O Le Fale Autu i Matu mo Tagata Asiasi Mai

Saunia e Chad E. Phares

Mekasini a le Ekalesia

Sau tatou o e matamata i se nofoaga taua o loo i le Lotoa o le Malumalu.

Ua uma ona iloa e Kaemin ma Ikani (“Kolby”) le tele o mea e uiga i perofeta. Ae o le asiasi atu i le Fale Autu i Matu mo Tagata Asiasi Mai sa fesoasoani ia i laua e vaaia ai i se auala fou le ala e molimau mai ai perofeta ia Iesu Keriso.

O le aso lena sa vaai ai Kolby ma Kaemin i faatusa e pei o ni tagata ola o perofeta mai tusitusiga paia. Sa la’ua aoao ai e ui lava ina eseese taimi na soifua ai perofeta, ae o perofeta uma lava ua molimau mai o Iesu Keriso o lo tatou Faaola ma o le Alo o le Atua.

O Isaia o se perofeta o le Feagaiga Tuai o lē sa soifua a o lei fanau mai Iesu. Sa ia ta’u mai e uiga i le fanau mai o Iesu ma Lana matafaioi i le avea ai ma o tatou Faaola. Sa tusia e Isaia, “Aua ua fanau mai mo i tatou le tama, ua foaiina mai mo i tatou le atalii: … e igoa foi o Ia o le Silisili Ese, o le Faipule, o le Atua malosi, o le Tama o le faavavau, o le Alii o le Filemu” (Isaia 9:6).

Sa ola Mamona pe tusa ma le 400 tausaga ina ua mavae Iesu. Sa ia tuufaatasia tusitusiga o le tele o perofeta o le Tusi a Mamona i papatusi auro. Sa ia faaopoopo foi i ai nisi o ana lava tusitusiga. Sa aoao mai Mamona e tatau ona tatou “faatuatua ia Iesu Keriso, o Ia o le Alo o le Atua” (Mamona 7:5). Sa ia tuuina atu le faamaumauga i lona atalii o Moronae, o le na tanumia papatusi auro.

Ina ua maliu Moronae, sa leai ni perofeta i le lalolagi mo le faitau selau o tausaga. I le 1823 sa faaali mai ai e le agelu o Moronae ia Iosefa Samita le mea e mafai ona ia maua ai papatusi auro. Sa faaliliuina e Iosefa nei papatusi e ala i le mana o le Atua ma lomiaina ia tusitusiga o le Tusi a Mamona. O le Tusi Paia o se tasi o molimau ia Iesu Keriso; o le Tusi a Mamona o le isi lea molimau.

E toa 16 Peresitene o le Ekalesia, e aofia ai ma Iosefa Samita. O i latou o perofeta ua valaauina e le Atua e aoao i tatou ia Iesu Keriso. O lo tatou perofeta i le asō o Peresitene Thomas S. Monson.

Ina ua uma ona aoao e Kolby ma Kaemin mea na aoao mai e perofeta e uiga ia Keriso, sa savavali atu loa i laua i se auala faataamilo i le tumutumu o le fale autu mo tagata asiasi mai. O iina na la vaai ai i se faatagata tele o Iesu e ta’ua o le Christus. Sa la faalogologo ai i faamatalaga na pueina o aoaoga a Iesu. O mea na aoao mai e perofeta e uiga ia Iesu, e tutusa lava ma mea na aoao mai e Iesu e uiga ia te Ia lava.

O Le Faatagata o le Christus ma le Potu Lapotopoto

O le faatagata o le Christus o loo i le fogafale lona lua o le Fale Autu i Matu mo Tagata Asiasi Mai i se potu faalapotopoto. O se rotunda o se potu faalapotopoto e lapotopoto foi lona taualuga.
O le uluai faatagata o le Christus sa fausiaina e Bertel Thorvaldsen i Copenhagen, Tenimaka, i le vaitaimi o le 1800.
O le faatagata o le Christus o loo i le Lotoa o le Malumalu sa vaneina i le maamora pa’epa’e mai Italia.
O puipui o le potu faalapotopoto o loo vali ai se ata tele o le vanimonimo. O tua atu o le faatagata o le Faaola o loo i ai se atavali o le lalolagi. O le Fetu i Matu o loo i luga ae tonu o Lona ao. O ala fetu e pei o le Sipuni Asu Lapoa [Big Dipper] ma Sipuni Asu Laiti [Little Dippers] o loo aofia ai foi i le ata vali.
O fetu o loo i le potu faalapotopoto o loo faaali mai ai foliga o le vanimonimo i le Itulagi i Matu i le tulua o le po o le aso 6 o Aperila, 1830. O le aso lena sa faavaeina ai Le Ekalesia a Iesu Keriso o le Au Paia o Aso e Gata Ai (tagai i le MFF 20).
O le taualuga lapotopoto e 46 futu (14 m) le maualuga mai le fola. O le atavali tele e 166 futu (51 m) le umi. E sili atu ma le 150 kalone (568 l) vali sa faaaoga e vali ai le ata.

Ata tusi o aikona ma faafanua na saunia e Dilleen Marsh; ata na pueina e Christina Smith, vagana ai ua faailoa atu; ata o le faatusa o papatusi auro ma le Fale Autu i Matu mo Tagata Asiasi Mai na pueina e Jed Clark; ata faaopoopo: ata o le Christus na pueina e Robert Casey