20.

Ol Aktiviti

20.1

Ol Stamba Tingting

Ol aktiviti blong Jos oli tekem ol memba blong Jos mo ol narafala man oli kam tugeta olsem “[oli] gat raet insaed long ples blong God, olsem ol narafala man blong God nomo” (Efesas 2:19). Olsem ol stamba tingting blong ol aktiviti, i save gat olgeta ia:

• Bildimap fet long Jisas Kraes.

• Givim wan taem blong gat gud taem mo blong bildimap yuniti.

• Givim ol janis blong wanwan i save groap.

• Mekem wanwan man, woman, mo famli i kam strong moa.

• Helpem ol memba blong oli tekpat long wok blong God blong fasin blong sevem man, mo fasin blong kam olsem wan god (luk long 1.2).

Hemia samfala eksampol blong Jos aktiviti:

• Seves we i blesem ol narawan mo i bildimap ol komuniti rilesensip.

• Misinari wok, tempol wok, mo famli histri wok.

• Ol janis blong developem fasin blong dipen long yumiwan, mo developem ol lidasip skil.

• Edukesen mo wan vokesenol trening.

• Ol aktiviti long wan open ples.

• Ol janis blong developem ol talen mo laekem ol kalja art.

• Ol spot mo fasin blong stap fit.

• Stap selebretem ol spesel taem, olsem ol holidei, o Jos o ol lokol histri taem.

Olsem we oli yusum long hanbuk ia, toktok ia, Jos aktiviti, hem i tokbaot wan aktiviti we wan yunit, kworom o oganaesesen blong Jos i sponsarem.

20.2

Mekem Plan blong Ol Aktiviti

Taem oli stap mekem plan blong ol aktiviti, ol lida oli lukluk long ol nid blong ol memba long saed blong spirit mo long saed blong laef long wol ia. Ol lida oli lukaotem blong Tabu Spirit i lidim olgeta taem oli stap disaed wanem kaen aktiviti nao bae i help blong lukluk long olgeta nid ia.

20.2.1

Responsabiliti blong Mekem Plan blong Ol Aktiviti

Blong kasem moa infomesen long saed blong fasin blong mekem plan blong stek mo maltistek aktiviti, luk long 20.3.

Oli mekem plan blong ol wod aktiviti long eniwan long ol wei ia, folem ol lokol nid.

• Wod kaonsel i save lukluk ova long planing.

• Wod kaonsel i save givim wok long ol spesifik oganaesesen blong help blong mekem plan blong wan, o moa long wan long ol aktiviti.

• Taem we i nid, mo long ol ples we i gat inaf memba, bisoprik i save oganaesem wan wod aktiviti komiti. Oli save singaotem ol yut blong stap olsem memba blong komiti ia. Komiti ia, i wok anda long daereksen blong wod kaonsel. Wod kaonsel i givim wok long wan long ol memba blong hem, blong hem i stap kontaktem aktiviti komiti oltaem.

Blong gat moa infomesen abaot fasin blong mekem plan blong ol wod yut aktiviti, luk long 10.2.1.3 mo 11.2.1.3.

20.2.2

Stap Invaetem Evriwan blong Tekpat

Olgeta we oli mekem plan blong ol aktiviti ia oli mas toktok i go long evriwan, speseli ol niu memba, ol lesaktiv memba, ol yut, ol singgel adalt, ol pipol wetem disabiliti, mo ol pipol blong ol nara fet. Olgeta we oli stap mekem ol plan ia, oli mas tingting gud se sam oli no save mekem tumas samting, from bodi blong olgeta i no letem. Mo tu, oli mas tingting gud long ol defren kalja mo lanwis we i stap.

Olgeta we oli stap mekem ol plan blong ol aktiviti, oli mas lukaotem sam wei blong evriwan i tekpat. Eksampol: Oli save invaetem ol memba mo ol narawan blong oli yusum ol skil mo ol talen blong olgeta insaed long aktiviti.

I nomata se, blong stap kam tugeta long ol aktiviti, i wan blesing, ol memba oli no mas filim se oli mas kam long evri aktiviti. Ol aktiviti oli no mas stap olsem ol hevi trabol long ol lida mo ol memba.

20.2.3

Ol Standet

Ol aktiviti blong Jos oli mas leftemap save mo tokbaot bigwan ol samting “we i klin, i luk naes, o i gudfala mo i nambawan tru” (Ol Toktok blong Bilif 1:13). Insaed long ol aktiviti, i no save gat eni samting we i agensem ol tijing blong Jos. Insaed long ol aktiviti, i no mas gat media, o ol nara entetenmen we i mekem eni samting we i no stret, i luk olsem se i oraet.

Ol samting we oli no folem Tok blong Waes, bae oli no save letem insaed long ol aktiviti blong Jos, o insaed long ol bilding mo graon blong Jos. Olgeta we oli bin dring alkol o oli bin tekem ol drag, bae oli no save tekpat long ol aktiviti blong Jos. Sapos i gat ol situesen olsem, ol lida oli lukluk long olgeta wetem lav mo sore.

20.2.4

Gat Balens mo Yusum Ol Defren Samting

Ol lida oli mekem plan blong gat balens long ol aktiviti, olsem seves, ol kalja art, mo ol aktiviti blong mekem bodi i muvmuv (luk long 20.1). Ol memba oli mas gat ol janis blong tekpat long ol aktiviti we oli gat intres long olgeta. Oli mas sapsapotem tu ol narawan long ol intres blong olgeta.

Olgeta seksen ia oli givim ol eksampol blong ol aktiviti we oli gud tumas.

20.2.4.1

Seves

Ol aktiviti blong givim seves, i givim ol janis blong soem lav long ol nara man, blong filim glad ia blong helpem ol nara man, mo blong mekem ol komuniti oli kam antap.

Ol aktiviti ia, i save gat hemia blong stap visitim ol pipol we oli sik, o oli stap olgetawan, hemia blong mekem ol bilding mo graon blong Jos oli luk naes, mo hemia blong stap tekpat long ol komuniti projek. Long ples we i gat, JustServe.org i givim sam janis blong mekem komuniti seves.

Ol seves aktiviti oli mas folem ol sefti gaedlaen (luk long 20.7.6.1

20.2.4.2

Art blong Kalja

Ol aktiviti blong art blong kalja oli givim ol janis long ol memba blong developem mo serem ol talen blong olgeta. Olgeta aktiviti ia oli fidim fasin blong krietem samting, fasin blong tras long yuwan, mo fasin blong wok wan wetem ol narawan. Ol aktiviti ia i save gat tu ol art, mo samting we oli mekem wetem han blong soemaot, ol talen so, o danis, miusik mo drama. Mo tu, oli save tekem ol selebresen blong kalja, blong holidei, o lokol o jeneral Jos histri.

20.2.4.3

Pleiplei, Helt, Stap Fit, mo Ol Spot

Olsem wanwan man, woman, olsem ol famli, mo olsem ol grup blong Jos, oli leftemap tingting blong ol memba blong tekpat long ol aktiviti we oli helpem helt mo kipim bodi blong olgeta i stap fit. Sam Jos aktiviti blong pleiplei, oli save mekem plan blong olgeta blong mekem se ol memba blong famli oli save tekpat tugeta.

Blong kasem moa infomesen abaot ol spot aktiviti, luk long 20.5.9.

20.2.5

Stap Putum Taem blong Ol Aktiviti

Ol aktiviti ia blong Jos, oli mas mekem plan blong olgeta longtaem bifo oli hapen, sapos i posibol. Ol lida oli mas kipim papa mo mama i save long ol aktiviti we oli blong ol pikinini mo ol yut.

Oli mas holem ol aktiviti long wan stret taem. Oli mas sendemaot olgeta i gobak hom eli, blong mekem se oli save travel hom long wan sef fasin.

Sapos oli holem wan aktiviti long wan mitinghaos, o wan nara bilding blong Jos, oli mas bukum bilding ia longtaem bifo i hapen, blong mekem se bae i no fasfas wetem ol nara aktiviti o ol nara miting.

Ol Mandei naet, oli holemtaet i stap blong mekem famli aktiviti (luk long 20.5.3).

20.2.6

Mane blong Mekem Ol Aktiviti

Plante long ol aktiviti, oli mas ol simpolwan mo oli gat smol mane nomo, o nogat mane blong spendem. Eni mane blong spendem, bae bisoprik, o stek presiden nao i apruvum bifo aktiviti i tekem ples.

Ol memba oli no stap pem blong save tekpat long ol aktiviti. Blong luk ol polisi mo ol gaedlaen blong stap pem samting blong ol aktiviti, luk long 20.6.

20.3

Ol Stek, ol Maltistek, mo Eria Aktiviti

20.3.1

Ol Jeneral Gaedlaen

Plante long ol aktiviti blong Jos, oli holem olgeta long level blong wod. Be, oli leftemap tingting blong ol lida blong holem ol stek mo maltistek aktiviti taem ol aktiviti ia oli save mekem ol stamba tingting long 20.1oli kamtru.

Ol stek mo maltistek aktiviti oli save wok gud blong ol yut, ol singgel memba, mo ol woman, speseli long ol eria we i gat samfala memba nomo. Ol stek mo maltistek aktiviti we oli mekem gud plan from, i save mekem ol memba oli gat wan sekol we i moa bigwan blong ol fren. Ol lida oli faenemaot ol nid blong olgeta we oli wok blong olgeta, mo oli tingting se bae ol aktiviti ia bae i save help blong lukluk long ol nid ia, o nogat. Afta, ol lida ia oli putum ol tingting blong aktiviti ia i go long stek presidensi.

20.3.2

Ol Stek Aktiviti

Ol presidensi blong Stek Yang Man, Yang Woman, Rilif Sosaeti, mo Praemeri, oli stat blong mekem plan blong ol stek aktiviti blong oganaesesen blong olgeta.

Stek yang singgel adalt komiti i stat blong mekem plan blong ol stek aktiviti blong ol yang singgel adalt.

Sapos oli oganaesem wan singgel adalt komiti, ol memba blong komiti ia oli statem wok blong stap mekem plan blong ol aktiviti blong ol singgel adalt.

Sapos oli oganaesem wan stek aktiviti komiti, oli save mekem plan blong ol stek aktiviti, mo stap olsem wan risos blong ol stek oganaesesen blong stap mekem plan blong ol aktiviti blong olgeta, olsem we i stap long aotlaen long 20.3.2.1.

Ol stek aktiviti, bae i nidim blong stek presidensi nao i apruvum. Oli kodinetem olgeta insaed long ol stek kaonsel miting.

Ol lida blong stek oli talemaot long ol lida blong wod abaot ol stek aktiviti, longtaem bifo i hapen. Oli meksua se ol stek aktiviti ia oli mekem blong komplitim ol aktiviti blong wod, be i no blong kompit wetem olgeta.

20.3.2.1

Stek Aktiviti Komiti

Stek presidensi i save oganaesem wan stek aktiviti komiti blong helpem stek kaonsel blong mekem plan blong ol stek aktiviti ia. Stek aktiviti komiti ia, insaed long hem i gat wan jeaman (wan hae kaonsela), mo ol memba blong komiti (luk long 20.3.2.2 mo 20.3.2.3). Stek presidensi i save invaetem ol nara memba blong oli help blong mekem plan blong wan, o moa long wan aktiviti.

20.3.2.2

Stek Aktiviti Komiti Jeaman

Sapos stek presidensi i oganaesem wan stek aktiviti komiti, nao oli givim wok long wan hae kaonsela blong i stap olsem jeaman blong komiti ia. Ol responsabiliti blong hem, i gat olgeta ia:

• I stap mentenem wan kalenda blong ol aktiviti blong stek.

• I supavaesem ol memba blong komiti blong stap mekem ol plan blong ol stek aktiviti.

• Hem i rekomendem wan stek aktiviti bajet we i ditel i go long stek presidensi bifo stat blong wanwan yia. Bajet ia, insaed i no gat ol aktiviti we i blong wanwan stek oganaesesen.

• Hem i stap olsem wan risos long ol lida blong ol oganaesesen long stek taem oli stap mekem plan blong ol aktiviti.

20.3.2.3

Ol Stek Aktiviti Komiti Memba

Wan memba blong stek presidensi, o wan hae kaonsela we i kasem wok ia, i save singaotem ol memba blong oli givim seves insaed long stek aktiviti komiti ia. Oli wok anda long daereksen blong jeaman blong komiti. Ol memba blong komiti oli stap help blong mekem plan mo blong oganaesem ol aktiviti insaed long stek.

20.3.3

Ol Maltistek mo Eria Aktiviti

Long ol eria we i no gat tumas yut, ol lida oli mas holem ol maltistek yut aktiviti plante taem, blong mekem se ol yut oli save gat wan sosol laef long wan bigfala grup. Ol eria aktiviti blong ol yut, oli save holem olgeta wanwan taem.

Oli sapos blong holem ol maltistek aktiviti blong ol yang singgel adalt oltaem, taem we, blong kam tugeta i no nidim plante taem o plante mane. Ol eria aktiviti blong ol yang singgel adalt, oli save holem olgeta wanwan taem.

Blong gat moa infomesen abaot ol maltistek aktiviti blong ol singgel memba, luk long 14.2.1.3.

Ol maltistek aktiviti, oli mas simpol mo oli ol defdefren wan.

Sapos stek presiden oli filim se wan maltistek aktiviti bae i mekem gud long ol memba blong stek blong olgeta, oli save askem raet long Eria Presidensi. Bifo oli proposem wan maltistek aktiviti, ol stek presiden oli talemaot wanem i bes wei blong mitim ol nid we oli bin faenemaot. Ol stek presiden oli tingting long totol mane blong spendem long aktiviti, taem mo travel we bae i nid blong aktiviti ia. Oli tingting tu long sefti (luk long 20.7.6).

Ol miting blong kodinetem plan blong ol maltistek aktiviti, bae oli save holem bifo o afta long ol miting blong eria kaonsel mo kodineting kaonsel (luk long 5.2.3 mo 5.2.4). Olsem we i nid, oli save invaetem sam moa lida i kam; hemia stek Rilif Sosaeti, Ol Yang Man, mo Ol Yang Woman presiden.

Eria Presidensi i save givim wok long ol stek presiden, o Ol Eria Seventi blong oli stap lidim ol komiti we oli mekem ol plan mo oli stap kareaot ol maltistek o eria aktiviti. Ol presidensi blong stek oli save singaotem ol memba blong ol stek blong olgeta blong givim seves long olgeta komiti ia.

Mane blong yusum long ol maltistek aktiviti ia oli kam long ol mane blong bajet blong olgeta stek we oli tekpat long aktiviti. Mane blong ol aktiviti, oli save kam long ol bajet blong eria, o blong Jos hedkwota taem oli apruvum.

20.3.4

Stap Folemgud Ol Jos Polisi blong Travel

Ol stek, maltistek, mo eria aktiviti, oli mas folem gud ol polisi long saed blong Jos travel (luk long 20.7.7). Travel blong ol FSY konfrens, oli mas folemgud ol Jos polisi blong travel, be nomo sapos wan FSY administreta i givim ol nara instraksen long ol lokol lida.

20.4

Yut Konfrens

Long stat long Jenuware long yia we bae oli gat 14 yia, oli stap invaetem ol yang man, mo ol yang woman blong tekpat tugeta long wan yut konfrens. Ol yut konfrens ia, plante taem, oli holem olgeta wan taem long wan yia long wod o stek level. Oli save holem long maltistek o eria level. Long wan yia we oli givim wok long ol yut blong go long wan FSY konfrens, ol stek mo ol wod oli no sapos blong holem ol yut konfrens.

Ol stamba tingting blong ol yut konfrens oli blong helpem ol yut blong:

• Bildimap fet long Jisas Kraes.

• Mekem ol testemoni oli kam strong moa.

• Developem ol talen.

• Mekem ol niu fren.

• Gat gud taem wetem ol yut we oli serem ol semmak bilif mo standet.

Mo tu, ol yut ia oli save lanem ol lidasip skil taem oli stap help blong mekem plan blong ol yut konfrens ia.

Ol wod yut konfrens, bae wod yut kaonsel nao i mekem plan mo i kareaot konfrens ia anda long daereksen blong bisoprik (luk long 29.2.6). Bisoprik i kasem raet blong stek presidensi blong mekem ol plan blong gat wan wod yut konfrens.

Ol yut konfrens blong stek, stek yut lidasip komiti i mekem plan mo i kareaot konfrens ia (luk long 29.3.9). Oli sapos blong invaetem ol yut blong helpem komiti plante.

Ol yut konfrens, mane blong hem i kam long bajet blong stek o blong wod. Ol memba oli no sapos blong pem wan fi blong tekpat long ol yut konfrens (luk long 20.6).

Taem we ol lida mo ol yut oli mekem plan blong gat wan yut konfrens, oli sapos blong folem ol polisi we oli stap insaed long japta ia mo olgeta gaedlaen ia:

• Jusum wan stamba toktok blong gospel, olsem wan skripja, we bae i givim insperesen long ol yut, mo bae i helpem olgeta blong andastanem wanem we bae konfrens ia i givim. Stamba toktok blong yia blong ol yut, oli save yusum olsem stamba toktok blong yut konfrens. Bisoprik o stek presidensi i mas apruvum stamba toktok blong konfrens.

• Mekem plan blong gat ol aktiviti we oli go wetem stamba toktok ia.

• Kasem apruvol blong bisoprik o stek presidensi long saed blong evri spika mo aktiviti. Ol spika oli mas ol memba blong Jos we oli stap tij wetem Spirit. Luk long 38.8.18 blong gat ol nara gaedlaen long saed blong ol spika.

• Sapos oli mekem plan blong holem wan samting long Sandei, hem i mas go stret wetem Sabat dei. Ol testemoni miting, ol toktok storian wetem bisoprik, o ol semmak miting, oli save hapen. Be, oli no mas holem sakramen miting—mo oli no mas blesem mo pasem sakramen—aotsaed long ol baondri blong wod o stek. Eni eksepsen, bae i mas blong wan aktiviti we Jos i sponsarem, mo Eria Presidensi i mas apruvum. Ol grup oli no mas travel i go, o i kam long yut konfrens long wan Sandei.

• Meksua se i gat inaf adalt blong supavaes long evri taem (luk long 20.7.1).

• Folem evri sefti gaedlaen we oli stap long 20.7.6.

Oli invaetem ol adalt lida blong kam long konfrens ia olsem we i posibol. Hemia i tekem ol memba blong bisoprik, o stek presidensi, wod o stek Yang Woman presidensi, mo stek Yang Man presidensi. Ol advaesa blong Yang Woman mo Yang Man long wod, oli save invaetem olgeta tu blong kam.

20.5

Ol Polisi mo Gaedlaen blong Jusum mo Mekem Plan blong Ol Aktiviti

Ol lida oli mas meksua se olgeta polisi mo gaedlaen ia, bae oli mas folem gud taem oli stap jusum mo mekem plan blong evri aktiviti blong Jos.

20.5.1

Ol Aktiviti blong Winim Mane o Ol Politik Aktiviti

Ol aktiviti we bae i blong salem eni samting, o blong eni politik aktiviti, bae oli no save givim raet from (luk long 35.5.6.1 mo 35.5.6.3).

20.5.2

Ol Danis mo Miusik

Insaed long evri danis aktiviti, bae fasin blong dresap, fasin blong mekem yuwan, laet, stael blong danis, ol toktok blong singsing, mo miusik oli mas mekem i kam wan ples we Spirit blong Lod i save stap long hem (luk long Blong Ol Yut Oli Kam Strong: Wan Gaed Buk blong Stap Mekem Ol Joes).

Ol lida oli yusum fom blong Miusik Kontrak taem oli pem wan band, wan okestra, o wan DJ (man blong plei miusik). Kontrak ia i help blong meksua se fasin mo miusik oli stret wetem ol danis blong Jos. Ol lida oli mekem ol strong mo klia agrimen long raeting we i komitim man we i putum miusik blong hem i folem ol standet blong Jos long wan strik fasin taem hem i putum miusik blong ol aktiviti blong Jos.

20.5.3

Ol Mandei Naet

Oli leftemap tingting blong ol memba blong holem ol famli aktiviti naet long Mandei, o long sam nara taem. I no mas gat eni Jos aktiviti, miting, ol seves blong baptaes, we i tekples afta long 6 klok naet long ol Mandei.

Ol lida oli meksua se ol bilding blong Jos mo ol nara propeti blong Jos oli klos long ol Mandei naet. Ol lafet o ol semmak aktiviti oli no save tekples long ol bilding blong Jos long ol Mandei naet.

Ol taem nomo we oli no folem rul (eksepsen), ol wod blong ol yang singgel adalt, mo ol wod blong ol singgel adalt, oli save holem ol aktiviti long ol Mandei naet, mo oli save yusum ol bilding blong Jos. Wan taem nomo we oli gat raet blong no folem rul ia i taem we namba 31 Disemba i foldaon long wan Mandei (luk long 20.5.4).

20.5.4

Ol Aktiviti blong Dei Bifo Niu Yia

Sapos wan wod o wan stek i mekem plan blong gat wan aktiviti blong Dei Bifo Niu Yia, mo sapos Dei Bifo Niu Yia i foldaon long wan Satedei, Sandei, o Mandei, ol lida oli mas folem olgeta gaedlaen ia:

Satedei. Stek presiden i save putum taem blong gat wan nara Sandei blong livim kakae. Aktiviti i save gohed afta long medelnaet. Be, i mas finis eli blong olgeta we oli tekpat oli save go long ol Sandei miting.

Sandei. Ol aktiviti blong Jos, oli save mekem plan from long Satedei 30 Disemba. Ol gaedlaen ia long paragraf bifo, oli mas folem. Oli leftemap tingting blong ol famli blong selebretem Dei Bifo Niu Yia long hom blong olgeta. Ol aktiviti oli mas stret wetem Sabat dei.

Mandei. Stek presiden, o bisop i save givim raet blong oli yusum ol bilding blong Jos long Mandei naet.

20.5.5

Ol Aktiviti we Oli Go Kasem Delaet

I nid blong kasem raet blong ol papa mo mama, o olgeta we oli lukaot long ol pikinini, long saed blong evri aktiviti blong Jos we oli go kasem delaet, mo i gat ol yut insaed long ol aktiviti ia (luk long 20.7.4).

Ol Jos aktiviti we oli go ovanaet, o go kasem delaet blong ol kombaen grup blong ol yang man mo ol yang woman, bisop mo stek presiden i mas apruvum. Hemia i tru semmak blong ol aktiviti blong ol memba we oli ol man, mo ol woman we oli singgel. Ol kaen aktiviti olsem, i no sapos blong hapen oltaem. Ol eksampol, i tekem ol yut konfrens, ol FSY (BYKS) konfrens, o ol tempol visit we i nidim ol longfala travel.

Ol man mo ol woman we oli tekpat, mo ol lida, oli mas gat ol seperet ples blong slip. Be, wan mared kapol i save serem semfala rum o tenet. Wanwan yut i mas gat bed blong hem, o bag blong slip blong hemwan.

Sapos ol adalt lida mo ol yut oli serem ol nara ovanaet bilding, olsem wan smol wud haos o tenet, bae i mas gat tu (2) adalt insaed long bilding ia, mo tufala i mas semmak seks olsem yut ia.

Ol yut oli no save stap long semmak tenet o rum wetem wan adalt sapos i gat wan adalt i stap. Be, wan yut i save stap hemwan long wan tenet o rum wetem papa, mama o hem we i stap lukaot long hem.

Evri ovanaet aktiviti blong Jos, i mas gat tu (2) adalt lida i mas stap.

I mas gat wan namba blong ol prishud lida we i bigwan inaf we oli mas stap long fultaem blong ol ovanaet aktiviti ia, blong oli givim sapot mo proteksen. Long kes blong ol aktiviti blong Ol Yang Woman, ol prishud lida oli mas stap long ol bilding o haos we i seperet blong hemia blong ol yang woman.

Ol lida oli fulumap wan fom we oli singaotem Iven mo Aktiviti Plan fom, blong yusum long ol ovanaet aktiviti.

Oli no apruvum ol ovanaet aktiviti long ol mitinghaos blong Jos o long graon o yad blong ol mitinghaos.

Blong gat moa infomesen, luk long “FAQs—What Should I Do?” long ChurchofJesusChrist.org.

20.5.6

Fasin blong Ripresentem Hae God o Sevya

Yumi no gat raet blong mekem wan i ripresentem God Papa mo Tabu Spirit long eni wei long ol miting, ol drama, o ol miusik naet.

Sapos oli ripresentem Sevya, bae oli mas mekem wetem bigfala fasin blong respek. Ol man nomo we oli gat fasin we i gud tumas oli save tekem pat ia. Man ia we i ripresentem Sevya, hem i no mas singsing o danis. Taem hem i toktok, hem i mas talem ol stret toktok we Sevya i talem we i stap long ol skripja. Long en blong aktiviti ia, hem i mas jenisim klos blong hem kwiktaem, mo werem ol nomol klos.

Ol pikinini oli no mas aktem rol blong Sevya long wan drama be hemia nomo long taem we Jisas i bon.

20.5.7

Ol Prea mo Ol Divosen long Taem blong Ol Aktiviti

Plante long ol aktiviti, oli mas openem mo klosem wetem wan prea. Oli save putum wan hym, wan tabu toktok, o wan las toktok we i kam long wan lida, o wan we i tekpat.

20.5.8

Kipim Sabat Dei I Tabu

I no mas gat ol Jos kamp, ol spot taem, o pleiplei taem we oli putum blong i hapen long Sandei. Mo tu, ol yut grup mo ol narawan oli no mas travel, i go mo i aot, long ol kamp ples, o yut konfrens ples long ol Sandei.

Taem we bae oli no folem rul ia, i taem we sefti mo travel mane blong hem i bigwan tumas, nao oli save putum se sam yut aktiviti oli tekem ples stret afta long ol wosip miting blong Sandei. Ol aktiviti ia, oli mas seperet long Sandei miting. Oli mas folem mo stap kipim spirit blong Sabat. I nid blong bisop o stek presiden i apruvum.

20.5.9

Spot (ol)

Ol Jos spot aktiviti oli givim wan janis blong gat wan aktiviti blong muvum bodi, mo wan taem blong felosip. Oli mas leftemap tingting blong evriwan i tekpat, i gat gud tingting blong spot, mo skil divelopmen. Taem we i gat kompetisen insaed long wan aktiviti, bae oli mas traehad plante blong i no gat raorao. Evri memba blong tim oli mas gat ol gudfala janis blong plei, i nomata se oli gat skil o nogat.

Stek presidensi i lukluk ova long ol spot aktiviti we i hapen insaed long stek. Oli putum tu ol gaedlaen we i (1) talemaot yia we olgeta blong plei oli tekpat long hem long ol spot blong Jos, mo (2) oli talem se wan i save plei o no. Ol desisen olsem, oli mas mekem bifo stat blong taem blong plei.

Sapos oli stap holem ol maltistek spot aktiviti, Eria Presidensi, o Ol Eria Seventi oli lukluk ova long olgeta, Sapos oli holem ol aktiviti ia, olgeta spot speselis nao oli lukaotem; ol ejen stek presiden we Eria Presidensi i jusum olgeta nao bae oli singaotem ol speselis ia. Ol eria spot tunamen, oli no apruvum olgeta.

Olgeta we oli tekpat long ol spot aktiviti blong Jos, oli no nid blong oli ol memba blong Jos. Be, oli mas laef insaed long ol baondri blong stek, mo oli mas agri blong stap folem ol standet mo ol polisi blong Jos long taem blong ol aktiviti.

Sapos oli yusum ol tim yunifom, bae ol yunifom ia oli mas simpol, i no sas, i kavremap gud bodi, mo i stret long aktiviti ia. Ol kalkala T-sot mo ol kolkol klos oli naf. Oli pem ol yunifom ia wetem bajet blong stek o wod.

Oli no stap leftemap tingting blong gat ol tim awod o awod we i go long wanwan man, o presentesen blong ol trofi.

20.5.10

Ol Tempol Visit

Ol tempol visit, oli stap oganaesem olgeta long level blong wod, o stek insaed long tempol distrik we oli stap anda long hem.

Ol tempol visit we wod o stek i oganaesem blong go long wan tempol aotsaed long tempol distrik blong olgeta, oli no sapotem tumas. Ol kaen visit olsem, bae i nidim blong stek presidensi nao i apruvum. Ol ovanaet tempol visit, bae i nidim blong stek presidensi nao i apruvum.

Ol tempol visit, oli mas go wetem ol polisi we oli stap long 20.7.7. Ol ovanaet tempol visit, oli mas folem ol polisi we oli stap long 20.5.5.

20.5.11

Ol Aktiviti we Oli No Apruvum

Ol yunit blong Jos oli no save sponsarem ol aktiviti we oli no go stret wetem ol gaedlaen insaed long japta ia. Olgeta ia, i gat:

• Ol aktiviti we i gat bigfala denja, o i gat denja blong wan i kasem kil o kasem sik (luk long 20.7.6).

• Ol aktiviti we i nidim blong spendem bigfala mane, o mekem longfala travel (luk long 20.7.7).

• Ol program blong eksasaes we oli gat miusik, o toktok blong singsing, dresap, o ol nara samting we oli no go wetem ol standet blong Jos.

Sapos wan bisop i gat wan kwestin abaot wan aktiviti, se hem i stret o no, hem i askem long stek presiden. Ol stek presiden oli save givim ol kwestin ia long Eria Presidensi.

20.6

Ol Polisi mo Gaedlaen blong Pem Ol Aktiviti

Ol lida oli mas meksua se olgeta polisi mo gaedlaen ia, bae oli mas folem gud olgeta, taem oli givim mane blong evri aktiviti blong Jos.

20.6.1

Ol Aktiviti we Oli Pem wetem Bajet Mane blong Wod o Stek

Ol mane blong wod o long stek oli mas yusum olgeta blong pem spending blong evri aktiviti—mo samfala eksepsen we oli stap long 20.6.2.

Mo tu, ol memba oli no sapos blong karem ol tul, ol saplae, o pem rent o admisen fi, o ol transpot blong go longwe, wetem mane blong olgetawan nomo. Ol memba oli save karem kaekae i kam, sapos i no hevi long olgeta.

20.6.2

Ol Mane blong Ol Yut Kamp

Sapos bajet blong wod o stek i no gat inaf mane blong pem ol aktiviti andanit ia, ol lida oli save askem olgeta we oli tekpat blong pem wan smol pat o evriwan.

• Wan yia kamp blong Aronik Prishud, we i longwan, o wan semmak aktiviti

• Wan yia kamp we i longwan blong Ol Yang Woman, o wan semmak aktiviti

Mane blong pem ol samting blong yia kamp, o travel i no mas antap tumas. Semtaem, i no from se wan memba i no gat mane, nao bae hem i no save tekpat.

Sapos mane blong bajet blong wod o stek, mo olgeta we oli tekpat oli no naf blong ol kamp ia, bisop i gat raet blong save oganaesem wan wod fanresing, wan taem long wan yia. Aktiviti ia i mas folem ol gaedlaen we oli stap long 20.6.5.

Blong gat moa infomesen abaot fasin blong spendem mane blong ol bigfala maltistek o eria aktiviti blong ol yang singgel adalt, luk long 14.2.1.3.

20.6.3

Mane blong FSY (BYKS ) Konfrens

Oli save askem ol yut blong givim smol mane blong go long ol konfrens Blong Ol Yut Oli Kam Strong (BYS o FSY). Sapos mane bae i stopem wan yut blong tekpat, bisop i save yusum mane blong bajet blong wod blong pem evri fi o sam pat blong fi ia. Luk long FSY.ChurchofJesusChrist.org.

20.6.4

Mane blong Ol Tul mo Ol Saplae

Sapos i posibol, ol tul mo ol saplae we wod i nidim blong ol yia yut kamp, oli pem wetem bajet blong wod. Sapos mane i no naf, bisop i gat raet blong save oganaesem wan wod fanresing, wan taem long wan yia. Aktiviti ia i mas folem ol gaedlaen we oli stap long 20.6.5.

Ol tul mo ol saplae we oli pem wetem ol mane blong Jos, i nomata se i kam long bajet blong wod o wan fanresing, oli blong yusum long Jos nomo. Oli no blong wan i yusum blong hemwan.

20.6.5

Ol Taem blong Mekem Fanresing

Plante taem, mane blong yusum long ol aktiviti blong stek mo wod, oli kamaot long mane blong bajet. Be, wan stek presiden o wan bisop i save givim raet blong holem wan fanresing evri yia, blong ol samting ia:

• Blong help blong pem mane blong spendem long ol aktiviti, olsem oli putum long 20.6.2 mo 20.6.3.

• Blong help blong pem ol tul blong yunit i yusum blong yia kamp olsem we i stap long aotlaen long 20.6.4.

Sapos oli holem wan fanresing aktiviti, fanresing ia i sapos blong gat gud samting long hem o givim wan seves we i impoten.

Ol lida oli meksua se ol mane we oli bin kasem, bae oli serem i stret nomo. Ol bajet blong ol kworom blong Aronik Prishud, i folem namba blong ol yang man we oli stap insaed long wod. Bajet blong ol yang woman i folem namba blong ol yang woman insaed long wod.

Ol kontribusen we i go long ol fanresing aktiviti, oli mas ol volontia kontribusen. Ol lida oli meksua se ol memba oli no mas filim se oli mas givim wan kontribusen.

Ol yunit we oli sponsarem ol fanresing, oli no mas mekem advataesmen, o oli no mas askem samting i ova long baondri blong olgeta. Mo tu, oli no sapos blong salem ol samting o seves, long fasin blong go noknok long doa blong man.

Ol eksampol blong sam fanresing aktiviti we oli no apruvum oli:

• Ol aktiviti we bae yu mas pem takis from.

• Ol aktiviti we oli pem man blong mekem; hemia tru long ol wokman o tru long kontrak.

• Entetenmen we stek o wod i pem ol man we oli mekem entetenmen.

• Fasin blong salem ol samting blong stoa, o ol seves blong wan bisnis.

• Ol gem we oli plei wetem laki, olsem ol rafol, lotri tikit, mo bingo.

• Ol aktiviti we oli no sef.

Eni samting we i aotsaed long rul, bae Eria Presidensi nao i apruvum.

20.7

Ol Sefti Polisi mo Gaedlaen blong Ol Aktiviti

Ol lida oli mas meksua se olgeta polisi mo gaedlaen ia, bae oli mas folem gud olgeta long evri aktiviti blong Jos.

20.7.1

Adalt we i Supavaes

I mas gat tu (2) adalt we oli mas stap long evri aktiviti blong Jos we i gat ol yut mo ol pikinini i tekpat long hem. Maet bae i nid blong gat sam moa adalt, folem saes blong grup, ol skil we i nidim blong aktiviti, mo ol nara samting moa. Oli leftemap tingting blong ol papa mo mama blong save help.

Evriwan we i wok wetem ol pikinini mo ol yut oli mas komplitim proteksen trening blong ol pikinini mo ol yut. Luk long ProtectingChildren.ChurchofJesusChrist.org.

20.7.2

Ol Samting we Wan I Mas Gat Folem Yia blong Wanwan blong Save Tekpat long Ol Yut Aktiviti

Wetem raet blong papa mo mama blong olgeta, ol yut oli save go long wan ovanaet kamp; hemia stat long Jenuware blong yia ia we oli kasem 12 yia. Oli save go long ol danis, ol yut konfrens, mo ol BYS konfrens, hemia stat long manis Jenuware blong yia ia we oli kasem 14 yia.

20.7.3

Insurens

20.7.3.1

Insurens blong Trak blong Yuwan

Luk long 20.7.7.

20.7.3.2

Helt Insurens blong Wanwan mo Insurens blong Aksiden

Long plante pat blong wol, ol helt mo aksiden insurens i stap blong ol memba blong Jos oli yusum tru long ples blong wok, o ol gavman program. Ol memba we oli gat insurens ia, oli save yusum ol benefit blong insurens ia taem oli kasem wan kil long wan aktiviti blong Jos, hemia bifo oli askem help we i kam long wan Jos aktiviti insurens blong Jos (luk long 20.7.3.4).

20.7.3.3

Insurens blong Yuwan

Jos i givim advaes long ol memba mo ol lida we oli lukluk ova long ol aktiviti blong Jos, blong oli mas protektem olgetawan, taem i posibol, taem oli tekem inaf insurens we i kavremap olgeta. Kaen insurens olsem, i stap tru long insurens blong olgeta we oli gat haos, o ol nara polisi. Blong gat moa infomesen, luk long “FAQs—What Should I Do?” long ChurchofJesusChrist.org.

20.7.3.4

Jos Aktiviti Medikol Help Program

Long Yunaeted Stet mo Kanada, Jos Aktiviti Medikol Help (CAMA) Program i givim wan nara medikol mo tut benefit blong wan we i kasem kil taem hem i bin tekpat long wan aktiviti blong Jos. I givim smol help long saed blong fenerol, sapos i nid. Program ia i blong sapotem, be i no blong riplesem, insurens blong wan long saed blong helt mo aksiden. Blong gat moa infomesen, luk long “FAQs—What Should I Do?” long ChurchofJesusChrist.org.

Sapos wan aksiden o kil i hapen long Jos, o long taem blong wan aktiviti we Jos i sponsarem, ol lida oli disaed sapos i nidim CAMA. Eni lida i save sendem ripot blong wan samting we i bin hapen long Global Incident Reporting sistem long incidents.ChurchofJesusChrist.org. Sapos lida i talem se tritmen ia i bitim ol fas help, nao bae oli letem bisop i save, mo bae hem i kasem enrolmen infomesen. Bisop i tingting long paoa blong wan blong save pem ol medikol bil tru long ol nara wei, olsem insurens blong hu i kasem kil, o ol nara risos. Hem i save givim raet blong yusum mane blong CAMA, sapos hem i filim se i stret.

Blong gat moa infomesen, luk long Church Activity Medical Assistance Handbook. Blong kasem hanbuk ia, kontaktem:

Deseret Mutual Benefit Administrators

P.O. Box 45530

Salt Lake City, UT 84145-0530

Telefon: [phone] o 1-800-777-1647

Imel: [e-mail]

Websaet: dmba.com/churchactivity

20.7.3.5

Ol Setifiket blong Insurens

Plante taem, oli askem Jos blong givim pruf se hem i gat insurens long saed blong ol aktiviti. Ol rikwes ia, oli kam from i gat ol agrimen blong pem rent, ol kontrak, o ol pemit we i go wetem ol aktiviti ia.

Insaed long Yunaeted Stet mo Kanada, ol lida oli save kasem wan setifiket blong soem pruf blong insurens long InsuranceCertificates.ChurchofJesusChrist.org. Blong ol ples aotsaed long Yunaeted Stet mo Kanada, ol lida oli kontaktem eria ofis. Ol rikwes ia, i mas gat:

• Nem mo adres blong oganaesesen we i askem pruf blong insurens.

• Oli tokbaot ples mo ples i olsem wanem, sapos oli stap rentem wan bilding.

• Ol limit blong pem samting.

• Ol nara infomesen abaot aktiviti.

Ol lida oli mas plan bifo taem blong mekem se i gat inaf taem blong rere mo sendem ol setifiket ia.

20.7.4

Raet blong Papa mo Mama

Ol pikinini mo ol yut oli no save tekpat long wan aktiviti blong Jos, sapos oli no gat raet blong papa mo mama o gadien blong olgeta. Blong ol aktiviti blong Jos we i gat wan ovanaet, longfala travel, o plante denja, bae i nid blong oli saenem wan agrimen long raeting. Sam aktiviti, bae i nidim sam moa plan blong daonem denja. Oltaem sefti i wan impoten samting blong lukluk long hem. Luk long 20.7.6.1.

Ol papa, mama mo olgeta we oli gat wok blong lukaot long ol pikinini mo yut, oli givim raet ia taem oli saenem fom ia, Raet blong Papa mo Mama o Man blong Lukaot long Pikinini mo Medikol Rilis. Hem we i lidim aktiviti ia, i mas mekem wanwan we i tekpat i gat wan fom we oli saenem blong wanwan aktiviti.

20.7.5

Ol Ripot blong Abius

Sapos i gat eni abius we i hapen long taem blong wan aktiviti blong Jos, oli mas ripotem i go long ol sivil atoriti. Oli mas kontaktem bisop kwiktaem. Ol instraksen blong ol memba oli stap long 38.6.2.7. Ol instraksen blong ol Bisop oli stap long 38.6.2.1.

Blong kasem mining blong abius, luk long 38.6.2.3 mo 38.6.2.4.

20.7.6

Sefti Rul mo Fesem Taem blong Aksiden mo Mekem Aksiden Ripot

20.7.6.1

Ol Sefti Rul

Ol lida mo olgeta we oli tekpat, oli luklukgud blong skelem ol aktiviti blong mekemsua se denja i smol, mo man i no sik. Ol aktiviti oli no mas gat denja blong damejem propeti. Long taem blong ol aktiviti, ol lida oli mekem bes blong meksua se i gat sefti. Taem oli mekem ol stret plan mo taem oli folem ol sefti rul, ol lida oli save daonem denja blong aksiden i hapen.

I mas gat stret trening mo stret fasin blong lukaot long man long taem blong aktiviti. Ol aktiviti oli mas stret mo folem yia, paoa blong olgeta we oli tekpat, mo tu, wanem we oli save andastanem.

Ol lida oli mas talemaot long evriwan we i tekpat blong yusum ol sefti praktis blong aktiviti ia. Taem ol aktiviti i askem blong memba i gat ol spesifik skil blong bodi, o eksperiens, maet i nidim blong kasem spesel trening long saed blong ol aktiviti ia o blong stap yusum ol profesonol gaed.

Ol lida oli mas rere blong ol imejensi. Mo tu, bifo aktiviti i tekples, oli mas save olsem wanem blong kontaktem ol lokol polis mo ol imejensi seves. Blong gat moa infomesen, luk long “FAQs—What Should I Do?” long ChurchofJesusChrist.org.

20.7.6.2

Wanem blong Mekem Taem I Gat Aksiden

Sapos wan aksiden o kil i hapen long propeti blong Jos, o long taem blong wan Jos aktiviti, ol lida oli mas folem olgeta gaedlaen ia, taem i posibol:

• Givim fas help. Sapos wan i nid blong oli givim sam moa medikol kea, kontak imejensi medikol seves. Mo tu, kontaktem papa o mama, gadien, o ol nara famli, mo bisop o stek presiden.

• Sapos wan i go lus, o i ded, kwiktaem kontaktem ol ofisa we oli mekem man i folem lokol loa. Koperet wetem olgeta fulwan.

• Givim sapot long saed blong filing mo tingting.

• No leftemap tingting mo no daonem tingting blong lukaotem aksen folem loa. No mekem komitmen long bihaf blong Jos.

• Karem, mo kipim ol nem blong ol witnes, ol kontak blong olgeta, ol stori blong wanem i bin hapen, mo ol foto.

• Ripotem aksiden ia (luk long 20.7.6.3).

20.7.6.3

Ripotem Aksiden

Olgeta situesen ia, oli mas ripotem onlaen long incidents.ChurchofJesusChrist.org. Bisop, stek presiden, o memba i talemaot huia i save abaot aksiden ia mo i mekem hem i mekem ripot kwiktaem.

• Wan i kasem wan aksiden, o kil long propeti blong Jos, o long taem blong wan aktiviti blong Jos.

• Wan we i bin tekpat long wan aktiviti blong Jos, i go lus.

• Wan i damejem propeti blong wan praevet, blong pablik o blong Jos long taem blong wan aktiviti blong Jos.

• Wan i talem se bae i tekem aksen folem loa.

Sapos i gat wan samting we i mekem se i gat bigfala kil, wan i ded, o wan i go lus, stek presiden, bisop, o memba we hem i jusum, kwiktaem i tekem wan long ol aksen ia:

• Long Yunaeted Stet o Kanada, hem i talemaot long Risk Management Division (Denja Manejmen Dipatmen) long hedkwota blong Jos (1-801-240-4049 o 1-800-453-3860, ekstensen 2-4049; afta taem blong wok, long ol wiken, ring long 1-801-240-1000 o 1-800-453-3860, mo bae opereta bae i kasem wan kwiktaem). Afta, kontaktem Eria Presidensi.

• Blong ol ples aotsaed long Yunaeted Stet mo Kanada, ringim eria ofis.

Stek presiden o bisop i ripotem tu ol kil mo damej long ol bilding blong Jos, o propeti blong Jos i go long Bilding maneja.

Blong gat moa infomesen, luk long “FAQs—What Should I Do?” long ChurchofJesusChrist.org.

20.7.6.4

Insurens mo Ol Kwestin

Sapos wan aksiden o kil i hapen long taem blong wan samting blong Jos, ol lida oli disaed sapos i nidim Jos Aktiviti Medikol Help Program ( o CAMA); blong hemia (luk long 20.7.3.4).

Long samfala kes, stek presiden o bisop i save gat sam kwestin abaot ol sefti problem o klem agensem Jos. Stek presiden (o wan bisop anda long daereksen blong stek presiden) i sendem ol kwestin olsem i go long Denja Manejmen Dipatmen, o i go long eria ofis.

20.7.7

Travel

Travel blong ol aktiviti blong Jos, bisop o stek presiden i mas apruvum. Ol travel blong ol aktiviti i no mas givim hevi wok long ol memba.

Olgeta we oli tekpat oli no mas travel long ol longfala rod (moa bitim samfala aoa) blong ol aktiviti. Eni eksepsen, bae i nidim apruvol blong Eria Presidensi. Sapos Eria Presidensi i apruvum wan travel olsem, ol memba oli no sapos blong spendem mane blong olgeta from (luk long 20.6).

Ol travel praktis mo hao blong yusum ol gaedlaen ia long seksen ia, i mas semmak long medel blong ol yunit insaed long wan semfala eria o kodineting kaonsel. Ol stek presiden oli save toktok raon mo agri long wan kaen praktis long saed blong travel long taem blong kodineting kaonsel miting.

Ol lida oli fulumap wan fom we oli singaotem Aktiviti Plan fom, blong yusum long ol aktiviti we i nid blong travel longwe.

Taem wan aktiviti blong Jos blong ol yut i minim se bae oli travel longwe, o oli ovanaet, ol papa mo mama oli mas givim raet blong ol pikinini blong olgeta oli tekpat (luk long 20.7.4). I mas gat inaf adalt we oli stap blong supavaes (luk long 20.7.1).

Taem we i posibol, ol grup blong Jos oli mas yusum ol stret pablik transpot we oli gat laesens, mo oli gat insurens blong travel longwe. Oli mas save gud tu long saed blong insurens blong wan we i kasem kil.

Taem we ol grup blong Jos oli travel long ol praevet trak, wanwan trak ia i mas stap long gudfala kondisen, i sef. Wanwan i mas gat wan strap long jea. Wanwan draeva i mas gat wan laesens, mo i mas wan adalt we i responsibol. Evri trak mo draeva, oli mas gat wan gudfala insurens blong trak. I mas gat plan i stap blong meksua se ol draeva oli wekap gud mo oli lukluk gud rod. Taem i posibol, wan adalt i no mas stap hemwan wetem wan yut insaed long wan trak, be nomo sapos yut ia i stret pikinini blong hem.

Ol oganaesesen blong Jos oli no save onem ol trak o bas blong mekem ol grup travel.

Wan man mo wan woman, tufala i no mas travel tugeta tufala wan blong go long ol aktiviti blong Jos, ol miting, o wok we oli givim, be nomo sapos tufala i mared, o sapos tufala tugeta i singgel.

Blong gat moa infomesen, luk long “FAQs—What Should I Do?” long ChurchofJesusChrist.org.

20.8

Administresen Polisi blong Ol Aktiviti

Ol lida oli mas meksua se olgeta polisi mo gaedlaen ia, bae oli mas folem gud long evri aktiviti blong Jos.

20.8.1

Ol Tul Wetem Kopi Raet

Luk long 38.8.11

20.8.2

Rentem Ol Bilding we I No blong Jos blong Holem Ol Aktiviti

Taem we ol bilding blong Jos oli no stret blong yusum blong wan stek o maltistek aktiviti, oli save rentem wan ples wetem raet we i kam long stek presiden. Ol rikwes olsem, Jos bilding maneja nao i handelem.

Oli save askem ol lokol ples ia blong soem we oli gat insurens taem Jos i wantem rentem o yusum ol bilding ia we Jos i no ona blong ol. Blong gat moa infomesen abaot olsem wanem blong kasem setifiket blong insurens, luk long 20.7.3.5.

20.8.3

Aktiviti we Oli Pem From

Ol lida blong stek mo wod oli meksua se ol lokol aktiviti blong Jos oli no spolem rod blong Jos i fri mo i no pem ol takis. Blong kasem samfala gaedlaen, luk long 34.8.1.