21.

Wok blong Givhan

21.0

Fas Toktok

Blong givhan, hem i minim blong givim seves long ol narawan semmak olsem we Sevya i bin mekem (luk long Matiu 20:26–28). Hem i bin lavem, tijim, i bin prea from, i bin kamfotem mo blesem olgeta raon long Hem (luk long Ol Wok 10:38). Olsem ol disaepol blong Jisas Kraes, yumi stap lukaot blong givhan long ol pikinini blong God.

Lod i wantem blong evri memba blong Jos blong Hem blong oli gat semfala kea ia. From risen ia, olgeta we oli kasem prishud, oli kasem wok ia blong stap olsem ol givhan brata long wanwan haos we i gat memba long hem. Ol givhan sista, oli kasem wok blong lukaot long wanwan adalt sista. Ol wok ia we oli givimaot, oli blong meksua se oli tingbaot mo kea long ol memba blong Jos (luk long Moronae 6:4).

Wok ia blong givhan, hem i wan impoten wei blong kipim olgeta komanmen ia blong lavem God mo lavem ol neba blong yumi (luk long Matiu 22:36–40). Hem i wan stamba rod blong help blong mekem wok blong God blong fasin blong sevem man mo fasin blong kam olsem wan god, i hapen.

Presidensi blong kworom blong ol elda mo hemia blong Rilif Sosaeti oli helpem ol givhan brata mo sista blong lanem olsem wanem blong givhan long ol narawan. Mo tu, oli givim insperesen, oli soem rod, mo oli givim sapot. Oli save mekem hemia long taem blong ol givhan intaviu (luk long 21.3), long taem blong ol Sandei miting, mo tu, long ol praevet storian. Oli lukaotem insperesen insaed long ol skripja, insaed long japta ia, mo tu long churchofjesuschrist.org/ministering/?lang=bis.

21.1

Ol Responsabiliti blong Ol Givhan Sista mo Ol Givhan Brata

Ol givhan sista o brata oli ripresentem Lod. Mo tu, oli helpem ol memba blong oli filim lav ia mo sapot blong bisop mo ol lida blong Rilif Sosaeti mo ol lida blong kworom. Oli mas “luklukaotem gud” ol memba blong Jos, “mo stap wetem mo mekem olgeta oli kam strong moa” (Doktrin mo Ol Kavenan 20:53).

Ol givhan brata mo sista oli gat olgeta responsabiliti ia blong mekem long wanwan man, woman mo famli we oli gat blong lukaotem:

• Oli helpem ol memba blong mekem fet blong olgeta long Papa long Heven mo long Jisas Kraes i kam strong moa.

• Oli helpem ol memba blong oli mekem mo kipim ol tabu kavenan wetem God taem we oli kasem olgeta odinens ia. Olsem we i nid, oli helpem ol papa mo mama blong oli mekem ol pikinini blong olgeta oli rere blong kasem ol odinens mo kipim ol kavenan.

• Oli luksave ol nid we oli haed, mo oli givim lav, kea mo seves olsem hemia blong Kraes. Oli givim help mo kamfot long ol taem blong nid long saed blong spirit mo long saed blong laef ia long wol. Oli toktok raon long ol nid long taem blong ol givhan intaviu, mo tu, long ol nara taem.

• Oli helpem olgeta long fasin blong kam indipenden long saed blong spirit mo long laef long wol ia.

Blong save moa abaot ol responsabiliti blong ol givhan sista mo brata, luk long Jemes 1:27, Mosaea 23:18, mo Doktrin mo Ol Kavenan 20:47, 59.

Wetem prea, ol givhan brata mo sista oli lukaot blong Spirit i givhan long olgeta. Oli toktok tu wetem olgeta we oli stap givim seves long olgeta blong oli andastanem olsem wanem blong helpem olgeta gud moa mo olsem wanem blong mitim nid blong olgeta.

Ol givhan sista mo brata oli stretem ol hadwok blong olgeta blong i go stret wetem ol nid mo ol situesen blong olgeta we oli stap givim seves long olgeta. Oli leftemap tingting blong visitim olgeta wanwan, mo lukluk tu long ol samting olsem sefti, sapos ples i stap longwe, mo ol fasin long kalja. Ol givhan sista mo brata oli save help tu long sam narafala wei. Ol nara wei ia, i gat, ol telefon kol, ol vidio kol, ol teks, ol imel, ol leta, sosol media, toktok long jos, mo ol aksen blong seves.

Maet bae i gat ol nid we ol givhan brata mo sista oli no save mekem olgetawan. Long ol kes olsem, oli toktok wetem wan memba blong Rilif Sosaeti, o wan memba blong presidensi blong kworom blong ol elda.

21.2

Stap Oganaesem Wok blong Givhan

Sevya i bin givim wok we i gat mining long ol disaepol blong Hem (luk long Luk 10:1–17; luk tu long 4.2.6 insaed long hanbuk ia). Folem paten ia, yumi kasem ol wok blong givhan long ol spesifik man, woman mo famli. Wan rod blong folem, we i oganaes, blong mekem wok blong givhan i helpem wanwan blong filim lav ia we i kam long Sevya.

21.2.1

Stap Givimaot Ol Wok

Presidensi blong kworom mo hemia blong Rilif Sosaeti oli prea mo tingting long huia blong givimaot wok olsem ol givhan brata mo sista. Oli skelem wanem memba i strong blong mekem mo ol nid blong olgeta. Oli lukluk tu long ol nid blong ol pikinini insaed long famli. Long nomol wei, oli givim wok long tufala brata, o tufala sista blong stap olsem kompanion. Oli askem apruvol blong bisop long saed blong ol givhan kompanionsip mo ol brata mo sista we bae oli go visitim.

Taem oli stap tekem ol desisen ia, ol lida oli lukluk tu long olgeta samting ia:

• Olgeta givhan brata mo sista we oli stap givim ful taem mo tingting blong olgeta, oli mas givim wok long olgeta blong oli lukaotem ol memba we nid blong olgeta oli moa bigwan. Olgeta memba long nid ia, maet oli ol niu memba, ol singgel papa o mama, ol wido woman, ol wido man, mo ol lesaktiv memba.

• Ol yut oli save stap olsem ol kompanion long ol adalt folem ol gaedlaen insaed long 21.2.2.

• Oli save givim wok long wan kapol blong tufala i givhan long wan man, wan woman, o wan famli.

• Ol presidensi blong stek, mo ol bisoprik oli kea long evri memba blong stek o wod. From hemia, plante taem oli no stap givimaot wok long olgeta olsem ol givhan brata. Stek presiden i talemaot sapos oli save givimaot wok ia long ol hae kaonsela mo ol petriak we oli wok i stap.

Afta we bisop i givim raet blong hem, wan memba blong presidensi blong kworom blong ol elda blong givimaot ol wok ia i go long ol givhan brata, mo i tekem tu ol yang man. Wan memba blong presidensi blong Rilif Sosaeti i givimaot ol wok long ol givhan sista, mo i tekem tu ol yang woman.

Ol lida ia, oli toktok wetem ol givhan brata mo sista abaot wanem we ol memba we bae oli givhan long olgeta oli gud long hem, wanem nid blong olgeta, mo ol jalenj blong olgeta. Ol lida oli leftemap tingting blong ol givhan brata mo sista blong oli andastanem ol nid blong olgeta ia we oli kasem wok blong givhan long olgeta, mo afta, blong oli lukaotem insperesen blong save bes wei blong givim seves long olgeta.

Oli no stap singaotem, sastenem, o setem apat ol givhan brata mo sista. Seves ia i pat blong kavenan ia we oli bin mekem long baptaes blong olgeta (luk long Mosaea 18:8–11).

21.2.2

Ol Wok blong Givhan blong Givimaot long Ol Yut

Iven bifo oli kasem ol wok blong givhan, ol yut oli stap givhan finis long ol narawan taem oli stap givim seves long olgeta long ol wei olsem hemia blong Kraes. Seves blong wan yut olsem wan givhan brata o sista, bae i save stap olsem wan impoten pat blong stap help blong mekem wok blong God blong fasin blong sevem man mo fasin blong kam olsem wan god i hapen.

Wan yang woman i save givim seves olsem wan givhan kompanion long wan Rilif Sosaeti sista taem we yang woman ia i glad blong mekem wok ia mo taem hem i save mekem wok ia. Hem i save stat blong givim seves long yia ia we bae hem i kasem 14 yia. Presidensi blong Rilif Sosaeti i toktok wetem yang woman ia, papa mo mama blong hem, mo presidensi blong Ol Yang Woman, taem we oli wantem givimaot givhan wok ia.

Plante taem hem i wan blesing long wan sista blong gat wan yang woman i givhan long hem. I save kam wan blesing long yang woman ia.

Wan yang man i stap olsem givhan kompanion blong wan we i kasem Melkesedek Prishud taem we oli odenem hem i go long ofis blong tija o pris. Bisop i talemaot sapos yang man ia i klin inaf mo i rere blong oli odenem hem. (Luk long 10.1.3.2.) Presidensi blong kworom blong ol elda i toktok wetem yang man ia, papa mo mama blong hem, mo bisoprik taem oli tingting blong givimaot wok blong givhan long hem.

Long sam kes, oli save givim wok long wan yut blong hem i wan nambatri memba blong wan givhan kompanionsip. Ol lida oli save givimaot wok long ol yut blong help blong givhan long samfala, o evri man, woman, mo famli we oli putum long han blong wan kompanionsip.

Ol yut oli no gat ol givhan brata o sista we oli kasem wok blong lukaot long olgeta. Ol yut ia oli kasem givhan kea we i kam long ol givhan brata blong famli blong olgeta. Presidensi blong klas blong olgeta, o presidensi blong kworom blong olgeta, mo ol adalt lida tu oli givhan long olgeta. Sapos papa mo mama blong olgeta oli no ol memba blong jos, be oli oraet blong kasem sam givhan, presidensi blong kworom blong ol elda i save givim wok long sam givhan brata blong oli lukaot long ol famli ia. Semmak, presidensi blong Rilif Sosaeti i save givimaot wok long ol givhan sista blong i lukaot long mama.

Gaedlaen ia blong Jos, we i talem se i mas gat tufala responsibol adalt we tufala i stap wetem ol yut, oli no yusum long wok ia blong stap olsem ol givhan kompanion. Be, ol lida oli yusum waes tingting mo askem insperesen taem oli givim wok long ol yut blong stap olsem ol kompanion blong ol adalt. Oli askem advaes long bisop. Taem oli stap putum wan yut blong i wok wetem wan kompanion we i no papa o mama blong hem, ol lida oli mas konfemem wetem papa mo mama se oli agri blong pikinini blong olgeta i kasem wok ia mo huia bae hem i wok wetem.

Ol adalt kompanion oli mas stap longwe long ol situesen we man i save andastanem long wan wei we i no stret. Oli lukaotgud long ol situesen we oli stap olgetawan nomo wetem wan narawan. Oli help blong ol yut oli gat wan sef mo gudfala eksperiens wetem wok blong givhan.

21.2.3

Ol Fultaem Misinari

Sapos misin presiden i apruvum, ol fultaem misinari oli save help wetem wok blong givhan. Ol lida blong wok oli save askem apruvol blong hem tru long stek presiden. Plante taem, ol fultaem misinari oli kasem wok ia blong givhan long ol niu memba, ol haf memba famli, mo ol lesaktiv memba.

21.3

Ol Givhan Intaviu

Sevya i bin gat wan dip be simpol intaviu wetem Pita long saed blong fidim ol sipsip blong Hem (luk long Jon 21:15–17). Ol givhan intaviu, oli ol semmak janis ia. Ol intaviu ia oli letem ol lida blong setem wan eksampol long saed blong wok blong givhan.

Presiden blong kworom blong ol elda mo ol kaonsela blong hem oli mekem intaviu blong ol givhan brata. Presiden blong Rilif Sosaeti mo ol kaonsela blong hem oli intaviu long ol givhan sista. Wan mared kapol we oli kasem wok blong mekem wok blong givhan ia tugeta, oli save mit wetem ol elda blong kworom o wetem ol lida blong Rilif Sosaeti, o tugeta.

Ol intaviu ia, oli stap holem wan taem o moa long wan taem long wanwan kwota. Oli save holem ol intaviu ia long eni taem insaed long kwota ia. I moa gud sapos oli toktok fes tu fes blong gat ol intaviu ia, mo blong i hapen wetem tufala memba blong kompanionsip long semtaem. Ol yut we oli kasem ol givhan wok, oli mas stap tu long ol intaviu ia sapos i posibol.

Ol givhan intaviu, oli no nid blong oli longfala blong oli wok gud. Stamba tingting blong ol givhan intaviu ia, oli blong:

• Kaonsel tugeta abaot wanem wanwan man, woman mo famli we oli gat wok blong lukaotem, oli save mekem gud, oli nidim, mo fesem olsem jalenj.

• Toktok raon long ol wei blong helpem olgeta blong rere blong kasem ol odinens sapos i gat nid from.

• Faenemaot olsem wanem kworom blong ol elda, Rilif Sosaeti, mo wod kaonsel mo ol narawan oli save help.

• Givhan long ol givhan brata mo sista. Soem lav mo gladhat. Tijim mo leftemap tingting blong olgeta. Helpem olgeta blong oli gro long paoa blong olgeta blong kasem mo mekem samting folem revelesen long seves blong olgeta.

Bitwin ol intaviu, ol givhan brata mo sista oli toktok wetem ol lida taem we i nid. Oli save serem konfidensiol infomesen i go stret long bisop.

Ol lida oli yusum Ol Risos blong Ol Lida mo Klak blong givim ripot blong ol givhan intaviu.

21.4

Stap Kodinetem Ol Wok blong Givhan

Rilif Sosaeti mo kworom blong ol elda oli serem wok ia blong givhan. Oli mekem wok ia wetem yuniti.

Ol presidensi blong Rilif Sosaeti mo kworom blong ol elda, oli mit wan taem o moa long wan kwota. Oli luklukbak long wanem we oli bin lanem long taem blong ol givhan intaviu (luk long 21.3). Mo tu, oli kodinetem ol wok blong givhan we oli givimaot. Mo tufala presiden ia, tufala i serem responsabiliti ia blong stap oganaesem mo lidim miting ia.

Long ol yunit we i gat samfala memba nomo, ol presidensi blong Rilif Sosaeti mo kworom blong ol elda oli save disaed blong i no gat sam givhan brata mo sista we bae oli lukaot long sam memba. Ol lida ia oli mekem desisen ia tugeta, mo oli askem apruvol blong bisop. Sapos i gat wan sista we i gat ol givhan sista oli lukaot long hem, be i no gat ol givhan brata, ol lida oli meksua se sista ia i gat wan we hem i save askem wan prishud blesing long hem.

Presiden blong Rilif Sosaeti mo hemia blong kworom blong ol elda, tufala i mit tugeta wan taem long kwota o moa, wetem bisop. Oli toktok raon long ol nid blong ol memba blong wod. Mo tu, oli toktok raon abaot ol jenis we i save hapen long ol wok blong givhan we oli stap givimaot.

Taem we i nid, presiden blong Rilif Sosaeti mo hemia blong kworom blong ol elda oli toktok raon wetem wod kaonsel, abaot infomesen we ol givhan sista mo brata oli talem. Taem oli mekem olsem, oli respektem rikwes blong ol memba blong kipim ol infomesen ia oli konfidensiol. Olsem we bisop i kodinetem, wod kaonsel i mekem ol plan blong givim seves mo blesem ol memba blong wod. Wod yut kaonsel tu i toktok raon long wok blong givhan (luk long 29.2.6).