Tala Faamamai o le Talalelei
O Le Faataoto i le Sefe Malupuipuia o Oa
O le a le taua o se agaga? E tautele ma e tatau ona teu malu.
O se tasi o tala fou i se aso lata mai o se lipoti e uiga i se faomea, o nisi o mea na tutupu e le masani ai i tala tusia o soligatulafono. O le sefe-malupuipuia a se faleoloa sii atoa e nafa ma teuga iila ma maa taua o le autu lea o le osofaiga. Mai le faaeteetega ma le tomai sa faataatia ai fuafuaga a le au faomea e toalua, na iloa ai lo la atamamai i la la’ua fuafuaga eleelea.
Sa fuafua lo la lalafi i totonu o le fale ma loka ai i totonu ina ua tapunia faitotoa pa mamafa mo le po. Sa la iloa o le sefe tele na fai i uamea ma le maa o le fausaga sili ona lelei ma o le ituaiga ua faamaonia e malupuipuia mai tagata faomea; na la iloa foi o loo i ai oa e sili ona taugata; ma sa faamoemoe lo la faamanuiaina i lo la onosai, tutumau, ma le tomai, lea na atiina ae i le tele o isi a la galuega muamua ma laiti ane o le talepe sefe. Sa atoatoa a laua meafeaigaluega, e aofia ai auvili, ili, ma isi meafaigaluega, ua saunia lelei e ulu i totonu o le uamea malo o le faitotoa tele, ma na o le pau lava lea o le ala e mafai ona oo atu ai i le sefe. Sa tutu leoleo faaauupegaina i itu uma o le ofisa, ma sa matuai mataituina lelei tagata e o atu i le potu malosi.
Sa galulue le au gaoi i le po umi i le viliina ma le iliina faataamilo o le loka, o lona fausaga faigata e le mafai ona faaleagaina e tusa lava po o se tagata ua masani i ona fuainumera, a o lei oo i le itula faatulagaina ua uma ona seti ai le taimi e matala ai. Sa laua fuafuaina lelei afai e galulue malosi o le a lava le taimi i le po e tatala faamalosi ai le sefe ma la’u mai ni oa taua e mafai ona la aveina; ona la faamoemoe loa lea i se laki, i lo la lototoa, po o le fai faamalosi e mafai ai ona la sosola ese. O le a le faatuai ona la fasiotia ni tagata pe afai e faalavelaveina i la’ua. E ui ina na sili atu le faigata o le galuega nai lo le mea na faamoemoe, ae na manumalo lava ia tagata leaga, ma a la meafaigaluega ma mea faapāpā, ma oo atu ai i le pito i totonu o le loka; ona la talaia lea o lave ae tatala faamalosi le faitotoa mamafa.
O a mea na la vaaia ai i totonu [o le sefe]? E te manatu o ni pusatoso ua faatumulia i maa taua, ni fata taimane, rupi, ma penina? O mea na ma isi mea e sili atu na la faamoemoe ma le mautinoa e maua ma aveina; ae nai lo lena, sa laua tau atu i se isi sefe i totonu, ma se faitotoa e mamafa atu ma faigata atu nai lo lea na muamua, ua i ai ma se masini e loka ai lea e sili atu le faigata o lona fausaga nai lo lea na la matua galulue malosi ai muamua. O le uamea o le faitotoa lona lua lea o se ituaiga na sili le anagata na malepelepe ai a laua mea faigaluega na matuai tapenaina ma le faaeteete; e ui ina la taumafai i le mea na la mafaia, ae sa na o si maosia lava na faia i ai. Na matua maumau lava lo laua malosi alu vale; ma na faatoilaloina uma a la fuafuaga amioleaga.
E pei lava le tulaga o se tagata o le faitotoa na pito i fafo o le sefe malupuipuia o oa; ae e pei lona tagata i totonu o le faitotoa pito i totonu. O se igoa lelei o se puipuiga malosi lea, ma e ui ina osofaia ma faaleagaina pe talepeina, ae o loo saogalemu lava le agaga o loo ia puipuia, pe afai lena e malosi ma malupuipuia lona tagata i tutotonu.
Ata na tusia e Daniel Lewis