Manatu mo Afiafi Faaleaiga

O nei fautuaga faafaiaoga ua saunia e tuuina atu ai ia te oe nisi o manatu. E mafai ona e fetuunaia mo lou aiga. O numera o loo i puipui e faatatau i itulau o loo i le O Le Aoao Atu, E Leai Se Isi Valaauga E Sili Atu.

“O Le Seevae Faasee e Tasi,” i. 12: I le taimi o se lesona, atonu e uunaia oe e le Agaga Paia po o i latou o loo e aoaoina e faasoa atu ni aafiaga patino e manaomia ona faafofoga i ai isi (47, 48). Mafaufau i ni auala e mafai ona e tuuina atu ai i tagata o le aiga nei avanoa a o e aoao atu mai lenei tusiga. Mo se faataitaiga, a uma ona outou aoao i le aafiaga o le tusitala, e mafai e tagata o le aiga ona fefaasoaa’i ni aafiaga i se taimi na latou lagonaina ai le malosi ma le agalelei o le Tama Faalelagi i o latou lava olaga.

“Vaai atu agai i le Malumalu,” i. 16: O se tasi o auala e fesoasoani ai i tagata suesue ia malamalama i mataupu faavae o le talalelei, o le tuu atu ia i latou e tusi ni ata e faatatau i le autu o le lesona (175–76). A uma ona aoao atu le mataupu faavae e fitu o loo otooto atu i le tusiga, mafaufau e valaaulia tagata o le aiga e tusi se ata o le malumalu pe tusi foi se mea na latou aoaoina mai le lesona.

“Tuputupu Ae i le Alii,” i. 42: O le fai atu i tagata o le aiga e faalogologo mo faamatalaga faapitoa i le tusiga o le a faateleina ai lo latou auai i le lesona (72). A o outou faitauina faatasi le tusiga, mafaufau e fai atu i tagata o le aiga e faalogologo mo fasifuaitau, upu, po o mataupu faavae faapitoa e mafai ona fesoasoani ia i latou ia “tuputupu a’e i le Alii.”

“O Le Ofu Fou o Maria,” i. 62: “Afai e te faaaogaina ni gaoioiga eseese e aoaoina ai, o le a sili atu foi ona malamalama tagata o loo aoaoina i mataupu o le talalelei ma tele ni mea latou te teuina” (96). Mafaufau i ni auala e mafai ona faalogologo ai lau fanau, usuina ni pese, pe faasoa atu foi upumoni mai lenei tusiga. Mo se faataitaiga, a o e faitauina le tala, fai i lau fanau e sii o latou lima pe tuu o latou tamailima i luga o o latou isu pe a latou matauina e le o faalogo Maria. Mafaufau e tuu atu i lau fanau e usu se pese o le Peraimeri e faatatau i mea ua latou aoaoina mai le tala.