Sa Latou Saunoa Mai ia i Matou
Tuputupu A’e i le Alii
Mai se saunoaga na tuuina atu i le faigalotu a le Iunivesite o Polika Iaga–Idaho i le aso 29 o Aperila, 2008. Mo le saunoaga atoa i le gagana Igilisi, asiasi i le http://web.byui.edu/DevotionalsandSpeeches.
A o ou toe faitauina le Tusi a Mamona, sa ou faitau ai i le mataupu i le Helamana lea tatou te faatoa iloa ai atalii o Helamana: “Ua oo foi ina i ai ia te ia atalii e toalua. Na ia faaigoaina le ulumatua ia Nifae, ma le uii, i le igoa o Liae. Ma ua tuputupu i laua i la le Atua” (Helamana 3:21; ua faaopoopo le faamamafa).
Sa le gata ina tutupu a’e nei tama e avea ma tagata matutua ma le iloa, alolofa, ma auauna atu i le Alii, ae na tumau lava i le ala e tasi i o laua olaga. O le manatu lenei—o le tumau lea i le faamaoni ma le tumau seia oo i le iuga—ou te manao e faamamafa i la’u tautalaga.
E tusa lava po o oe o le uluai tupulaga o lou aiga ua taliaina le talalelei, ou te manatu sa e tuputupu a’e ma e lagonaina ni faanaunauga faaleagaga. O i tatou uma lava, i se taimi lata mai po o se taimi mulimuli mai, e tutupu ae ma tuua nofoaga sa faafailele ma tausia ai i tatou. Sa ou nofo i lo’u aiga ao ou aoga i le kolisi, ae ana le amata lava ona ou faiaoga i le aoga ma siitia foi o’u matua, e le amata ona ou tuputupu ae ma ou ola na o a’u.
O lenei taimi o suiga o se aafiaga taua i la tatou tautinoga i le talalelei. Ua ofoina mai e le lalolagi ni faatosinaga e iloagofie ma iloagatā. E manaomia i taimi uma ona tatou fesili po o a mea o loo tatou faia i o tatou agaga. Pe o fafagaina ea le itu faaleatua o loo i totonu o i tatou, pe o taofia e a tatou amioga le Agaga mai le avea ma malosiaga autu i o tatou olaga?
O le ola i ni olaga amioletonu e le tele se taumafaiga po o se taimi e manaomia ai, e pei ona tatou matauina mai mea na tutupu i tagata o le Tusi a Mamona. I mataupu amata o le 3 Nifae, tatou te iloa ai o sa Nifae, o le toatele lava, e piopio; o sa Lamana, o e ua avea ma tagata na sili atu le amiotonu, ua pauu ese foi. Na tusia e Mamona:
“Ua ia te i latou le fanau e toatele, ua tuputupu ma ua tauau ina loto malosi ina ua matutua, ma ua faia e i latou la latou lava pule, a ua taitaieseina i latou. …
“Ua faapea foi ona puapuagatia sa Lamana, ua amata foi ona tauau ina vaivai lo latou faatuatua ma la latou amiotonu, ona o le amioleaga a le tupulaga” (3 Nifae 1:29–30; ua faaopoopo le faamamafa).
E tatau ona tatou nofouta ina ia aua nei “faia la tatou lava pule.” O se faaupuga faatupu manatu lena. O le uiga ia te a’u, ua latou vaai muamua ia i latou lava ma faamalie i tuinanau sa lapataia ai i latou e perofeta e aloese mai ai. Sa latou tosina atu i faaosoosoga ma faatosinaga a Satani. I nisi taimi i o tatou olaga, e tatau ia i tatou taitoatasi ona faia le filifiliga e opoopo mai lo tatou faatuatua po o le “tauau ina le faatuatua” po o le “fouvale ma le loto i ai i le talalelei ia Keriso” (4 Nifae 1:38).
Maimau pe ana mafai ona ou fai atu ia te outou, o loo i ai se fofō faapitoa e tasi lava le taimi e fai ai lelei mea uma, ina ia mautinoa ai e le faapologaina i tatou e nei faatosinaga, ae e leai se mea. Peitai, o loo i ai se mamanu afai tatou te mulimuli ai, e mafai ona faamaonia o le taimi lava tatou te filifilia ai le fuafuaga a lo tatou Tama, e mafai ona tatou saogalemu; e mafai ona tatou tumau i le faamaoni.
I le 4 Nifae tatou te aoao ai ia i latou o e na tumau faamaoni ma tuputupu a’e a latou molimau. Sa latou “tutumau i le anapogi ma le tatalo, ma ua faapotopoto soo e tatalo ma faalogologo i le afioga a le Atua” (4 Nifae 1:12). O lea la, o le tatalo ma le anapogi o vaega muamua ia o lenei mamanu. Ia te a’u lava ia, o se tasi o vaega e sili ona faamafanafana loto ma mautinoa o le talalelei a Iesu Keriso, o le avanoa ma le faamanuiaga e tatalo ai. O le tele o taimi, tatou te le i ai i se nofoaga e mafai ona faaleo ai a tatou tatalo, ae e pei ona aoao mai Amoleka i le Alema 34:27, e mafai ona tuu atu o tatou loto ia “faalatalata atu ia te ia i le tatalo … e le aunoa.”
Faatasi ai ma le tatalo malosi, ua i ai i le anapogi le mana e fesiitai ai le lagi i ala tuusao ma le taua. O nisi taimi o le anapogi e mafai ona aumaia ai le faafouina o le ola maloloina ma le malosi i tino ua vaivai i mai; o nisi taimi e mafai ona tatalaina mafaufau ma loto e tuuina atu fesoasoaniga i tagata e manaomia le fesoasoani; o nisi taimi e mafai ona faamutaina ai lamala ma oge. Ma o taimi uma lava e aumaia e le anapogi ia i tatou le filemu—le filemu e iloa ai o loo silafia i tatou e le Alii ma silafia o tatou manaoga ma o tatou loto.
O le isi vaega o le mamanu, sa latou faapotopoto soo “e tatalo ma faalogologo i afioga a le Alii.” I le tele o nofoaga, o le o atu i le lotu e matua faigata lava ma e manaomia ai se osigataulaga tele o le taimi ma punaoa. Ae peitai, i le lalolagi atoa, e faia ai e le faitau miliona o le Au Paia faamaoni i aso Sapati taitasi.
Ou te fia faaopoopo foi i ai ma se isi vaega i lenei mamanu—o se mea ou te talitonu e tele sona aoga i le faatumauina o i tatou i le lio o le talalelei. O loo ou tautala e uiga i le malumalu. E pei lava ona tatou aai ma feinu i le faamanatuga i vaiaso taitasi e faafou ai a tatou feagaiga o le papatisoga ma le Alii, o le auai i sauniga o le malumalu e faamanatu mai ai ia i tatou le taua o a tatou feagaiga ma faamalosia i tatou i lo tatou malosi e faatoilalo ai mea leaga o lenei lalolagi.
O le tatalo ma le anapogi, faapotopoto soo e tatalo ma faalogologo i afioga a le Atua, auai i le malumalu, ma (ou te faamoemoe e le tau ta’u atua le vaega lea) o le suesue i tusitusiga paia—o ni mamanu ia e mafai ma e tatau ona tatou mulimuli ai ina ia tatou tumau faamaoni ma tuputupu a’e i le Alii.
Ata na pueina e le © Busath.com; ata na tusia e Scott Greer