I Tala Fou

Ua Fesoasoani Vitio i luga o le Initoneti e Faasalalau Atu le Faamoemoe o le Ekalesia

O Savali FaaMamona, o se alaata aloaia a le AAG o loo i le Uepi saite e faasoa atu ai vitio o le YouTube, o le a le toe mamao ae maua i le silia ma le 10 o gagana. O le vitio muamua o Savali FaaMamona i le faaPeretania na faaalia ia Aokuso 2008, ae o le faaSipaniolo na maua ia Aperila 2009. Ma le isi, ua faatulagaina le alaata ia maua i le faaKenitonisia, Farani, Siamani, Italia, Iapani, Korea, Meniterini, Potukale, ma le faaRusia i le faaiuga o le kuata muamua o le 2010.

“O le faamoemoega autu o le Savali FaaMamona o le tuuina atu lea o savali faavitio pupuu ma musuia … e faamalosia ai tagata o le ekalesia ma uunaia ai i latou e faasoa atu le savali o le talalelei i isi i luga o le initoneti,” o le saunoaga lea a David Nielson, o le pule faatonu o le Matagaluega o Otovisio a le Ekalesia. O vitio e gaosi e le Ekalesia e tolu i le fa minute le umi ma e tele ina faaalia ai upu musuia mai le Au Pulega Aoao ma taitai o ausilali.

O nisi vaega o vitio na i ai muamua na aofia ai “O Le Mea e Aupito Taua,” lea na uunaia ai e Peresitene Thomas S. Monson le au maimoa e faaalu o latou taimi e mafuta ai ma tagata e pele ia i latou; “Fautuaga i le Autalavou,” lea o loo fautuaina ai e Peresitene Boyd K. Packer, Peresitene o le Korama a Aposetolo e Toasefululua, le autalavou i auala e maua ai le fiafia; ma le “O Tamaitai i o Tatou Olaga,” na saunia e Peresitene Gordon B. Hinckley (1910–2008).

E ese mai le faaalia o saunoaga a taitai o le Ekalesia, e taula’i atu foi Savali FaaMamona i tagata o le Ekalesia. Mo se faataitaiga, o le vitio “Finding Hope” o loo faamatala ai se tala ia Victor Guzman, o se tagata na sao mai i osofaiga faatupu faalavelave i le aso 11 o Setema, 2001, i Amerika ma lana malaga i le sailia o le filemu e ui i ona faanoanoaga.

Mai le aso 20 o Setema, 2009, ua silia i le 5.4 miliona le au maimoa i le alaata ma o se tasi lea o alaata e 20 pito i luga e sili ona lauiloa i le vaega “Nonprofits and Activism” a le YouTube. O savali taitasi e masani lava ona mauaina le tusa ma le 200,000 o tagata e sueina.

O loo maua foi vitio i le LDS.org, lea e maua ai foi e le au maimoa ia vaega na tuuina muamua i ai [i luga o le initoneti].

“Ou te faamoemoe o le a toatele atu nisi tagata o le Ekalesia e auai i le faasoaina atu o nei vitio ia i latou e le auai i lo tatou faatuatuaga, ina ia mafai ai ona latou iloa atili le tulaga moni e i ai le Ekalesia ma lo tatou naunau e mulimuli ia Iesu Keriso,” o le saunoaga lea a Brother Nielson.

Faafouga o le Tusi Alualu i Luma o le Tagata Lava Ia

Ua faafouina e le au peresitene aoao o Tamaitai Talavou mea e faaaoga o le polokalama o le Alualu i Luma o le Tagata Lava Ia ina ia atagia ai ni suiga aupito lata mai.

O le tamaitusi fou o le Alualu i Luma o le Tagata Lava Ia e lanu piniki lona faavaa ma ua aofia ai gaoioiga mo le tulaga faatauaina fou lona valu o le—mama—lea na faaopoopo i ai i le faaiuga o le 2008. O le tele o gaoioiga o tulaga faatauaina e tumau lava, ae o nisi ua suia teisi ina ia lata mai nei ma taula’i atili atu i feagaiga o le malumalu.

O le taui o le Aloaiaina o le Tulaga Faatamaitai Talavou ua faaalia ai nei, e faaopoopo atu ai la i tumutumu o le malumalu, ia se ofagapi e faatusa i le lotogatasi, galulue faatasi, ma le galue; o le rosa a le Maea Meite mo le alofa, faatuatua, ma le mama; ma le pale a le Lora, e faatatau i le mamalu ma mea e ausia. O loo i ai se penina laitiiti i le ogatotonu o le rosa e faatusa i le tulaga faatauaina fou o le mama (tagai Faataoto 31:10) ma le faamae’aina o le polokalama o le Alualu i Luma o le Tagata Lava Ia.

O mea faaopoopo e aofia ai se pepa lautele fou o le mau tauave ma lipine o mau. O le a tuuina atu [i tamaitai] lipine pe a mae’a mea e fai ma galuega faatino o tulaga faatauaina taitasi.

O mea e faaaoga o loo maua i le taimi nei i le gagana Peretania, Sipaniolo, ma le Potukale. O anotusi i gagana faaopoopo e 51 o le a maua i le amataga o le 2010.

O le a le umi ae maua ia Savali FaaMamona i gagana e silia ma le 10.

Ua i ai se mamanu fou o le taui o le Aloaiaina o le Tulaga Faatamaitai Talavou.

ata na pueina e john buckles