Molisulu o le Malumalu
Malumalu o Bern Switzerland
I le 1906 e na o le fa malumalu sa faaaogaina, sa i ai uma i Iuta. O le tausaga lena sa valoia ai e Peresitene Iosefa F. Samita (1838–1918) i Bern, Switzerland, faapea “o le a oo mai le taimi … o le a faatuina ai malumalu o le Atua i atunuu eseese o le lalolagi, aua e tatau ona faasalalau atu le talalelei i le lalolagi atoa.”1 Toeitiiti o le afa seneturi mulimuli ane, i le aso 11 o Setema, 1955, sa faapaiaina ai e Peresitene Tavita O. MaKei (1873–1970) le uluai malumalu i Europa, i fafo atu lava o Bern.
O loo tu le malumalu i se nofoaga matagofie i Zollikofen. E oo atu le maualuga o lona olo i le vanimonimo i le maualuga e 140 futu (43 m), faatasi ai ma se faatagata o le agelu o Moronae sa faaopoopo i ai i le 2005.
E moni lava sa vaaia e Peresitene MaKei le malumalu i se faaaliga ma faamatala auiliili ai i le tusiata a le Ekalesia o Edward O. Anderson o lea sa mafai ai ona ia tusia atoa i luga o pepa. A o faaauau le tusiga o le ata, sa toe faia ni nai suiga i le uluai ata. Ina ua tagai o ia i le ata mulimuli, sa saunoa atu Peresitene MaKei, “Uso e Anderson, e le o le malumalu lena sa ta vaai faatasi i ai.” O le mea moni, o ata mulimuli lava, sa talafeagai lelei ma le uluai faamatalaga a Peresitene MaKei.
O Peresitene Tavita O. MaKei (ogatotonu) ma isi taitai o le Ekalesia i le faapaiaga o le Malumalu o Bern Switzerland i le 1955.