21.

Veiqaravi

21.0

Ai Vakamacala Taumada

Na veiqaravi e kena ibalebale na nodra qaravi na tani me vaka a vakayacora na iVakabula (raica na Maciu 20:26–28). A lomani, veivakavulici, masulaki ira, vakacegui ira, ka vakalougatataki ira era tiko wavoliti Koya (raica na Cakacaka 10:38). Ni da sa tisaipeli i Jisu Karisito, eda sa segata meda qaravi ira na luve ni Kalou.

E vinakata na Turaga kivei ira na lewe ni Nona Lotu mera ciqoma na veikaroni vakaoqo. Ena vuku ni ka oqo, o ira na lewe ni matabete era sa lesi mera tagane dauveiqaravi ki na veimatavuvale ni lewenilotu yadua. Era lesi na marama dauveiqaravi vei ira na marama uabula yadua. Na ilesilesi oqo ena vukea mera nanumi ka kauwaitaki na lewe ni Lotu (raica na Moronai 6:4).

Na veiqaravi sa dua na sala bibi eda maroroya kina na ivakaro meda lomana na Kalou ka lomani ira na wekada (raica na Maciu 22:36–40). Sa sala bibi talega me vukea na kena rawati na Nona cakacaka ni veivakabulai kei na bula vakacerecerei na Kalou.

Era na veivuke na mataveiliutaki ni kuoramu ni iTalatala Qase kei na iSoqosoqo ni Veivukei ena nodra vulica na turaga kei na marama dauveiqaravi na ivakarau ni veiqaravi vei ira na tani. Era na dau solia talega na veivakauqeti, veituberi, kei na veitokoni. E rawa ni ra cakava oqo ena veivakatarogi ni veiqaravi (raica na 21.3), ena soqoni ni Sigatabu, kei na veitalanoa yadua. Era vakasaqara na veivakauqeti mai na ivolanikalou, na wase oqo, kei na ministering.ChurchofJesusChrist.org.

21.1

Nodra iTavi na Marama kei na Turaga Dauveiqaravi

O ira na marama kei na turaga dauveiqaravi era matataka tiko na Turaga. Era na vukei ira talega na lewenilotu mera vakila na loloma kei na veitokoni nei bisopi kei na iliuliu ni iSoqosoqo ni Veivukei se kuoramu. Mera na “dau vakatawai ira” na lewe ni Lotu ka “dauvukei ira ka vakaukauwataki ira” (Vunau kei na Veiyalayalati 20:53).

O ira na marama dauveiqaravi kei ira na turaga sa nodra itavi oqo me baleta na tamata yadua kei na matavuvale era sa lesi kina:

• Vukei ira na mera vaqaqacotaka na nodra vakabauta na Tamada Vakalomalagi kei Jisu Karisito.

• Vukei ira mera vakavakarau mera cakava ka maroroya na veiyalayalati tabu vata kei na Kalou ni ra ciqoma na cakacaka vakalotu. Kevaka e gadrevi, vukei ira na itubutubu mera vakarautaki ira na luvedra mera ciqoma na cakacaka vakalotu ka maroroya na veiyalayalati.

• Kila na ka e gadrevi ka vakarautaka na loloma, veikauwaitaki, kei na veiqaravi va-Karisito. Solia na veivuke kei na vakacegu ena gauna ni gagadre vakayalo se vakayago. Veivosakitaki ni gagadre ena gauna ni veivakatarogi ni veiqaravi kei na so tale na gauna.

• Vukei ira mera bula rawati ira vakayalo ka vakayago.

Me baleta na veika tale eso ena nodra itavi na marama kei na turaga dauveiqaravi, raica na Jemesa 1:27, Mosaia 23:18, kei na Vunau kei na Veiyalayalati 20:47, 59.

O ira na marama kei ira na turaga dauveiqaravi era na vakasaqara ena masumasu na veidusimaki ni Yalo. Era na veitalanoataka talega kei ira era qarava mera kila vakavinaka na sala vinaka duadua mera vukei kina mera sotava na nodra gagadre.

Era moica na marama kei na turaga dauveiqaravi na nodra sasaga ki na nodra gagadre kei na nodra ituvaki o ira era qarava. E dau vakayaloqaqataki na veisiko yadua, me vakasamataki na veika me vaka na veitaqomaki, yawa ni vanua, kei na kena veiganiti na itovonibula. Sa rawa talega kivei ira na marama kei na veitacini vakalotu mera tarai ira yani ena veisala tale eso. Oqo e oka kina na qiri mai, na qiri vakavidio, na texts, imeli, ivola, itukutuku raraba, veitaratara ena Lotu, kei na cakacaka ni veiqaravi.

Eso beka na leqa era na sega ni rawa ni qarava duadua na turaga se marama dauveiqaravi. Ena kisi vakaoqo, era na veivakasalataki kina e dua na lewe ni mataveiliutaki ni iSoqosoqo ni Veivukei se kuoramu ni italatala qase.

21.2

Tauyavutaki ni Veiqaravi

A solia na iVakabula vei ira na nona tisaipeli na ilesilesi vakaibalebale (raica na Luke 10:1–17; raica talega na 4.2.6 ena ivoladusidusi oqo). Ni vakamuri na ituvaki oqo, eda na ciqoma na ilesilesi meda veiqaravi ki na tamata yadua kei na matavuvale. E dua na ituvatuva vakarautaki ni veiqaravi ena vukea na kena soli vei ira na tamata yadua na madigi mera vakila na loloma ni iVakabula.

21.2.1

Vakayacori na Veilesi

Eratou na dau masulaka na mataveiliutaki ni kuoramu ni italatala qase kei na iSoqosoqo ni Veivukei na nodra ilesilesi na turaga kei na marama dauveiqaravi. Era na vakasamataka na veika era kaukauwa kina kei na nodra leqa na lewenilotu. Era na vakasamataka talega na nodra gagadre ni gone ena matavuvale. Era dau lesia e rua na turaga se rua na marama me rau veitokani. Era na vakasaqara na veivakadonui ni bisopi ena veitokani kei ilesilesi ni veiqaravi.

Ni vakayacori na vakatulewa oqo, era na vakasamataka na iliuliu na veika oqo:

• O ira na tagane kei na yalewa dauveiqaravi yalodina sa dodonu mera lesi vei ira na lewenilotu era vakaleqai tu vakalevu. Oqo e rawa ni oka kina na lewenilotu vou, itubutubu le dua, yada, dawai, kei ira na lewenilotu luluqa.

• Sa rawa vei ira na itabagone mera veitokani vata kei ira na qase me vaka na idusidusi ena 21.2.2.

• E rawa ni lesi e dua na veiwatini me rau veiqaravi vata vua e dua na tamata se matavuvale.

• Era na dau kauwai na mataveiliutaki ni iteki kei na matabisopi me baleti ira taucoko na lewe ni iteki se tabanalevu. Ena vuku ni ka oqo, era sega ni lesi kina mera turaga dauveiqaravi. Ena vakatulewataka o peresitedi ni iteki se mera lesi se kua o ira na lewe ni matabose e cake kei na peteriaki veiqaravi.

Ni sa solia oti na veivakadonui na bisopi, sa nona itavi e dua na lewe ni mataveiliutaki ni kuoramu ni italatala qase me veilesi vei ira na turaga dauveiqaravi, oka kina o ira na cauravou. E dua na lewe ni mataveiliutaki ni iSoqosoqo ni Veivukei me veilesi vei ira na marama dauveiqaravi, oka kina o ira na goneyalewa.

Era na veivakasalataki na iliuliu oqo vata kei ira na dauveiqaravi tagane se yalewa me baleta na nodra kaukauwa, nodra leqa, kei na nodra ibolebole o ira era na laki veiqaravi kina. Era na veivakayaloqaqataki na iliuliu vei ira na turaga se marama dauveiqaravi mera kila na nodra gagadre o ira era sa lesi kina, ka vakasaqara na veivakauqeti ena sala vinaka duadua mera veiqaravi kina.

O ira na tagane kei na yalewa dauveiqaravi era sega ni kacivi, tokoni, se vakatikori. Na nodra veiqaravi sa tiki ni veiyalayalati era vakayacora ena papitaiso (raica na Mosaia 18:8–11).

21.2.2

iLesilesi ni Veiqaravi vei ira na iTabagone

Ni bera mada ga ni ra ciqoma na ilesilesi ni veiqaravi, era dau veiqaravi na itabagone vei ira eso ena nodra qaravi ira ena veisala Vakarisito. Na nona veiqaravi e dua na itabagone vaka dua na marama se turaga dauveiqaravi, sa rawa ni dua na tiki bibi ni kena vukei me rawati na Nona cakacaka ni veivakabulai kei na bula vakacerecerei na Kalou.

E rawa ni veiqaravi e dua na goneyalewa me dua na itokani dauveiqaravi vua e dua na marama ni iSoqosoqo ni Veivukei ena nona sa tuvakarau ka rawata na goneyalewa. Sa rawa ni tekivu me veiqaravi o koya ena yabaki me sa na yabaki 14 kina. Na mataveiliutaki ni iSoqosoqo ni Veivukei e veivakasalataki vua na goneyalewa, nona itubutubu, kei na mataveiliutaki ni goneyalewa ni ra vakasamataka na ilesilesi ni veiqaravi.

E dau ka ni veivakalougatataki vua e dua na marama me na veiqaravi vua e dua na goneyalewa. E rawa talega ni ka ni veivakalougatataki vei goneyalewa.

Sa na itokani vakadauveiqaravi e dua na cauravou vua e dua na Matabete i Melikiseteki ena gauna sa tabaki kina ki na itutu vakaivakavuvuli se bete. Ena vakadeitaka o bisopi ke sa kilikili ka sa vakarau tu na cauravou oya me tabaki. (Raica na 10.1.3.2.) Ena veivakasalataki na mataveiliutaki ni kuoramu ni italatala qase vua na cauravou, o rau na nona itubutubu, kei iratou na matabisopi ena nodratou vakasamataka na ilesilesi ni veiqaravi.

Ena so na gauna, e rawa ni ra lesi na itabagone me ikatolu ni itokani ni veiqaravi. Sa rawa vei ira na iliuliu mera lesi ira na itabagone mera veivuke ena veiqaravi vei ira eso se o ira kece na tamata yadua kei na matavuvale e lesi ki na veitokani.

O ira na itabagone e sega ni dau lesi vei ira e dua na dauveiqaravi turaga se marama. Era na qaravi ga mai vei ira na dauveiqaravi ni nodra matavuvale. Era na qaravi talega mai vei ira na mataveiliutaki ni nodra kalasi se kuoramu kei ira na iliuliu uabula. Kevaka era sega ni lewe ni Lotu na nodra itubutubu ia era sa tuvakarau tu mera ciqoma na veiqaravi, sa rawa vei iratou na mataveiliutaki ni kuoramu ni italatala qase me ratou lesia eso na dauveiqaravi tagane ki na matavuvale. Sa na rawa vakakina, ki na mataveiliutaki ni iSoqosoqo ni Veivukei me ratou lesia na marama dauveiqaravi vei tina.

Na idusidusi me rau dau tiko e rua na qase vata kei ira na itabagone e sega ni okati ena veitokani ni veiqaravi. Ia, o ira na iliuliu era na vakayagataka na vuku ka vakasaqara na veivakauqeti ena nodra lesi na itabagone mera itokani vei ira na qase. Era na vakasaqara talega na veidusimaki nei bisopi. Ni lesi e dua na itabagone me itokani vua e dua e sega ni nona itubutubu, mera vakadeitaka na iliuliu ni ra sega ni lomaleqa kina na itubutubu.

O ira na itokani qase e dodonu mera levea na vei ituvaki ka rawa ni tauri vakatani. Era na dau qaqarauni me baleta na veigauna ni tiko taurua. Era na vukei ira na itabagone mera taqomaki ka kune ka vinaka ena nodra veiqaravi.

21.2.3

Daukaulotu Tudei

Kevaka e vakadonuya na peresitedi ni kaulotu, sa rawa vei ira na daukaulotu tudei me ra veivuke ena veiqaravi. Sa rawa kivei ira na iliuliu ni tabanalevu mera vakasaqara na nona veivakadonui mai vei peresitedi ni iteki. Era dau lesi na daukaulotu tudei mera veiqaravi vei ira na lewenilotu vou, matavuvale lewenilotu vakatikina, kei ira era luluqa tu vakalotu.

21.3

Veivakatarogi ni Veiqaravi

A dua na nona veivakatarogi rawarawa ka bibi na iVakabula vei Pita me baleta na nona vakani ira na Nona sipi (raica na Joni 21:15–17). Na veivakatarogi ni veiqaravi e rawa ni dua na madigi vata oya. Sa rawa talega kina vei ira na iliuliu mera tuva e dua na ivakaraitaki ni veiqaravi.

Eratou vakatarogi ira na turaga dauveiqaravi o peresitedi ni kuoramu ni italatala qase kei rau na nona daunivakasala. Na peresitedi ni iSoqosoqo ni Veivukei kei rau na nona daunivakasala eratou vakatarogi ira na marama dauveiqaravi. Oi rau na veiwatini erau veiqaravi vata tiko e rawa ni rau sota kei na iliuliu ni dua vei rau na kuoramu ni italatala qase se iSoqosoqo ni Veivukei se ruarua.

Na veivakatarogi oqo e dau vakayacori vakadua ena veivulatolu kevaka e lailai. E rawa ni vakayacori ena dua ga na gauna ena loma ni vulatolu. E uasivi sara, me vakayacori sara ga na veivakatarogi ena matanavotu, vata kei rau ruarua na veitokani. E dodonu mera okati talega kina na itabagone era vakailesilesi ni veiqaravi kevaka e rawa.

Na veivakatarogi ni dauveiqaravi e sega ni gadrevi me balavu me rawa kina vakavinaka. Na nodra inaki mera:

• Veivakasalataki me baleta na nodra kaukauwa, nodra gagadre, kei na bolebole ni tamata yadua kei na matavuvale.

• Veivosakitaka na sala mera vukei kina na tamata mera vakavakarau ki na nodra ciqoma na cakacaka vakalotu kevaka e gadrevi.

• Vakasamataka na sala mera veivuke kina na kuoramu ni italatala qase, iSoqosoqo ni Veivukei, matabose ni tabanalevu, kei ira tale eso.

• Veiqaravi vei ira na turaga kei na marama dauveiqaravi. Vakaraitaka na loloma kei na vakavinavinaka. Vakavulici ira ka vakayaloqaqataki ira. Vukei ira mera tubu cake mera rawa ni ciqoma ka cakacakataka na ivakatakila ena nodra veiqaravi.

Ena maliwa ni veivakatarogi, era dau veitaratara na turaga kei na marama dauveiqaravi kei ira na iliuliu kevaka e gadrevi. E rawa ni ra wasea vakadodonu sara vata kei na bisopi na itukutuku maroroi.

Era na vakayagataka na iliuliu na Leader and Clerk Resourrces (iVurevure ni iLiuliu kei na Vunivola) me soli kina na veivakatarogi ni veiqaravi.

21.4

Yadrava na Sasaga ni Veiqaravi

Na iSoqosoqo ni Veivukei kei na kuoramu ni italatala qase era wasea na cakacaka ni veiqaravi. Era cakava na cakacaka oqo ena duavata.

Era na soqoni vata vakavulatolu ke lailai na mataveiliutaki ni iSoqosoqo ni Veivukei kei na italatala qase. Era na railesuva na veika era sa vulica ena veivakatarogi ni veiqaravi (raica na 21.3). Era na vakarautaka talega na ilesilesi ni veiqaravi. E rau na wasea na peresitedi e rua na itavi ni kena tuvani ka liutaki na soqoni.

Ena veitabanilotu ka vica wale na lewena era bulabula tiko vakalotu, e rawa ni ratou lewa na mataveiliutaki ni iSoqosoqo ni Veivukei kei na kuoramu ni italatala qase mera kua ni lesi ruarua na dauveiqaravi marama kei na turaga vei ira eso na lewenilotu. Era na vakatulewa vata na iliuliu ena ka oqo ka vakasaqara na veivakadonui nei bisopi. Kevaka e dua na marama e lesi vua na dauveiqaravi marama ka sega ni dua na dauveiqaravi turaga, mera raica na iliuliu ni sa tiko e dua me na rawa ni kerea kina o koya na veivakalougatataki ni matabete.

Eratou na dau sota vata e veivulatolu o rau na peresitedi ni iSoqosoqo ni Veivukei kei na kuoramu ni italatala qase vata kei bisopi. Era na veivosakitaka na nodra gagadre na lewe ni tabanalevu. Era na veivosakitaka talega na veika eso e rawa ni veisau ena ilesilesi ni veiqaravi.

Ena gauna e gadrevi kina, o ira na peresitedi ni iSoqosoqo ni Veivukei kei na kuoramu ni italatala qase era na veivosakitaka vata kei na matabose ni tabanalevu na itukutuku era wasea na marama kei na turaga dauveiqaravi. Ni ra cakava oqo, era na dau rokova na nodra kerekere na lewenilotu me maroroi na kedra itukutuku. Ena veidusimaki nei bisopi, ena vakarautaka na matabose ni tabanalevu na ituvatuva me ia kina na veiqaravi ka ra vakalougatataki na lewe ni tabanalevu. Ena veivosakitaki talega ena matabose ni itabagone ena tabanalevu na veiqaravi (raica na 29.2.6).