“1. O Le Fuafuaga a le Atua ma Lau Matafaioi i Lana Galuega o le Faaolataga ma le Faaeaga,” Tusitaulima Aoao: Auauna Atu i Le Ekalesia a Iesu Keriso o le Au Paia o Aso e Gata Ai (2024).
“1. Galuega o le Faaolataga ma le Faaeaga a le Atua,” Tusitaulima Aoao.
1.
O Le Fuafuaga a le Atua ma Lau Matafaioi i le Galuega a le Atua mo le Faaolataga ma le Faaeaga
1.0
Faatomuaga
Ua valaauina oe e auauna atu i Le Ekalesia a Iesu Keriso o le Au Paia o Aso e Gata Ai. Faafetai atu mo lau auaunaga. O le a e faamanuiaina olaga ma e lagonaina le olioli a o e auauna atu ma le faamaoni.
O le a fesoasoani lenei tusitaulima e te aoaoina ai mataupu faavae o le auaunaga FaaKeriso ma malamalama ai i ou tiutetauave. O le a sili ona e mataalia pe a e faaogatusaina lau auaunaga i le Ekalesia ma le galuega a le Atua le Tama ma Lona Alo, o Iesu Keriso. O le a fesoasoani lenei mataupu e te maua ai se vaaiga mamao o le:
-
Fuafuaga o le fiafia a le Atua.
-
O le galuega a le Atua mo le faaolataga ma le faaeaga.
-
O le faamoemoega o Le Ekalesia a Iesu Keriso o le Au Paia o Aso e Gata Ai.
1.1
Fuafuaga o le Fiafia a le Atua
Ua saunia e le Tama Faalelagi le fuafuaga o le fiafia ina ia mafai ai e i tatou ona olioli i Ana faamanuiaga uma. O Lana galuega ma Lona mamalu ia “aumaia le tino ola pea ma le ola faavavau o le tagata” (Mose 1:39). O le tino ola pea, o le ola lea e faavavau ma se tino toetu faaletino. O le ola e faavavau, po o le faaeaga, o le avea lea e faapei o le Atua ma ola i Lona afioaga e faavavau o ni aiga.
O Iesu Keriso e totonugalemu i le fuafuaga a le Atua. Ona o le alofa e le i’u o le Tama Faalelagi mo i tatou, na Ia auina mai ai Lona Alo e togiolaina i tatou mai le agasala ma le oti e ala i Lana taulaga togiola (tagai i le Ioane 3:16). E ala i Lana Togiola, ua faamautinoa ai e Iesu Keriso e faapea, o i tatou taitoatasi e fanau mai i le lalolagi o le a toetu mai ma maua le tino ola pea.
Ina ia maua le ola e faavavau, e tatau ona tatou “o mai ia Keriso” (Moronae 10:32). O le Togiola a le Faaola ua mafai ai ona faamamāina i tatou mai le agasala ma suia o tatou loto ina ia mafai ai ona tatou maua le ola faavavau ma se atoaga o le olioli. E finagalo le Tama Faalelagi i Ana fanau uma e filifili e toe foi atu ia te Ia.
1.2
O Le Galuega a le Atua mo le Faaolataga ma le Faaeaga.
A tatou o mai ia Keriso ma fesoasoani atu i isi e faia lena lava mea e tasi, ua tatou auai i le faatinoina o le galuega a le Atua o le faaolataga ma le faaeaga. O lenei galuega o loo taialaina e poloaiga sili e lua ia alofa atu i le Atua ma alofa atu i o tatou tuaoi (tagai i le Mataio 22:37–39).
O le galuega a le Atua mo le faaolataga ma le faaeaga e taulai atu i tiutetauave e fa na tofia mai le lagi. O loo otooto atu nei tiutetauave i lalo.
O le tusitaulima lenei o le a fesoasoani e te malamalama ai i itu nei e fa o le galuega a le Atua.
1.2.1
Ola i le Talalelei a Iesu Keriso
Ola i le talalelei a Iesu Keriso e aofia ai le:
-
Faatinoina o le faatuatua ia Keriso, salamo i aso taitasi, osia o feagaiga ma le Atua a o tatou mauaina sauniga o le faaolataga ma le faaeaga, ma tumau e oo i le iuga e ala i le tausiga o na feagaiga (tagai i le 3.5.1).
-
Aoaoina mai ma le aoao atu o le talalelei a Iesu Keriso i le aiga ma i le lotu.
-
Avea ma ē ola-tutoatasi i le saunia o mea mo i tatou lava ma o tatou aiga, i le faaleagaga ma le faaletino.
1.2.2
Tausiga o i Latou e le Tagolima
Tausiga o i latou e le tagolima e aofia ai le:
-
Tautua ma le auaunaga i tagata taitoatasi, aiga, ma nuu.
-
Faasoa atu o punaoa, e aofia ai fesoasoaniga a le Ekalesia, ia i latou e le tagolima.
-
Fesoasoani i isi ia ola-tutoatasi.
1.2.3
Valaaulia Tagata Uma ia Talia le Talalelei
Valaaulia tagata uma ia talia le talalelei e aofia ai le:
-
Auai i le galuega faafaifeautalai ma auauna atu o ni faifeautalai.
-
Fesoasoani i tagata fou ma tagata o le Ekalesia ua toe foi mai ia alualu i luma i luga o le ala o feagaiga.
1.2.4
Tuufaatasia o Aiga mo le Faavavau
Tuufaatasia o aiga mo le faavavau e aofia ai le:
-
Osia o feagaiga a o tatou mauaina o tatou lava sauniga o le malumalu.
-
Mauaina o o tatou tuaa ua maliliu ma le faatinoina o sauniga mo i latou i le malumalu ina ia mafai ai ona latou osia feagaiga ma le Atua.
-
O i le malumalu e le aunoa, i nofoaga e mafai ai, e tapuai i le Atua ma faatinoina sauniga mo Ana fanau.
1.3
O Le Faamoemoega o le Ekalesia
Sa faavaeina e Iesu Keriso Lana Ekalesia ina ia mafai ai e tagata taitoatasi ma aiga ona lagolago atu i le Atua e faataunuu Lana galuega mo le faaolataga ma le faaeaga (tagai i le Efeso 4:11–13; tagai foi i le 2.2 i le tusitaulima lenei). Ina ia fesoasoani e ausia lenei faamoemoega paia, ua tuuina atu ai e le Ekalesia ma ona taitai le:
-
Pule ma ki o le perisitua.
-
Feagaiga ma sauniga.
-
Taitaiga faaperofeta.
-
Tusitusiga paia.
-
Aoaoina o le talalelei ma le lagolago faafaiaoga.
-
Avanoa faaleauaunaga ma faaletaitaiga.
-
O se nuu o le Au Paia.
1.3.1
Pule ma Ki o le Perisitua
E faataunuu e le Atua Lana galuega o le faaolataga ma le faaeaga e ala i le perisitua. O le pule ma ki o le perisitua e manaomia e taitai ai le galuega a le Atua i le lalolagi na toefuatai mai i le Perofeta o Iosefa Samita (tagai i le Mataupu Faavae ma Feagaiga 110:11–16; 112:30; tagai foi i le 3.1 i le tusitaulima lenei). O loo umia nei ki e taitai o le Ekalesia i ona po nei. E tofia ma faatagaina e nei taitai isi e lagolago atu i le galuega a le Atua (tagai i le Mataupu Faavae ma Feagaiga 107:8, 65–67).
1.3.2
Feagaiga ma Sauniga
I le fuafuaga a le Tama Faalelagi, tatou te osia ai feagaiga a o tatou mauaina ia sauniga o le faaolataga ma le faaeaga, e pei o le papatisoga (tagai i le Ioane 3:5; tagai foi i le mataupu 18 i le tusitaulima lenei). O nei feagaiga ma sauniga e taua tele mo i tatou e avea atili ai faapei o le Atua ma toe foi atu ai e mau i Lona afioaga (tagai i le Mataupu Faavae ma Feagaiga 84:19–22).
1.3.3
Taitaiga Faaperofeta
E ala mai i Ana perofeta filifilia, e faaali mai ai e le Atua upumoni ma tuuina mai le taitaiga musuia ma lapataiga (tagai i le Amosa 3:7; Mataupu Faavae ma Feagaiga 1:4). O lea taitaiga e fesoasoani ia i tatou e ulu atu ai ma tumau i luga o le ala e tau atu i le ola e faavavau.
1.3.4
Tusitusiga Paia
I lalo o le taitaiga a perofeta ma aposetolo a le Alii, e saunia ai ma faasao e le Ekalesia le afioga a le Atua e pei ona maua i tusitusiga paia. E molimau mai tusitusiga paia e uiga ia Keriso, a’oa’o mai Lana talalelei, ma fesoasoani ia i tatou e faatino le faatuatua ia te Ia (tagai i le Iakopo 7:10–11; Helamana 15:7).
1.3.5
A’oa’oina o le Talalelei ma le Lagolago Faafaiaoga
E lagolago e le Ekalesia tagata taitoatasi ma aiga i o latou tiutetauave e aoaoina upumoni o le talalelei ma aoao atu nei upumoni i tagata o le aiga ma isi (tagai i le Mataupu Faavae ma Feagaiga 88:77–78, 118; tagai foi i le 2.2.3 i le tusitaulima lenei).
1.3.6
Avanoa Faaleauaunaga ma Faaletaitaiga
E tuuina mai e le Atua i tagata ia avanoa e auauna atu ai ma taitai, e ala i valaauga ma tofiga i le Ekalesia. Ua saunia e le Ekalesia le faatulagaga e fesoasoani ai i le tausiga o tagata o le ekalesia e le tagolima ma avatu le toomaga o fesoasoaniga alofa i isi (tagai i le Mosaea 18:27–29).
1.3.7
O Se Nuu o le Au Paia
I le avea ai o se nuu o le Au Paia, e potopoto e le aunoa tagata o le Ekalesia e tapuai i le Atua ma manatua le Faaola e ala i le taumamafa i le faamanatuga (tagai i le Moronae 6:4–6; Mataupu Faavae ma Feagaiga 20:77). E fetausia’i foi tagata o le ekalesia ma auauna atu le tasi i le isi (tagai i le Efeso 2:19).
1.4
O Lau Matafaioi i le Galuega a le Atua
I le avea ai o se taitai i le Ekalesia, ua tofia oe e a’oa’o atu ma lagolago atu ia i latou e te auauna i ai a o latou fesoasoani i le Atua i Lana galuega o le faaolataga ma le faaeaga (tagai i le 1.2). O le i ai o se malamalama manino i le galuega a le Atua, e uiga i mea ua Ia valaaulia oe e fai, faapea ai ma le faamoemoega o Lana Ekalesia o le a fesoasoani ia te oe ia taulai atu au taumafaiga i le aumaia o agaga ia Keriso.
Saili ma le agaga tatalo ia iloa pe mafai faapefea ona e fesoasoani e faataunuu ia faamoemoega o le Atua i olaga o i latou e te auauna atu i ai. O le a taitai oe e le Atua e ala i uunaiga a le Agaga Paia (tagai i le 2 Nifae 32:5). O le galulue faatasi ma le Alii i Lona tovine o le a aumaia ai ia te oe le olioli tele (tagai i le Iakopo 5:70–72).