O La’u Sini i le Lakapi
Sa ou manao ou te taalo i se au e malosi, ae atonu ua maualuga tele le tau e ositaulagaina.
E ese lo’u fiafia i le lakapi. O lea ua 14 nei o’u tausaga ma sa ou taalo lakapi mai lava i le 5 o o’u tausaga. O le taalo i taaloga ua ou aoao ai ia taofimau i tulaga maualuluga ma taua ua ou faatuina mo a’u lava, e tusa lava pe faigata ia filifiliga i nisi o taimi. O se tasi o na filifiliga faigata, pe na tatau pe leai ona ou taalo lakapi i le Aso Sa.
Ina ua iva o’u tausaga, sa ou fiafia lava ma faaaloalogia lo’u faiaoga lakapi, o Faiaoga Hashem. Ae peitai, sa ou manao ou te taalo i le au sa i ai la’u uo mai le aoga, o lea sa ou faataitai ai i se isi au. O le au lea sa matuai malolosi lava, ma na ou iloa afai e talia ai a’u, o le a manaomia ai lo’u faamaoni a’ia’i ma le taalo malosi. O le toatele o tama na mananao ia i ai i le au lenei, ae na ou laki na ou sao mai i isi faataitaiga.
Na oo i le aso o faataitaiga faaiu. Sa ou matua taalo malosi, ma sa lelei ou faalogoga i ai. Mulimuli ane, na sau le faiaoga ia i maua ma lo’u tina ma faapea mai, e matuai manao lava ia ou i ai i le au. Sa ou fiafia lava. Ona ia fesili mai lea, “E mafai ona e taalo i Aso Sa? O loo ou taumafai e koleni se au mo tauvaga, o lona uiga e i ai taimi e taaalo ai i Aso Sa.
Sa tuu mai e lo’u tina ou te tali i le fesili.
“Lau susuga, e leai, ou te le taalo i Aso Sa.” Na ou iloa o le tali sa’o lena, ae masalo o lona uiga o le a ou le i ai i le au lea.
O le po lena, sa lei oo mai ai le valaau e ta’u mai ai ua filifilia a’u i le au. Sa matuai ou faanoanoa lava.
Nai lo lena, sa ou auai ma le toatele o a’u uo i le au a lo matou pitonuu. Sa matou fiafia i le tausaga muamua ma sa faamanuiaina le matou au, ae o le tausaga lona lua sa faafaigata ma o nisi taimi sa le lelei ai le tulimatai atu i le taaloga. Sa oo ina ou lagona le le fiafia. Sa tuu atoa le mea sili na ou mafaia i taaloga taitasi, ae na toetoe lava o taaloga uma na matou faiaina ai.
Ina ua uma se tasi o taaloga na sili ona leaga, sa oo mai ia te au Faiaoga Hashem, lea sa lelei lava lana au. Sa fesili mai pe na a mai mea uma. Sa ou fai atu i ai, “E le o lelei tele.” Sa ou fai atu ia te ia ua ou misia lava la’u au taalo muamua. Sa aoao e Hashem ni tomai maoae se tele, ma na foliga mai i taimi uma sa faamalieina o ia e ana tama taaalo.
“Faamata e te manao e avea oe ma tama taalo asiasi mo le matou au pe a matou o i le isi tauvaga?” O le fesili lea a Hashem.
“Ou te fiafia tele i lena mea!” O la’u tali fiafia atu lea.
“Lelei tele!” O le tala ataata lea a Hashem. “Ae e tatau la ona ou fesili atu i se fesili se tasi. E mafai ona e taalo i Aso Sa?” Sa malō uaua o lo’u manava. Sa faafuasei lava ona ou lagona le ma’i. Ou te manatua le mea na tupu i le taimi mulimuli na fesili mai ai le fesili lenei.
Sa ou tilotilo atu i lo’u tina. Sa ou tilotilo atu i lo’u tamā. Sa faatalitali foi i la’ua mo la’u tali. Sa ou tilotilo atu ia Hashem.
“E faamalie atu, e leai. Ou te le taalo i Aso Sa,” na ou fai atu ai. “E i ai la se eseesega i lena mea?”
Sa tutu Hashem mo sina minute. Na ia iloa mai le vave mou ese o foliga o le faamoemoe mai i o’u foliga ao ou taliina lana fesili.
“Leai, e le afaina,” o le tali lea a Hashem. “Masalo tatou le oo i taaloga faaiu ia e fai i Aso Sa. Matou te mananao lava e te taalo i la matou au.”
E lei umi ae amata ona matou koleni faatasi ma le au a Hashem. Sa matuai malosi le taaalo a le au, ma sa latou toe taliaina a’u. Sa ou fiafia lava e taaalo ma i latou.
Matou te lei mālō i a matou taaloga uma o le tauvaga, ae sa matou taumafai malosi uma, ma na matou maua se taimi fiafia. Na lei umi ae avea a’u ma se tagata tumau o le au a Hashem. E ui ina sa latou iloa ou te le taalo i Aso Sa, ae sa latou talisapaia lava a’u mo mea na ou faaopoopoina atu i isi taaloga na ou taalo ai.
O lea ua avea nei a’u ma aoao i le Perisitua Arona. O loo ou taalo lava i tauvaga lakapi, ma faaauau pea ona ou filifili ou te le taalo i le Aso Sa. E lei avea lava o se faafitauli mo a’u po o ’au foi sa ou taalo ai. Ou te talitonu i le faamamaluina o le aso Sapati ma le tausia ia paia. Ia te a’u o lona uiga o le le taalo i taaloga i Aso Sa.
Ata na tusia e Greg Stapley