ai se tasi i le talalelei faaalia a le Alii o Iesu Keriso, ae maise lava i totonu o le malumalu, e faateleina lava le talitonuga ua toe faatulagaina le galuega a le Atua mo Ona faamoemoega patino i aso e gata ai. O le auauna i le malumalu e taitai ma fesoasoani e faaagavaaina i tatou mo lenei galuega maoae: ia faataunuu le faaofuina o le tagata i le tino ola pea ma le ola faavavau” (Mose 1:39).
Ata na pueina e Craig Dimond
Ata o le Malumalu o Guayaquil Ecuador na pueina e Eduardo Ledeno Perez