23.

Stap Serem Gospel mo Mekem Ol Memba we Oli Niu mo Olgeta we Oli Kambak Oli Kam Strong Moa

23.0

Fas Toktok

Blong stap invaetem evriwan blong akseptem gospel, i pat blong wok blong God blong fasin blong sevem man mo fasin blong kam olsem wan god (luk long 1.2 insaed long hanbuk ia; Matiu 28:19–20). Hemia i tekem tu:

• Stap tekpat long misinari wok mo stap givim seves olsem misinari.

• Stap helpem ol memba blong Jos we oli niu mo olgeta we oli stap kambak long Jos blong oli progres folem kavenan rod ia.

23.1

Serem Gospel

23.1.1

Lavem

Yumi evriwan i ol pikinini blong Papa long Heven we i lavem ol pikinini blong Hem long wan fasin we i stret evriwan. Hem i givim, long evriwan, janis ia blong yumi fulap long lav blong Hem tru long Jisas Kraes mo gospel blong Hem Jon 3:16; 2 Nifae 26:24–28; Alma 26:37; Ol Toktok blong Bilif 1:3).

Wan wei blong yumi soem lav we yumi gat long God, i blong yumi lavem mo givim seves long ol pikinini blong Hem (luk long Matiu 22:36–39; 25:40). Yumi traehad blong lavem mo givim seves semmak olsem we Jisas Kraes i bin mekem. Lav ia i givim insperesen long yumi blong go toktok long ol pipol blong evri relijin, evri kala blong skin, mo evri kalja (luk long Ol Wok 10:34; 2 Nifae 26:33).

23.1.2

Serem

From se yumi lavem God mo ol pikinini blong Hem, bae i nomol blong yumi wantem serem ol blesing we Hem i bin givim long yumi (luk long Jon 13:34–35) mo help blong pulum Isrel i kam tugeta. Yumi wantem blong wok blong helpem ol pipol oli filim glad ia we yumi filim (luk long Alma 36:24). Olsem ol disaepol blong Jisas Kraes, yumi holem laet blong Hem antap (luk long 3 Nifae 18:24–25). Yumi no fraet, long pablik, blong tokbaot Sevya mo paoa blong Hem insaed long laef blong yumi Doktrin mo Ol Kavenan 60:2).

Yumi serem lav, ol trutok blong gospel, taem, ol eksperiens, mo ol program blong Jos blong save blesem ol pikinini blong God, mo helpem olgeta blong oli kam kolosap moa long Sevya. Yumi serem ol samting ia long ol rod we oli nomol mo long wan fasin we i nomol, olsem pat blong ol storian onlaen mo long ol narawei.

23.1.3

Invaetem

Sevya i stap invaetem evriwan blong akseptem gospel blong Hem mo rere from laef we i no save finis (luk long Alma 5:33–34). Olsem ol disaepol blong Hem, yumi stap folem eksampol blong Hem, mo stap invaetem evriwan blong “kam long Kraes, mo kam stret evriwan tru hem” (Moronae 10:32).

Yumi prea from insperesen mo blong Lod i soem rod long yumi long wei blong invaetem ol narawan blong:

• Kam mo luk ol blesing we i stap tru long Jisas Kraes, gospel blong Hem, mo Jos blong Hem (luk long Jon 1:37–39, 45–46).

• Kam mo givim seves long ol pipol we oli gat nid.

• Kam mo kam pat blong Jos Ia blong Jisas Kraes, we Hem i bin putumbak long wol ia.

Taem ol invitesen blong yumi oli stanap long ol nid mo ol intres blong wan man o woman, bae i luk se bae hem i save akseptem ol invitesen ia. Plante taem, blong invaetem wan, hem i minim nomo blong invaetem famli blong yumi, ol fren, mo ol neba blong yumi long wanem yumi stap mekem finis. Eksampol, yumi save invaetem olgeta blong:

• Joenem yumi long hom blong yumi blong gat ol aktiviti.

• Joenem yumi long hom blong yumi blong wosip mo lanem gospel.

• Go long ol spesel taem o samting, olsem wan blesing blong bebi, o long wan baptaes.

• Tekpat long ol aktiviti o seves blong wod mo komuniti, wetem ol projek we oli oganaesem tru long JustServe.org (long ol ples we i gat).

• Tekpat long ol program mo ol aktiviti blong Jos. Olgeta program mo aktiviti ia, i gat ol Praemeri aktiviti, ol yut aktiviti, ol kos blong famli histri, blong indipenden laef, BYU–Pathway Worldwide, mo ol kos blong litresi mo Inglis.

• Mitim ol fultaem misinari mo harem mesej blong olgeta.

Blong gat moa aedia mo risos, luk long:

• share.ChurchofJesusChrist.org.

• “Sharing the Gospel” insaed long Gospel Laebri.

• Seksen blong “Joen Wan wetem Ol Memba” long japta 9 blong Prijim Gospel blong Mi: Wan Gaed blong Stap Serem Gospel blong Jisas Kraes.

Ol wod stek oli save krietem ol nomol janis blong ol memba blong invaetem ol narawan. Ol wei blong mekem hemia i tekem tu blong stap mekem ol taem mo aktiviti mo stap serem ol risos blong Jos wetem lokol komuniti.

Ol wod mo stek lida oli kaonsel tugeta blong luksave (1) ol nid blong komuniti mo (2) ol risos blong Jos blong serem. Blong moa infomesen, luk long “Sharing Church Resources” insaed long Gospel Laebri.

Olgeta prinsipol blong stap lavem, serem, mo stap invaetem man, i go tu long taem we yumi stap mekem ol niu memba mo ol memba we oli kambak, oli kam strong moa.

23.2

Stap Mekem Ol Niu Memba Oli Kam Strong Moa

Blong stap joenem Jos, hem i gud tumas, mo tu, hem i wan jalenj long plante pipol. Hem i tekem ol bigfala blesing oli kam, be tu, i nidim blong stretem laef blong i stret wetem ol niu bilif, ol niu evri dei fasin, mo ol niu rilesensip (luk long 1 Tesalonaeka 1:6).

Wanwan niu memba i nidim wan fren, ol janis blong givim seves, mo kaekae long saed blong spirit. Olsem ol memba blong Jos, yumi givim lav blong yumi, mo sapot blong yumi long ol niu memba (luk long Mosaea 18:8–10). Yumi helpem olgeta blong oli filim se oli pat blong Jos, o oli gat pat insaed long Jos. Yumi helpem olgeta blong progres folem kavenan rod ia, mo kam blong “jenisim laef [moa bigwan] i go long Lod” (Alma 23:6). Yumi helpem olgeta blong oli “fidim olgeta wetem gudfala toktok blong God, blong holemtaet olgeta i stap long stret rod, … mo stap dipen nomo long ol gudfala wok blong Kraes” (Moronae 6:4).

Yumi save helpem ol niu memba tu:

• Lanem mo gat eksperiens long glad ia blong stap olsem wan disaepol blong Jisas Kraes.

• Lanem olsem wanem blong luksave ol kwaet toktok we oli kam long Spirit.

• Developem wan evri dei fasin blong stap mekem prea mo skripja stadi blong yuwan mo wetem famli.

• Serem gospel wetem famli mo fren blong olgeta.

• Faenem nem blong ol bubu mo rere blong kasem ol odinens blong tempol long bihaf blong olgeta.

• Groap tru long fasin blong mekem ol asaenmen blong Jos mo tru long fasin blong stap tekpat long plante nara janis we Jos i stap givimaot.

23.3

Stap Mekem Ol Memba we Oli Kambak Oli Kam Strong Moa

Samfala memba oli save jusum blong stop blong tekpat insaed long Jos. Sevya i bin talem: “Be, yufala i no mas sakem hem aot long ol haos blong prea blong yufala, o long ol ples blong wosip blong yufala, from olgeta olsem ia, bae yufala i gohed blong givhan long olgeta; from yufala i no save sapos bae oli kambak mo sakem sin, mo kam long mi wetem evri tingting blong hat mo bae mi mekem olgeta i kam oraet; mo bae yufala i stap olsem ol rod blong karem fasin blong sevem man i go long olgeta” (3 Nifae 18:32). Olgeta toktok ia, oli blong olgeta evriwan we, from samfala risen, oli nidim blong oli gogohed blong givhan long olgeta.

Ol memba we oli no stap tekpat fulwan, bae i luk se, plante taem, bae oli kambak sapos oli gat wan strong rilesensip wetem ol memba blong Jos. Lav mo sapot blong yumi i save helpem olgeta blong winim olgeta jalenj. Olsem ol niu memba, olgeta ia oli nidim ol fren, ol janis blong givim seves, mo blong oli kasem kaekae long saed blong spirit. Blong stap andastanem ol situesen mo ol jalenj blong olgeta i save helpem yumi blong givhan long olgeta wetem fasin blong lukaotgud long filing blong olgeta, mo wetem lav.

23.4

Mekem Ol Kodinesen Miting blong Evri Wik

Evri wik, oli holem ol sot miting blong kodinetem ol efot blong stap serem gospel mo mekem ol niu memba mo ol memba we oli kambak, oli kam strong moa. Sapos oli singaotem wan wod misin lida, hem i kondaktem ol miting ia. Sapos no, memba blong presidensi blong kworom blong ol elda we i kasem wok ia, i lidim miting.

Olgeta narawan we oli save invaetem olgeta, i gat:

• Ol memba blong Rilif Sosaeti mo ol memba blong kworom blong ol elda we oli givimaot wok ia long olgeta.

• Ol wod misinari.

• Wan asisten long kworom blong pris (presiden blong ol tija o blong ol dikon, sapos i no gat pris long wod).

• Wan memba blong presidensi blong yia grup blong klas blong ol yang woman we oli moa olfala.

• Ol fultaem misinari.

Ol kodinesen miting blong evri wik i lukluk moa long nid blong wanwan man o woman. Plante taem miting ia i kavremap fofala topik ia:

• Olsem wanem blong helpem olgeta we ol misinari oli stap tijim olgeta. Hemia i save tekem tu blong stap tekpat long tijing, stap helpem ol pipol blong kipim ol komitmen, mo stap givim sapot long ol seves blong baptaes we i stap kam.

• Olsem wanem blong helpem olgeta we oli jes baptaes i no long taem i pas

• Olsem wanem blong helpem ol memba we oli stap kambak long jos

• Olsem wanem blong helpem ol memba blong faenem moa pipol blong tijim

Ol miting ia, oli save holem fes tu fes, o onlaen. Kodinesen ia tu, i save tekem ples tru long ol defren wei, olsem telefon kol, teks, mo imel.

23.5

Ol Stek Lida

23.5.1

Stek Presidensi

Stek presiden i holem ol ki, insaed long stek, blong wok blong serem gospel mo blong mekem ol niu memba mo ol memba we oli kambak, oli kam strong moa. Hem mo ol kaonsela blong hem, oli givim daereksen blong ol efot ia. Hem i meksua se, wok ia, oli tokbaot oltaem insaed long ol miting blong stek.

Plante taem, wan taem long manis, stek presiden i mit wetem misin presiden blong kodinetem ol efot bitwin ol lida long stek mo ol wod mo ol fultaem misinari. Ol narawan we oli save stap long miting ia, i gat:

• Ol kaonsela long stek mo misin presidensi.

• Ol hae kaonsela we oli givimaot wok ia long olgeta.

• Stek Rilif Sosaeti presiden.

• Ol misinari olsem we misin presiden i givimaot wok ia long olgeta.

23.5.2

Stek Adalt Lidasip Komiti

Stek adalt lidasip komiti, insaed long hem i gat:

• Stek presidensi.

• Stek Rilif Sosaeti presidensi.

• Ol hae kaonsela we oli givimaot ol wok ia long olgeta blong wok wetem ol kworom blong ol elda.

Olgeta lida ia, oli givim instraksen mo sapot long presidensi blong kworom blong ol elda, mo hemia blong Rilif Sosaeti, long ol wok blong olgeta blong stap serem gospel, mo mekem ol niu memba mo ol memba we oli kambak, oli kam strong moa (luk long 23.6.2). Instraksen ia i save tekem ples long wan grup, o wetem wanwan. Oli save invaetem ol wod misin lida blong oli kasem instraksen ia.

Blong kasem moa infomesen abaot ol miting blong komiti ia, luk long 29.3.8.

23.5.3

Ol Hae Kaonsela

Stek presidensi i save givimaot wok long ol hae kaonsela blong oli givim instraksen mo sapot long ol presidensi blong kworom blong ol elda, mo ol wod misin lida. Oli save givim wok long wan o moa long wan hae kaonsela blong lidim ol bigfala wok ia. Be, evri hae kaonsela oli gat responsabiliti blong lukaot long ol wod mo kworom we oli bin givim long wanwan long olgeta blong lukaotem.

23.5.4

Stek Rilif Sosaeti Presidensi

Anda long daereksen blong stek presiden, stek Rilif Sosaeti presidensi i givim instraksen mo i sapotem ol wod Rilif Sosaeti presidensi long saed blong ol responsabiliti blong olgeta long saed blong stap serem gospel mo mekem ol niu memba mo ol memba we oli kambak, oli kam strong moa.

23.6

Wod Lida

23.6.1

Bisoprik

Bisoprik i kodinetem ol efot ia wetem presidensi blong kworom blong ol elda mo presidensi blong Rilif Sosaeti, taem oli stap wok blong stap serem gospel mo stap mekem ol niu memba mo ol memba we oli kambak, oli kam strong moa. Ol lida ia, oli kaonsel tugeta oltaem abaot ol efot ia.

Bisoprik i meksua se olgeta efot ia, oli toktok raon long olgeta mo oli kodinetem olgeta long ol miting blong wod kaonsel mo ol miting blong yut kaonsel. Mo tu, bisoprik i luklukbak mo i apruvum wod plan long saed blong wok blong stap serem gospel mo mekem ol niu memba mo ol memba we oli kambak, oli kam strong moa (luk long 23.6.6).

Bisoprik i toktok wetem stek presiden blong faenemaot sapos i nid blong singaotem wan wod misin lida (luk long 23.6.3 blong kasem moa infomesen).

Bisop i intaviu long ol niu memba we oli gat stret yia, blong oli kasem wan tempol rekomen blong mekem ol baptaes mo konfemesen long bihaf blong ol dedman (luk long 26.4.2). Mo tu, hem i intaviu long ol brata we oli gat stret yia, blong oli kasem Aronik Prishud (luk long 38.2.9.1). Plante taem, hem i lidim ol intaviu ia stret long wik ia we i folem konfemesen blong memba.

Bisoprik i kodinetem ol wok ia wetem ol nara lida blong meksua se ol niu memba, mo ol memba we oli kambak, oli gat sam janis blong givim seves. Ol janis olsem, oli save helpem ol memba ia blong oli groap long saed blong spirit, mo blong oli filim paoa blong Lod insaed long laef blong olgeta. Seves i save helpem tu ol memba blong oli filim glad, mo blong oli bildim ol strong rilesensip wetem ol narawan insaed long wod.

Ol janis blong givim seves oli mas folem ol nid mo ol samting we ol memba oli save mekem. Long samfala kes, bae i stret blong givim wan koling. Long sam narafala kes, bae i moa stret blong givim wan asaenmen.

23.6.2

Presidensi blong Kworom blong Ol Elda mo Presidensi blong Rilif Sosaeti

Presidensi blong kworom blong ol elda mo hemia blong Rilif Sosaeti oli save lidim ol evri dei efot blong wod blong serem gospel mo mekem ol niu memba, mo ol memba we oli kambak, oli kam strong moa (luk long 8.2.3 mo 9.2.3). Presidensi blong kworom blong ol elda i lidim ol efot ia blong ol memba blong kworom blong ol elda. Presidensi blong Rilif Sosaeti i lidim ol efot ia blong ol memba blong Rilif Sosaeti. Oli wok tugeta blong lidim ol efot ia insaed long wod kaonsel, anda long kodinesen blong bisop.

Ol lida ia, oli gat olgeta responsabiliti ia:

• Oli help blong givim insperesen long ol memba blong oli lavem ol pikinini blong God, blong oli serem gospel, mo blong oli invaetem ol narawan blong oli kasem ol blesing blong Sevya (luk long 23.1).

• Oli kaonsel wetem ol memba blong kworom, o ol memba blong Rilif Sosaeti, abaot wei blong serem gospel. Oli toktok raon long wei blong faenem ol pipol blong ol misinari oli tijim, mo olsem wanem blong sapotem ol pipol we oli stap tijim olgeta. Oli kaonsel tugeta abaot ol nid blong ol niu memba mo ol memba we oli kambak, mo wei blong givim sapot.

• Oli givim wok long ol givhan brata mo sista blong oli lukaot long ol niu memba mo ol memba we oli kambak (luk long 21.2.1). Mo tu, oli save givim wok long ol givhan brata mo sista blong lukaot long ol pipol we ol misinari oli stap tijim (hemia oli mekem taem oli kodinetem ol wok ia wetem ol misinari). Sapos i posibol, ol lida oli givim wok long ol memba we oli gat, o oli save developem ol strong rilesensip wetem wanwan long olgeta pipol ia. Ol lida oli leftemap tingting blong ol givhan brata mo sista blong oli givim lav mo sapot olsem hemia we Kraes i stap givim.

• Oli givim, long ol niu memba mo ol memba we oli kambak, ol janis blong givim seves olsem ol givhan sista o brata. Blong kasem moa infomesen long saed blong wok blong givhan, luk long japta 21.

• Mo tu, wod kaonsel i developem wan plan long saed blong wok blong stap serem gospel mo mekem ol niu memba mo ol memba we oli kambak, oli kam strong moa (luk long 23.6.6).

• Oli lidim wok blong wod misin lida. Sapos oli no singaotem wan misin lida, bae wan memba blong presidensi blong kworom blong ol elda nao i mekem wok ia (luk long 23.6.3).

Presiden blong kworom blong ol elda mo presiden blong Rilif Sosaeti, wanwan long tufala i givim wok ia long wan memba blong presidensi blong olgeta blong i help long ol efot ia. Tufala presidensi memba ia, oli wok tugeta. Tufala i go long ol wik kodinesen miting (luk long 23.4).

23.6.3

Wod Misin Lida

Bisoprik i toktok wetem stek presiden blong faenemaot sapos i nid blong singaotem wan wod misin lida. Sapos oli disaed blong givimaot koling ia, nao bisoprik i kaonsel wetem presiden blong kworom blong ol elda, mo presiden blong Rilif Sosaeti blong faenemaot huia blong singaotem.

Wod misin lida i mas wan man we i holem Melkesedek Prishud. Sapos oli no singaotem wan wod misin lida, wan memba blong kworom blong ol elda i tekem rol ia.

Wod misin lida i sapotem presidensi blong kworom blong ol elda mo hemia blong Rilif Sosaeti long saed blong ol misinari responsabiliti blong tufala. Mo tu, hem i gat olgeta responsabiliti ia:

• Hem i kodinetem wok blong ol memba mo ol lida blong wod, blong ol misinari, mo blong ol fultaem misinari. Hemia i tekem tu blong kodinetem ol wok blong tij, blong ol seves blong baptaes, mo ol efot blong mekem ol niu memba oli kam strong moa. Mo tu, hem i tekem wok blong mekem plan blong gat ol wei blong helpem ol memba blong wod blong oli serem gospel.

• Hem i lidim kodinesen miting blong evri wik (luk long 23.4).

• Hem i go long wod kaonsel miting taem oli invaetem hem.

• Mo tu, hem i helpem wod kaonsel blong i developem mo putumaot wan plan blong wod, long saed blong wok blong stap serem gospel mo mekem ol niu memba mo ol memba we oli kambak, oli kam strong moa (luk long 23.6.6).

• Lukaotem ol janis blong helpem ol fultaem misinari blong oli kasem stamba tingting blong olgeta blong stap serem gospel mo bildim ol rilesensip wetem ol memba. Taem oli apruvum, hemia i save tekem tu blong stap kakae wetem ol memba (plante taem wetem ol haf memba famli mo ol niu memba mo ol memba we oli stap kambak long jos, taem i posibol; luk long 24.6.2.3).

• Hem i wok wetem lida mo ol konsalten blong wod tempol mo famli histri blong helpem olgeta ia we oli stap lanem gospel, ol niu memba, mo ol memba we oli kambak blong oli mekem wok blong tempol mo famli histri.

23.6.4

Ol Wod Misinari

Ol wod misinari oli helpem ol memba blong wod blong gat eksperiens blong gat glad ia blong stap serem gospel olsem oli tokbaot long 23.1. Oli wok anda long daereksen blong wod misin lida, o memba blong presidensi blong kworom blong ol elda we i gat wok ia. Presiden blong Kworom blong Ol Elda mo Presidensi blong Rilif Sosaeti oli save givim nem blong ol memba we oli save givim seves.

Ol wod misinari oli tij tru long toktok mo tru long eksampol long hao blong lavem ol narawan, serem bilif blong olgeta, mo invaetem ol narawan blong kasem ol blesing blong gospel. Mo tu, oli helpem ol memba blong wod blong givhan long ol niu memba mo olgeta memba we oli kambak.

Ol wod misinari oli tekpat long ol kodinesen miting evri wik (luk long 23.4).

23.6.5

Wod kaonsel mo Wod Yut Kaonsel

Fasin blong serem gospel mo fasin blong mekem ol niu memba mo ol memba we oli kambak oli kam strong moa, i mas wan poen blong toktok raon long hem oltaem long ol wod kaonsel miting. Bisop i save askem presiden blong kworom o presiden blong Rilif Sosaeti blong lidim ol toktok storian ia, we i mas lukluk long wanwan man mo woman. Bisop i save invaetem wod misin lida blong i atendem wod kaonsel miting.

Kaonsel i save tokbaot plan blong wod long saed blong wok blong stap serem gospel mo wok blong mekem ol niu memba mo olgeta we oli kambak, oli kam strong moa. Mo tu, oli toktok raon long ol wok we oli bin givimaot we i nid blong oli kodinetem wetem evri oganaesesen. Ol risos olsem hemia we i stap ia i save help long ol toktok storian ia:

• My Covenant Path. Risos ia i helpem ol niu memba mo ol memba we oli stap kambak blong progres folem kavenan rod long taem blong ol fas 12 kasem 24 manis, afta long baptaes blong olgeta, o afta oli kambak blong stap tekpat long gospel. My Covenant Path i gat i stap long Gospel Laebri.

• Kavenan Rod Progres rekod. Ol wod lida mo ol fultaem misinari oli yusum risos ia blong rekodem mo lukluk progres blong ol niu memba mo ol memba we oli stap kambak, mo blong ol pipol we ol misinari oli stap tijim olgeta. Kavenan Rod Progres i gat i stap blong ol wod lida tru long Member Tools app o Ol Risos blong Lida mo Klak (RLK). Ol fultaem misinari oli gat akses mo serem infomesen we i stap long Kavenan Rod Progres tru long ap blong Prijim Gospel blong Mi.

Blong gat moa abaot wod kaonsel, luk long 29.2.5

Wod yut kaonsel i stap lukluk kolosap long (1) ol yut we oli niu mo ol memba we oli stap kambak mo (2) ol yut we ol misinari oli stap tijim olgeta. Mo tu, kaonsel i toktok raon long ol wei we ol yut oli save tekpat long plan blong wod blong stap serem gospel mo mekem evri niu memba mo ol memba we oli kambak, oli kam strong moa. Blong gat moa abaot wod yut kaonsel, luk long 29.2.6

23.6.6

Plan blong Wod blong Stap Serem Gospel mo Mekem Ol Niu Memba mo Ol Memba we Oli Kambak Oli Kam Strong Moa

Wanwan wod i sapos blong gat wan simpol plan blong stap serem gospel mo stap mekem ol niu memba mo ol memba we oli kambak oli kam strong moa. Plan ia i help blong gaedem ol miting, ol seves, mo ol aktiviti. Insaed, i save gat ol plan mo ol aedia blong:

• Stap helpem evriwan oli filim welkam insaed long ol miting mo aktiviti blong wod.

• Stap helpem ol memba blong oli gat eksperiens ia blong filim glad ia blong stap serem gospel.

• Stap sapotem ol pipol we ol misinari oli stap tijim olgeta.

• Stap helpem ol niu memba mo ol memba we oli kambak blong oli progres long saed blong spirit.

Presiden blong kworom blong ol elda mo presiden blong Rilif Sosaeti oli helpem wod kaonsel blong krietem wan plan. Wod lida blong misin i save help tu. Bisop i luklukbak mo i apruvum plan ia.

Ol memba blong wod kaonsel oli tekem lid blong kareaot plan ia. Oli ripotem progres blong olgeta long ol wod kaonsel miting. Mo tu, oli apdeitem plan ia olsem we i nid.