ata o le aiga

2.

O Le Lagolagoina o Tagata Taitoatasi ma Aiga i le Galuega a le Atua mo le Faaolataga ma le Faaeaga

2.0

Faatomuaga

I le avea ai o se taitai i le Ekalesia a Iesu Keriso, e te lagolago atu i tagata taitoatasi ma aiga i le faataunuuina o le galuega a le Atua o le faaolataga ma le faaeaga (tagai i le 1.2). O le faamoemoega tupito o lenei galuega, o le fesoasoani lea i fanau uma a le Atua ia maua faamanuiaga o le ola faavavau ma se atoaga o le olioli.

O le tele o le galuega a le Atua mo le faaolataga ma le faaeaga, e faataunuuina e ala i le aiga. Mo tagata uma o le Ekalesia, o lenei galuega e faatotonugalemu i le aiga. O le a fesoasoani lenei mataupu ia te oe e te maua ai se vaaiga mamao:

• O le matafaioi a le aiga i le fuafuaga a le Atua.

• O le galuega a le Atua mo le faaolataga ma le faaeaga i totonu o le aiga.

• O le sootaga i le va o le aiga ma le Ekalesia.

2.1

O Le Matafaioi a le Aiga i le Fuafuaga a le Atua

O le aiga ua faauuina e le Atua ma e totonugalemu i Lana fuafuaga. O i tatou taitoatasi “o se atalii po o se afafine agaga faapelepele a ni matua faalelagi, [faatasi ma] se natura paia ma se taunuuga (“O Le Aiga: O Se Folafolaga i le Lalolagi,” ChurchofJesusChrist.org). O i tatou o se vaega o lo la aiga. Sa tatou ola faatasi ma i la’ua ae tatou te le’i fananau mai i le lalolagi.

I le avea ai o se vaega o Lana fuafuaga, ua faavae ai e le Tama Faalelagi ia aiga i le lalolagi. Ua faamoemoe o Ia mo aiga ia aumaia ia i tatou le fiafia. E saunia e aiga ia avanoa e a’oa’o ai, tuputupu a’e ai, auauna atu ai, salamo ai, ma faamagalo atu ai. E mafai ona latou fesoasoani ia i tatou e saunia mo le ola e faavavau.

I le olaga lenei, e toatele tagata e utiuti avanoa mo mafutaga alofa faaleaiga. E leai se aiga e saoloto mai luitau, tiga, ma le faanoanoa. E faaaoga e tagata taitoatasi ma aiga le faatuatua i le Alii ma tauivi malosi e ola e tusa ai ma upumoni ua Ia faaali mai e faatatau i le aiga. Ua folafola mai e le Faaola o le a fesoasoani o Ia e tauave avega a i latou uma o ē o mai ia te Ia (tagai i le Mataio 11:28–30).

O le fuafuaga o le fiafia a le Tama Faalelagi e mautinoa ai o le a maua e Ana fanau uma le avanoa e talia ai Lana talalelei ma maua Ana faamanuiaga silisili (tagai i le Mataupu Faavae ma Feagaga 137:7–10). O i latou uma e osia ma tausia feagaiga ma le Atua e mafai ona latou lagonaina le olioli ma le “filemu i lenei lalolagi, ma le ola e faavavau i le lalolagi a sau” (Mataupu Faavae ma Feagaiga 59:23; tagai foi i le Mosaea 2:41).

O le folafolaga a le Atua o le ola e faavavau e aofia ai le faaipoipoga e faavavau, fanau, ma isi faamanuiaga uma o se aiga e faavavau. O lenei folafolaga e faatatau ia i latou o e e lei faaipoipo i le taimi nei pe o aunoa foi ma ni aiga i le Ekalesia (tagai i le 38.1.4). O nei faamanuiaga ua faamautinoa atu ia i latou uma o e taumafai e ola o ni soo o Iesu Keriso.

2.1.1

O Aiga e Faavavau

E tino mai aiga e faavavau pe a osia e tagata o le Ekalesia ia feagaiga pe a latou mauaina sauniga o faamauga i le malumalu. O faamanuiaga o se aiga faavavau e ausia pe a tausia e tagata o le Ekalesia na feagaiga ma salamo pe a latou faia ni mea sese. E fesoasoani taitai o le Ekalesia i tagata o le au paia ia maua nei sauniga ma faamamaluina a latou feagaiga.

E mafai e tagata taitoatasi ona faataunuuina le tele o matafaioi i totonu o se aiga e faavavau. O matafaioi uma faaleaiga e paia ma e taua. O nei matafaioi e aofia ai le tina ma le tamā, afafine ma le atalii, tuafafine ma le uso, uso o le tina po o le tuafafine o le tamā ma le uso o le tamā po o le tuagane o le tina, ma le tinamatua ma le tamamatua. O le faataunuuina o nei matafaioi i le alofa e fesoasoani ai i fanau a le Atua ia agai i luma i le ola e faavavau.

O se itu faaopoopo i le faavaeina o aiga e faavavau o le faatinoina lea o sauniga i le malumalu ia e faatagaina ai tagata o le Ekalesia ina ia faamauina i o latou tuaa ua maliliu.

Faatasi ai ma se malamalamaaga i le fuafuaga a le Atua, e saili e tagata o le ekalesia ia faamanuiaga o se aiga e faavavau.

2.1.2

Tane ma le Avā

O le faaipoipoga i le va o se alii ma se tamaitai ua faauuina e le Atua (tagai i le Mataupu Faavae ma Feagaiga 49:15). Ua faamoemoeina se tane ma se avā ia alualu faatasi i luma i le ola e faavavau” (tagai i le 1 Korinito 11:11).

O se tasi o tulaga e manaomia mo le mauaina o le ola e faavavau o le i ai lea o se alii ma se tamaitai e ulu atu i le feagaiga o le faaipoipoga faaselesitila (tagai i le Mataupu Faavae ma Feagaiga 131:1–4). E osia e se ulugalii lenei feagaiga pe a la mauaina le sauniga o le faamauga o le faaipoipoga i totonu o le malumalu. O lenei feagaiga o le faavae lea o se aiga e faavavau. Pe a tausia ma le faamaoni, e mafai ona tumau la la’ua faaipoipoga e faavavau. I le i’uga, e mafai ona avea i la’ua e faapei o le Atua (tagai i le Mataupu Faavae ma Feagaiga 132:19-20).

Ua poloaiina e le Atua ia tane ma avā ia pipii atu le tasi i le isi (tagai i le Kenese 2:24; Mataupu Faavae ma Feagaiga 42:22). I le tulaga lea, o le upu pipii atu o lona uiga ia matua tuuto atoatoa atu ma le faamaoni i se tasi. O ulugalii ua faaipoipo e pipii atu faatasi e ala i le alolofa ma auauna atu le tasi i le isi.

O le pipii atu foi e aofia ai le faamaoni a’ia’i atoa i le va o le tane ma le avā. O sootaga vavalalata faaletino i le va o le tane ma le avā ua faamoemoeina ia matagofie ma paia. Ua faauuina e le Atua mo le foafoaga o fanau ma mo le faaalia o le alofa i le va o le tane ma le avā. O le agamalu ma le faaaloalo—e le o le manatu faapito—e tatau ona taialaina ai a la sootaga vavalalata.

Ua poloai mai le Atua e faapea, o le sootaga vavalalata faalefeusuaiga e tatau ona faapolopolo mo le faaipoipoga i le va o se alii ma se tamaitai. O le tumau i le mama a’ia’i faalefeusuai a o le’i faaipoipo ma le faamaoni i totonu o le faaipoipoga, e fesoasoani i tagata taitoatasi ia fiafia moni ma aloese ai mai le faamanu’aliaina faaleagaga, faalelagona, ma le faaletino. Ua fautuaina matua ma taitai o le Ekalesia e faia mea uma latou te mafaia e saga faamalosia ai lenei aoaoga. (Tagai i le 38.6.5.)

E saili se ulugalii ina ia lotogatasi i le faavaeina o le la aiga (tagai i le Kenese 2:24). O le tuufaatasia i le faaipoipoga e manaomia ai se faigapaaga atoa, e fefaasoaai i tiutetauave. O se tane ma se avā e tutusapau i le silafaga a le Atua. E le tatau ona pulea malosi e le tasi le isi. O a la’ua faaiuga e tatau ona faia i le lotogatasi ma le alofa, ma le auai atoatoa o i la’ua uma.

Sa faatuina e Atamu ma Eva se faataitaiga mo tane ma avā. Sa la galulue, tatalo, ma tapuai faatasi (tagai i le Mose 5:1, 4). Sa la aoao atu a la fanau i le talalelei ma sa la faanoanoa faatasi i o la’ua tofotofoga (tagai i le Mose 5:12, 27). Sa lotogatasi i la’ua i le tasi ma le isi faapea foi ma le Atua.

2.1.3

Matua ma Fanau

O le uluai poloaiga a le Atua ia Atamu ma Eva o se tane ma se avā ia fai fanau (tagai i le Kenese 1:28). Ua a’oa’o mai e perofeta o Aso e Gata Ai e faapea “o le poloaiga a le Atua i Lana fanau ia fanafanau ma uluuluola ai le lalolagi, ua faamalosia ma faatumauina” (“O Le Aiga: O Se Folafolaga i le Lalolagi”; tagai foi i le Mataupu Faavae ma Feagaiga 49:16–17).

O se avanoa paia ma se tiutetauave mo se tane ma se avā le tausia o le fanau e mafai ona la fanauina pe vaetamaina. O matua fai ua i ai faamanuiaga ma tiutetauave lava e tasi e pei o matua moni e fanauina fanau.

O se tane ma se avā alolofa la te saunia faatasi le nofoaga aupito sili mo le tausiga ma le faafaileleina o fanau. E ono taofia e tulaga taitasi ia matua mai le tausia faatasi o a la fanau. Peitai, o le a faamanuiaina e le Alii i latou pe a latou saili atu i Lana fesoasoani ma tauivi malosi e tausia a latou feagaiga ma Ia.

Ua i ai i matua le tiutetauave taua e fesoasoani ai i a latou fanau e sauniuni ia maua faamanuiaga o le ola e faavavau. Latou te a’oa’o atu a latou fanau ia alolofa ma auauna atu i le Atua ma isi (tagai i le Mataio 22:36–40). Latou te a’oa’o atu i latou ia tatalo i le Tama Faalelagi ma suesue i le afioga a le Atua (tagai i le Alema 37:36–37, 44–46). Latou te fesoasoani i a latou fanau ia malamalama i le a’oa’oga faavae o le faatuatua ia Iesu Keriso, salamo, papatisoga, ma le meaalofa o le Agaga Paia (tagai i le Mataupu Faavae ma Feagaiga 68:25). Latou te fesoasoani foi ia i latou e osia feagaiga pe a latou mauaina ia sauniga o le faaolataga ma le faaeaga.

“E tatau ona pulefaamalumalu tamā i o latou aiga i le alofa ma le amiotonu ma o i latou e tuuina atu mea e manaomia o le olaga ma le puipuiga mo o latou aiga” (“O Le Aiga: O Se Folafolaga i le Lalolagi”). Pe a leai se tane po o se tamā i le aiga, o le tina e pulefaamalumalu i le aiga.

O le pulefaamalumalu i le aiga o le tiutetauave e fesoasoani e toe taitai atu tagata o le aiga e mau i le afioaga o le Atua. E faia lenei mea e ala i le auauna atu ma aoao atu i le agamaualalo, agamalu, ma le alofa mama, e mulimuli i le faataitaiga a Iesu Keriso (tagai i le Mataio 20:26–28). O le pulefaamalumalu i le aiga e aofia ai le taitaiina o tagata o le aiga i tatalo e le aunoa, suesue le talalelei, ma isi itu o le tapuaiga. E galulue matua i le lotogatasi e faataunuu nei tiutetauave.

“O le uluai matafaioi a tina o le faafaileleina lea o a latou fanau” (“O Le Aiga: O Se Folafolaga i le Lalolagi”). Ina ia faafailele o lona uiga, e aoao atu, ma lagolago, e mulimuli i le faataitaiga a le Faaola (tagai i le 3 Nifae 10:4). I le lotogatasi ma lana tane, e fesoasoani se tina i lona aiga e aoao upumoni o le talalelei ma atiae le faatuatua i le Tama Faalelagi ma Iesu Keriso. La te faafaileleina faatasi se siosiomaga o le alofa i totonu o le aiga.

“I nei matafaioi paia, e ao i tamā ma tina ona fesoasoani le tasi i le isi o se paaga tutusa” (“O Le Aiga: O Se Folafolaga i le Lalolagi”). La te fefautuaai faatasi i le agaga tatalo ma faatasi ai foi ma le Alii.

o le tama o loo a’oa’o atu le aiga

2.2

O Le Galuega a le Atua mo le Faaolataga ma le Faaeaga i le Aiga

Ua saunoa mai le Au Peresitene Sili, “O le aiga o le faavae lea o se olaga amiotonu” (Tusi a le Au Peresitene Sili, 11 Fep., 1999). I o latou aiga, e punouai tagata taitoatasi ma aiga e fesoasoani i le Atua e faataunuu Lana galuega mo le faaolataga ma le faaeaga.

Ina ia lagolago atu i tagata o le ekalesia i le faiga o le galuega a le Atua mo le faaolataga ma le faaeaga i le aiga, e faamalosiau taitai o le Ekalesia ia i latou e faavae se fale e afio ai le Agaga. Latou te uunaia foi tagata o le ekalesia ia faamamalu le aso Sapati, suesue ma a’oa’o le talalelei i le fale, ma faia afiafi faaleaiga i vaiaso taitasi. E tuu atu e taitai le faamamafa faapitoa i le lagolagoina o tagata taitoatasi o ē atonu e leai se fesoasoaniga po o se faamalosiauga mai tagata o le aiga.

2.2.1

O Se Fale e Afio ai le Agaga

Ua uunaia tagata o le ekalesia ia fai o latou fale o se nofoaga o le malosiaga faaleagaga ma le olioli. E mafai ona latou valaauliaina le Agaga o le Alii i totonu o o latou fale e ala i taumafaiga faigofie.

2.2.2

Faamamaluina o le Sapati

Ua poloaiina e le Atua Ana fanau ia “manatua le aso sapati, ia tausi lona paia” (Esoto 20:8). E potopoto tagata o le Ekalesia i le Sapati e taumamafa i le faamanatuga e manatua ai Iesu Keriso ma Lana Togiola (tagai i le Mataupu Faavae ma Feagaiga 59:12). O le Aso Sapati o se aso o le a’oa’o mai ma le a’oa’o atu o le talalelei i le lotu ma i le aiga. E mafai ona faamalolosia tagata o le ekalesia i le Sapati pe a latou punouai i gaoioiga e pei o le:

• Tapuai patino e ala i le tatalo ma le anapogi.

• Suesueina ma le a’oa’oina o le talalelei.

• Auaunaga ma le tautuaina o isi.

• Talafaasolopito o aiga.

• Taimi fiafia faaleaiga.

• Isi faatasiga talafeagai.

2.2.3

Suesueina ma le Aoaoina o le Talalelei i le Aiga

O le a’oa’o atu ma le a’oa’oina mai o le talalelei e faatotonugalemu i le aiga ma lagolagoina e le Ekalesia. E uunaia e taitai o le ekalesia tagata uma o le au paia ia suesueina le talalelei i le fale i le aso Sapati ma i le aluga o le vaiaso. O le suesueina o le talalelei i le fale e faamalolosia ai tagata taitoatasi ma aiga. E faalolotoina ai le liua i le Tama Faalelagi ma le Alii o Iesu Keriso.

O se suesuega o tusitusiga paia, e pei ona otooto atu i le Sau, Mulimuli Mai ia te A’u o le kosi fautuaina lea o le suesueina o le talalelei i le fale.

E sailia e tagata taitoatasi ma aiga ia musumusuga a o latou filifili e suesue i mea o le a sili ona taulimaina ai o latou manaoga. E faaopoopo atu i fuaitau o tusitusiga paia o loo fautuaina atu i le Sau, Mulimuli Mai ia te A’u, e mafai ona latou iloiloina ma le agaga tatalo e suesue:

• O Le Tusi a Mamona ma isi tusitusiga paia.

• Savali o konafesi aoao.

• Mekasini a le Ekalesia ma isi anotusi faagaeetia.

2.2.4

Afiafi Faaleaiga ma Isi Gaoioiga

Ua fautuaina e perofeta o aso e gata ai ia tagata o le Ekalesia e faia a latou afiafi faaleaiga i vaiaso taitasi. O se taimi paia lenei mo tagata taitoatasi ma aiga e a’oa’o ai le talalelei, e faamalolosia ai molimau, fausia le lotogatasi, ma fiafia i le tasi ma le isi.

E mafai ona fetuutuunai le afiafi faaleaiga e tusa ai ma tulaga o tagata o le aiga. E mafai ona faia i le aso Sapati po o isi aso ma taimi. E mafai ona aofia ai:

• Suesuega ma a’oa’oga o le talalelei (e mafai ona faaaoga anomea o le Sau, Mulimuli Mai ia te A’u pe a mananao ai).

• Auauna atu i isi.

• Usuusuina pe tataina viiga ma pese a le Peraimeri (tagai i le mataupu 19).

• Lagolagosua i tagata o le aiga i le Atinaega o Tamaiti ma le Autalavou.

• Se fono faaleaiga e faatutu ai sini, foia ai faafitauli, ma faamaopoopo ia faasologa o mea e fai.

• Gaoioiga faafiafia.

O tagata nofofua o le au paia ma isi e mafai ona faapotopoto i vaega i fafo atu o sauniga tapuai masani o le Sapati, e auai ai i afiafi faaleaiga ma fefaamalosia’i ai e le tasi le isi e ala i le suesueina o le talalelei. O leSau, Mulimuli Mai ia te A’u e mafai ona avea ma se punaoa mo i latou e mananao e suesue faatasi.

Ina ia saunia se taimi mo aiga e faatasitasi ai, e tatau i taitai ona faaavanoa ia afiafi o Aso Gafua mai fonotaga/sauniga ma gaoioiga faale-Ekalesia.

E uunaia e taitai ia tagata o le au paia ina ia faia pea lava pea ia afiafi faaleaiga ma faaalu le taimi e faatasitasi ai o ni aiga (tagai i le Mataupu Faavae ma Feagaiga 64:33). E mafai ona fai lenei mea i le aai faatasi, galulue faatasi ma feauaunaa’i, ma gaoioiga faafiafia.

2.2.5

Lagolagosua i Tagata Taitoatasi

E fesoasoani ia taitai o le Ekalesia i tagata o le au paia e manaomia se lagolago faaopoopo. E fesoasoani taitai i tagata nei ma o latou aiga ia maua avanoa mo le faaaumeaina mai, aafiaga lelei faaagafesootai, ma le tuputupu ae faaleagaga. E uunaia e taitai ma lagolagosua atu ia i latou i a latou taumafaiga e aoao ma ola i le talalelei a Iesu Keriso. E tuu atu foi e taitai ia i latou ni avanoa e auauna atu ai i le Ekalesia.

ulugalii o loo talie

2.3

O Le Sootaga i le va o le Aiga ma le Ekalesia

O le galuega a le Atua mo le faaolataga ma le faaeaga e faatotonugalemu i le aiga ae e lagolagoina e le Ekalesia. O mataupu faavae nei e faatatau i le sootaga i le va o le aiga ma le Ekalesia.

• E faamamaluina e taitai ma faiaoga le matafaioi a matua ma lagolagosua atu ia i latou. E faavaeina ma faatumauina e taitai ma faiaoga se fesootaiga mataalia ma matua.

• O nisi o fonotaga/sauniga faale-Ekalesia e taua tele i uarota taitasi po o paranesi. E aofia ai le sauniga faamanatuga ma fonotaga a vasega ma korama e faia i le Sapati. E tele isi fonotaga, gaoioiga, ma polokalama e le taua tele. E faatulagaina e taitai na polokalama ma gaoioiga pe a manaomia e fesoasoani e taulima ai manaoga o tagata taitoatasi ma aiga. E iloilo e taitai ia tulaga ma punaoa i le lotoifale.

• E iloilo e tagata taitoatasi ma aiga o latou tulaga pe a faia faaiuga e uiga i le auai i le faatinoga o polokalama a le Ekalesia ia e le taua tele.

• O le a faamanuia e le Alii ia tagata o le au paia pe a latou auauna atu ma ositaulaga i Lana Ekalesia. Peitai, o le aofaiga o le taimi e tuuina atu i le auaunaga i le Ekalesia e le tatau ona aveesea ai le gafatia mai tagata o le au paia e faataunuu ai o latou tiutetauave i le fale, i le galuega, ma isi mea. E le tatau ona lofituina ia taitai ma tagata o le au paia i le tele na’ua o tiutetauave faale-Ekalesia. E le tatau foi ona talosagaina i latou e soona faia ni osigataulaga e lagolagoina ai polokalama po o gaoioiga a le Ekalesia.

Pe a mulimuli ia tagata o le ekalesia i mataupu faavae nei ma uunaiga a le Agaga, o le a faamanuiaina e le Tama Faalelagi a latou taumafaiga.